Bakı, 26 iyun, AZƏRTAC

Azərbaycan Respublikası Silahlı Qüvvələrinin şərəfli tarixi xalqımızın ümummilli lideri Heydər Əliyevin adı ilə bilavasitə bağlıdır. Müasir Azərbaycan Ordusunun qurulması, inkişafı və möhkəmlənməsi ulu öndər Heydər Əliyevin yorulmaz fəaliyyətinin, dövlətçilik təfəkkürünün, siyasi uzaqgörənliyinin və təşkilatçılıq qabiliyyətinin məntiqi nəticəsidir. Müstəqil Azərbaycanın Silahlı Qüvvələrinin yaranması barədə qanun 1991-ci ilin sonunda qəbul edilsə də, real olaraq nizami ordu quruculuğuna 1993-cü ilin ortalarından başlandı.

Bu fikirləri hərbi ekspert Ədalət Verdiyev AZƏRTAC-a açıqlamasında deyib.

O bildirib ki, ümummilli lider Heydər Əliyevin 1993-cü ildə siyasi hakimiyyətə qayıdışından sonra Ordumuza milli qüvvələr rəhbərliyə gətirildi və köklü dəyişikliklər həyata keçirildi. Vahid komandanlıq prinsipi tətbiq edilməyə başlandı. Ordunun təminatı yaxşılaşdırıldı, onun mənəvi-psixoloji hazırlığına, döyüş ruhunun yüksəldilməsinə, hərbi vətənpərvərlik işinin gücləndirilməsinə ciddi diqqət yetirildi. Nəticədə 1993-cü ilin sonundan başlayaraq, Azərbaycan Ordusu Ermənistana qarşı mütəşəkkil müqavimət göstərməyə başladı. Horadiz əməliyyatları ilə başlayan Azərbaycan Ordusunun uğurları Vətən müharibəsinə və ondan sonrakı dövrədək davam etməkdədir. Ordumuzun güc və potensialının artırılması üçün mövcud olan hərbi tədris müəssisələrinin yenidən qurulması, Silahlı Qüvvələrin Hərbi Akademiyasının yaradılması, Xüsusi Təyinatlı Qüvvələrin formalaşdırılması mühüm əhəmiyyət kəsb etdi.

Hərbi ekspert qeyd edib ki, Prezident, Ali Baş Komandan İlham Əliyevin rəhbərliyi ilə güclü dövlət quruculuğu strategiyasının uğurla reallaşdırılması, iqtisadi potensialın və böyük maliyyə imkanlarının yaradılması müasir ordu quruculuğu və hərbi məsələlərin yüksək səviyyədə həllinə imkan yaratdı. Bu məqsədlə hər il dövlət büdcəsindən müdafiə xərclərinə böyük vəsait ayrıldı. Ölkənin müdafiə sənayesi yaradıldı, ordu ən müasir silahlarla təchiz edildi. Eyni zamanda, ölkəmizin hərbi sahədə əməkdaşlığı genişləndirildi. Nəticədə Azərbaycan Ordusu dünyanın ən güclü orduları sırasına daxil oldu.

Sonunda isə bu Azərbaycan Silahlı Qüvvələrinin inkişafı və müasir silah sistemləri ilə təchizatı əvvəlcə Aprel döyüşləri, sonra isə Günnüt və Vətən müharibəsi zamanı bayrağımızın azad olunmuş ərazilərdə dalğalanması ilə nəticələndi. İkinci Qarabağ müharibəsində Qələbəni şərtləndirən amillər iqtisadi güc, qüdrətli ordu, milli birlik, beynəlxalq səviyyədə uğurlar idi. Bütün bunları təmin və təşkil edən, resursları vahid amal uğrunda səfərbər etməyi bacaran Prezident İlham Əliyev kimi liderin olmasıdır.

Vurğulanıb ki, həyata keçirilən mühüm ordu quruculuğu tədbirləri nəticəsində ordumuz son yüz ildə ilk dəfə Ermənistanı darmadağın etdi. Azərbaycan əsgəri ilk dəfə düşməni diz çökdürüb onun başına “Dəmir yumruq” endirdi. Nəticədə qəhrəman Azərbaycan əsgəri 30 illik işğalı cəmi 44 gündə Qələbə ilə əvəz etdi. Bunun nəticəsində hazırda Qarabağda üçrəngli Azərbaycan bayrağı dalğalanmaqdadır.

Azərbaycanın hərbi qüdrətinin yüksəlməsi, Vətən müharibəsinin tarixi əhəmiyyəti həm də ondan ibarətdir ki, xalq ordusuna inanırdı. Azərbaycan hərbçisi qarşısına qoyulan bütün döyüş tapşırıqlarını şərəflə, dəqiqliklə yerinə yetirdi. Müharibə dövründə dövlətimizin başçısının böyük sərkərdəliyi ilə Azərbaycan Ordusu yeni əsrin müharibəsini aparmaqla öz tarixi missiyasını uğurla reallaşdırdı və ölkəmizin ərazi bütövlüyünü təmin etdi.

Ə.Verdiyev diqqətə çatdırıb ki, Vətən müharibəsindən sonrakı dövrdə Azərbaycan Ordusunun daha da gücləndirilməsi istiqamətində addımlar atıldı, Komando briqadaları yaradıldı. Hazırda işğaldan azad olunmuş ərazilərdə Azərbaycanın Silahlı Qüvvələrinin müasir standartlara uyğun hərbi infrastrukturu yaradılır. Şəxsi heyətin həyat və məişət şəraitinin yaxşılaşdırılması fasiləsiz davam edir. Ordumuzun Vətən müharibəsində sərf etdiyi silah və sursatlar daha müasiri ilə əvəz edilir və ciddi qoşun növləri yaradılır. Bunların arasında Quru Qoşunların, əlavə hərbi birliklərin və Komando briqadaların yaradılmasını nümunə göstərmək olar. Azərbaycan ilə Türkiyə arasında imzalanan tarixi Şuşa Bəyannaməsi isə Ordumuzun döyüş qalibiyyətinə müsbət təsir etməkdədir.

Ümumiyyətlə, rəşadətli Ordumuzun Ermənistan üzərində qələbəsini təmin edən əsas amillər Azərbaycan Silahlı Qüvvələrində xidmət edən şəxsi heyətin fiziki imkanları, peşəkarlığı, vətənpərvərliyi və fədakarlığıdır. Tarixi Qələbəmizin memarı Prezident, Silahlı Qüvvələrin Müzəffər Ali Baş Komandanı İlham Əliyev, icraçısı Azərbaycan Silahlı Qüvvələri, dəstəkçisi isə Azərbaycan xalqı olub.

“Yaranmasının 104 illiyini qeyd etdiyimiz Silahlı Qüvvələrimizin şəxsi heyəti Ermənistan üzərində Qələbənin qazanılmasında əsas rol oynadı. Bu şanlı Qələbədə Xüsusi Təyinatlı Qüvvələrimizin rolunu xüsusi qeyd etməliyik. Bu Zəfər xalqımızın indiki və gələcək nəsillərinin yaddaşında daim iftixar mənbəyi olaraq yaşayacaq. Bu Qələbə sevincini bizə yaşatmaq üçün əlindən gələni edən, bu yolda həyatını və sağlamlığını Vətənə fəda edən Silahlı Qüvvələrimizlə qürur duyuruq. Silahlı Qüvvələrimiz bizim qurur mənbəyimiz, hər birimizin iftixar mənbəyidir”, - deyə hərbi ekspert söyləyib.