Beyləqan, 6 iyun, Aydın Yavərzadə, AZƏRTAC

Beyləqanda Vətən müharibəsi şəhidi Teymurov Mansur Elnur oğlunun xatirəsi anılıb. Şəhidin məzarı ziyarət olunub, ruhuna dualar oxunub.

AZƏRTAC-ın bölgə müxbiri xəbər verir ki, şəhid Teymurov Mansur Elnur oğlunun anım günündə ailəsi ilə birlikdə Beyləqan Rayon İcra Hakimiyyətinin nümayəndələri, qazi və veteranlar, döyüş yoldaşları, şəhid ailələri, təhsil işçiləri və məktəb kollektivi iştirak edib. Əvvəlcə şəhidin məzarı ziyarət edilib, Vətən uğrunda canlarını fəda edən igidlərin ruhuna dualar oxunub. Çıxış edənlər Mansurun Vətənə olan sevgisindən və keçdiyi döyüş yolundan söhbət açıblar. Bildirilib ki, Teymurov Mansur Elnur oğlu 1999-cu il iyunun 5-də Beyləqanın İkinci Şahsevən kəndində dünyaya göz açıb. Uşaq yaşlarından Vətənə məhəbbət bəsləyən Mansur hərbçi olmaq arzusu ilə yaşayıb. 2017-ci ildə həqiqi hərbi xidmətə də ruh yüksəkliyi ilə yollanıb və Günnüt əməliyyatında fəal iştirak etdiyinə görə Müdafiə Nazirliyi tərəfindən fəxri fərmanla təltif olunub. Xidmətini xüsusi fərqlənmə ilə başa vurub, müddətdən artıq qulluqçu kimi Vətənin keşiyində dayanıb. Mansur Vətən müharibəsi başlayan ilk gündən ön cəbhədə yer alıb. Füzuli, Cəbrayıl, Zəngilan, Qubadlı və Xocavənd istiqamətlərində gedən döyüşlərin fəal iştirakçısı olub. Mansur bir çox uğurlu tapşırıqların yerinə yetirilməsində xidməti ilə fərqlənib. Oktyabrın 18-də Xocavənd istiqamətində gedən gərgin döyüşlər zamanı şəhidlik zirvəsinə ucalıb.

Ölümündən sonra "Vətən uğrunda", "Cəsur döyüşçü", "Füzulinin azad olunmasına görə", "Cəbrayılın azad olunmasına görə", "Qubadlının azad olunmasına görə", "Xocavəndin azad olunmasına görə" medalları ilə təltif edilib.