CƏMİYYƏT
Vətən müharibəsində şanlı Zəfərin qazanılmasının əsasında Azərbaycan Ordusunun əsgər və zabitlərinin misilsiz şücaəti dayanır
Bakı, 28 sentyabr, AZƏRTAC
Azərbaycan Silahlı Qüvvələri otuz il davam edən erməni işğalına cəmi 44 gündə son qoydu. Bu günlər ərzində baş verən hadisələrin xronoloji ardıcıllığına diqqət yetirsək, möhtəşəm Zəfərin qazanılmasının əsasında Azərbaycan Ordusunun əsgər və zabitlərinin misilsiz şücaəti dayanır.
Bunu hərbi ekspert Ədalət Verdiyev AZƏRTAC-a müsahibəsində deyib.
Hərbi ekspert xatırladıb ki, keçən ilin iyununda baş verən Tovuz təxribatlarından az sonra Ermənistan silahlı qüvvələri daha genişmiqyaslı təxribatlar törədərək cəbhəboyu zonadakı mövqelərimizi və yaşayış məntəqələrimizi intensiv şəkildə atəşə tutmağa başladı. Azərbaycan artıq danışıqlar prosesinin mənasız və vaxt itkisi olduğunu anlayırdı. Artıq məlum idi ki, işğalçı Ermənistan nəinki torpaqlarımızı tərk etməyə hazırlaşmır, əksinə, Ermənistanın müdafiə naziri David Tonoyanın irəli sürdüyü “yeni ərazilər uğrunda yeni müharibə” prinsipini reallaşdırmaq niyyəti güdür. Biz Vətən müharibəsinin ilk günlərində Ermənistanın bu çirkin niyyətini həyata keçirməyə çalışmasının şahidi olduq. Azərbaycan BMT Nizamnaməsində əksini tapan hər bir dövlətin özünümüdafiə hüququndan istifadə edərək Ermənistan ordusunun aktiv fəaliyyətinin qarşısını almaq, müdafiə rayonlarının və mülki əhalinin təhlükəsizliyini təmin etmək məqsədilə sürətli əks-hücum əməliyyatına başladı. Sonradan “Dəmir yumruq” əməliyyatı kimi tarixə düşən əməliyyatların ilk saatında Ermənistan ordusunun uzun illər ərzində möhkəmləndirdiyi çoxqatlı müdafiə sədləri bir neçə saat ərzində yarıldı. Bundan sonra isə ordumuzun hücum tempi kifayət qədər yüksəldi.
Ədalət Verdiyev deyib: “Vətən müharibəsindəki Qələbə Ermənistanın işğalçılıq siyasəti üzərində qurulan dövlətçilik sütunlarını yerlə-yeksan etdi. Məhz bu Zəfəri bizə qazandıran şəhidlərimizin qəhrəmanlığı sayəsində Ermənistanın siyasi-hərbi rəhbərliyinin onilliklər boyu yaradığı miflər darmadağın oldu. Yüzlərlə zirehli və digər texnika, artilleriya vasitələri, raket sistemləri və digər silah-sursatını döyüş meydanında atıb qaçan Ermənistan ordusu hazırda XXI əsrin ən fərari ordusudur. Nəticə etibarilə əzmkarlıqla döyüşən ordumuzun sayəsində Ermənistan çox dərin siyasi, iqtisadi, hərbi, demoqrafik böhran günlərini yaşayır. Azərbaycan isə artıq işğaldan azad olunan ərazilərin bərpasını müxtəlif istiqamətlərdə və paralel həyata keçirir. Silahlı Qüvvələrimiz müharibə başa çatandan sonra da Müzəffər Ali Baş Komandan İlham Əliyevin rəhbərliyi ilə hər gün uğurlara imza atmaqda davam edir.
Vətən müharibəsində Qələbə uğrunda Azərbaycan Ordusunun 2907 şəhid verdiyini və 7 hərbçinin itkin düşdüyünü xatırladan hərbi ekspert bildirib: “Düşmən ordusunun mövqelərinin daha yüksək ərazilərdə yerləşməsi, uzun illər ərzində bu mövqelərin möhkəmləndirilməsi, keçilməsi çətin olan çoxqatlı istehkamların və müdafiə xəttinin yaradılması, dağlıq ərazilərdə ağır texnikalarımızın hərəkətinin çətinliyi, iqlim şəraitinin aviasiya vasitələrinin və pilotsuz uçuş aparatlarının tətbiqi üçün əlverişsiz olması əslində itkilərimizin düşmənin itkisindən azı iki-üç dəfə çox ola biləcəyi ehtimalını yaradırdı. Lakin Ordumuzun mükəmməl planlaşdırılan döyüş əməliyyatları və daha çox müasir texnologiyalardan istifadə etməsi itkilərimizin sayını minimuma endirdi. Qələbə qurbansız olmaz. Ötən otuz il ərzində çoxlu şəhidlər vermişik. Amma bu dəfə müqəddəs şəhidlərimizin qanı ilə boyanan üçrəngli bayrağımız artıq Qarabağin ürəyi olan Şuşada əbədi dalğalanacaq. Bu möhtəşəm Zəfərin qazanılmasına görə ilk növbədə şəhidlərimizə borcluyuq. Bütün sadalanan amilləri nəzərə alan Ali Baş Komandan İlham Əliyev İkinci Qarabağ müharibəsi başa çatdıqdan, yəni, dekabrın 1-də sonuncu Azərbaycan rayonu – Laçın rayonunun düşməndən azad edilməsindən bir gün sonra - dekabrın 2-də Vətən müharibəsinin başladığı sentyabrın 27-nin ölkəmizdə Anım Günü kimi qeyd olunması haqqında Sərəncam imzaladı”.
Ekspert əlavə edib ki, Vətən müharibəsi zamanı 44 gün ərzində mənfur düşmənlə qəhrəmancasına döyüşərək şəhid olanların hamısı bizim baş tacımızdır. Vətən müharibəsində qanı-canı bahasına ərazilərimizi düşməndən təmizləməklə adlarını müasir Azərbaycan tarixinə qızıl hərflərlə yazdıran şəhidlərimizin sayəsində artıq xalqımız dünyada azsaylı qalib xalqlar sırasında yer almaqdadır. Məhz qəhrəmanlarımızın sayəsində işğaldan azad edilən torpaqlarımızın hər guşəsində hazırda Azərbaycan bayrağı dalğalanır. Azad edilən rayonlarımızda azanlar oxunur. Həmin ərazilərdə yerləşən hərbi hissələrimizdə Azərbaycanın Dövlət Himni səslənir. Müzəffər Ali Baş Komandan İlham Əliyevin “Bu Qələbənin birinci qəhrəmanı Azərbaycan əsgəridir, Azərbaycan zabitidir və hər kəs bunu bilməlidir” fikri hər birimiz üçün meyar olmalıdır. Vətən uğrunda canından keçənlərin xatirəsi daim əziz tutulmalıdır. Şəhid ailələrini və onların övladlarını hər birimiz müqəddəs əmanət kimi qorumağa borcluyuq. Şəhidlərimizin müqəddəs ruhu daim qəlbimizdə yaşamalıdır.