Lənkəran, 5 avqust, Bağır Əliyev, AZƏRTAC

İşəgötürənlərin şəhid ailəsi üzvləri və Vətən müharibəsində yaralanmış qazilərin məşğulluğunun təminatında daha fəal iştirakının təşviqi məqsədilə Əmək və Əhalinin Sosial Müdafiəsi Nazirliyi tərəfindən keçirilən yeni kampaniyaya - “Məşğulluq marafonu"na Təhsil Nazirliyi də qoşulub.

AZƏRTAC-ın bölgə müxbiri xəbər verir ki, “Qəhrəmanlarımızın məşğulluğuna birgə dəstək olaq!” devizi ilə keçirilən marafon çərçivəsində Təhsil Nazirliyi tərəfindən mövcud olan və ya yeni yaradılan vakansiyalar barədə məlumatlar müvafiq elektron platformaya daxil edilib. Həmin vakansiyalar şəhidlərimizin ailə üzvlərinin, müharibədə yaralanmış qazilərimizin iş yerləri ilə təminatı üçün istifadə olunacaq.

İndiyədək Təhsil Nazirliyinə şəhid, qazi və Vətən müharibəsi iştirakçılarının ailə üzvləri tərəfindən işə qəbulla əlaqədar müraciətlər araşdırıldıqdan və vakant yerlərlə bağlı həmin şəxslərlə əlaqə saxlanılaraq rəylər alındıqdan sonra 450-dən çox müraciət müsbət həllini tapıb.

Bu günlərdə Lənkəran Sosial və Aqrar-Texnoloji Kolleci “Məşğulluq marafonu” çərçivəsində Vətən müharibəsi iştirakçısı, qazi Hüseynli Mais Saleh oğlunu təqdim olunan vakansiya üzrə işlə təmin edib.

Qeyd edək ki, Mais Hüseynli 1998-ci ildə Lənkəran rayonunun Liman şəhərində anadan olub. O, Vətən müharibəsində Füzuli, Cəbrayıl, Qubadlı rayonlarının azad olunmasında qəhrəmanlıq və şücaət göstərərək ağır qəlpə yaraları alıb.

Mais Hüseynli Azərbaycan Respublikası Prezidentinin müvafiq sərəncamları ilə “Cəsur döyüşçü”, “Cəbrayılın azad olunmasına görə” medalları ilə təltif edilib.