ELM VƏ TƏHSİL
Vətən müharibəsi şəhidinin əşyaları Tarix Muzeyinə təhvil verilib
Bakı, 13 fevral, AZƏRTAC
Milli Azərbaycan Tarixi Muzeyinə Vətən müharibəsi şəhidi Rufiz Budaqovun şəxsi əşyaları təhvil verilib.
Bu barədə AZƏRTAC-a muzeydən məlumat verilib. Bildirilib ki, şəhidin şəxsi əşyaları muzeyə Elmi ekspozisiya və sərgilərin təşkili şöbəsinin əməkdaşı Ramiyə İsmayılova vasitəsilə təqdim edilib.
Rufiz Budaqov 1977-ci ildə Naxçıvan Muxtar Respublikası Ordubad rayonunun Tivi kəndində anadan olub. 1998-2004-cü illərdə Azərbaycan Silahlı Qüvvələrində tank komandiri vəzifəsində xidmət edib. Döyüşdə, ictimai-siyasi hazırlıqda, hərbi xidmətdə qazandığı nailiyyətlərə görə Fəxri fərmanla, habelə “Qüsursuz xidmətə görə” 2-ci və 3-cü dərəcəli medalla, “Azərbaycan Ordusunun 100 illiyi (1918-2018)” yubiley medalı ilə təltif edilib.
O, 2016-cı ildə Aprel döyüşlərinin iştirakçısı idi. 2020-ci il sentyabrın 29-da Vətən müharibəsində şəhid olub. Şəhid R.Budaqov II Fəxri xiyabanda dəfn edilib. Azərbaycan Prezidenti İlham Əliyevin sərəncamlarına əsasən “Qarabağ” ordeni və “Vətən uğrunda” medalı ilə təltif olunub.