CƏMİYYƏT
Vətən müharibəsindəki Qələbə müasir tariximizin ən şərəfli səhifəsidir
İşğaldan azad edilən ərazilərimiz tezliklə yenidən qurulacaq və doğma yurdlarından köçkün düşmüş insanlar öz el-obalarına qayıdacaqlar
Bakı, 18 yanvar, AZƏRTAC
Tarixi qəhrəmanlıq salnamələri ilə zəngin olan Azərbaycan xalqı 44 günlük Vətən müharibəsini də qalibiyyətlə başa vuraraq zəngin irsinə yeni şərəfli səhifə yazdı. Bu möhtəşəm Qələbə Prezident İlham Əliyevin yenilməz qətiyyətini, Ali Baş Komandanı olduğu Ordumuzun qüdrətini və xalqımızın milli birliyini bütün dünyaya nümayiş etdirdi. Eyni zamanda, bu müharibə xalqımızın milli həmrəyliyinin, öz haqqı uğrunda mübarizə aparmaq əzminin nümayişi oldu.
Bu fikirlər Ağdam rayon 33 nömrəli tam orta məktəbin direktoru Nəsibə Hüseynovanın “Vətən müharibəsindəki Qələbə müasir tariximizin ən şərəfli səhifəsidir” adlı məqaləsində yer alıb.
Sentyabrın 27-dən başlanan döyüş əməliyyatları noyabrın 10-dək davam etdi. Suqovuşanın, Cəbrayılın, Hadrutun, Füzulinin, Zəngilanın, Qubadlının ardınca noyabrın 8-də Qarabağın tacı olan Şuşa şəhərinin azad edilməsi isə Vətən müharibəsinin ən böyük hadisəsi oldu. Məhz bundan sonra işğalçı Ermənistanın siyasi-hərbi rəhbərliyi müharibədə məğlub olduqlarını dərk etdi və Prezident İlham Əliyevin şərtlərinə əməl edərək kapitulyasiya aktına imza atmağa məcbur oldu.
Azərbaycan Prezidenti, Müzəffər Ali Baş Komandan İlham Əliyev noyabrın 9-dan 10-na keçən gecə xalqa müraciət edərək şanlı Qələbəmizin - Ermənistanın təslim olmasının müjdəsini verdi. Beləliklə 30 il davam edən işğala son qoyuldu. Müraciətdən sonra insanlar bu tarixi zəfərin sevincini paylaşmaq üçün küçələrə axışdılar. Bu Qələbə ümumxalq sevinci, böyük coşqu ilə qarşılandı. Əllərində ay-ulduzlu bayraqlar dalğalandıran, Müzəffər Ali Baş Komandanımızın portretlərini tutan insanlar rəşadətli Ordumuza, qalib əsgərimizə minnətdarlıqlarını ifadə etdilər.
Bəli, rəşadətli Ordumuz 30 ilə yaxın idi işğal altında olan torpaqlarımızı azad edərək hər bir azərbaycanlının böyük səbirsizliklə gözlədiyi bir Qələbənin sevincini xalqımıza yaşatdı. Artıq Dağlıq Qarabağ problemi yoxdur və Azərbaycanın bu tarixi ərazisində ikinci erməni dövləti yaratmaq iddialarına birdəfəlik son qoyulub.
İşğaldan azad olunmuş Azərbaycan ərazilərindəki vəziyyət başqa bir həqiqəti də ortaya qoydu. Bir daha sübut olundu ki, Ermənistan yalnız işğalçı və terrorçu deyil, həm də vandal dövlətdir. 27 illik işğaldan sonra azad edilən Ağdamda, Füzulidə, Cəbrayılda, Zəngilanda, Qubadlıda ortaya çıxan mənzərə başqa cür düşünməyə əsas vermir. Məsələn, Ağdamda yalnız qismən dağıdılmış bir məscid qalıb ki, onu da sadəcə həmin ərazidə döyüşlər baş verərsə artilleriyaya hücumunun dəqiq oriyentirlərini verə bilmək üçün saxlayıblar. Bu barədə danışan Prezident İlham Əliyev bütün bunların hərbi cinayət olduğunu bildirib: “Keçmiş Ağdam şəhərində, ondan qalan ərazidə səfərdə olmuş xarici jurnalistlər onu “Qafqazın Xirosiması” adlandırırlar. Mən hesab edirəm ki, bu, Xirosimadan da pisdir. Ona görə ki, Xirosima nüvə faciəsi, atom zərbəsi idi. Lakin oradan vandallar və barbarlar dəstəsi keçməmişdi. Bizə gəldikdə isə Ağdam şəhəri işğal ediləndən sonra dağıdılıb. Füzuli şəhəri də onun kimi məqsədyönlü şəkildə dağıdılıb. Biz onu azad edəndə mən şəhərdəki evlərin birinin üzərində Azərbaycan bayrağı qaldırılmasını əmr edəndə dedilər ki, belə bina yoxdur, minlərlə, on minlərlə insanın yaşadığı böyük şəhərdə bircə bina da qalmayıb. Hamısı yerlə-yeksan edilib. Bu, hərbi cinayətdir”.
Hazırda qarşıda duran əsas vəzifələrdən biri işğal dövründə Ermənistanın Azərbaycana vurduğu zərərin hesablanması və işğalçı barədə beynəlxalq hüququq tələblərinə uyğun ölçü götürülməsidir. Ermənistanın təcavüzü nəticəsində Azərbaycanın işğal olunmuş ərazilərində törədilmiş dağıntılar 30 illik proses çərçivəsində artıq ayrıca qiymətləndirilir. Əvvəllər bu məsələni qaldıran zaman həmin ərazilərə giriş imkanı olmayıb, real faktlar əsasında bunu ortaya qoymaq çətin olub. İndi isə ərazilərimiz işğaldan azad edilib. Prezident İlham Əliyevin dediyi kimi, işğal dövründə Azərbaycana vurulan ziyan hesablanacaq və Ermənistana qarşı təzminat davası açılacaq. Doğma yurd yerlərimizi viran qoyan, dağıdan, yandıran düşmən bunların hamısının cavabını verəcək.
Qarşıda duran əsas vəzifələrdən biri həm də işğaldan azad olunmuş ərazilərin bərpası və yenidən qurulması, Cocuq Mərcanlıda elan olunmuş “Böyük Qayıdış” proqramının həyata keçirilməsidir. Bir neçə gün əvvəl 2020-ci ilin yekunlarına həsr olunmuş videoformatda müşavirədə Prezident İlham Əliyev bildirdi ki, biz Qarabağ bölgəsində cənnət yaradacağıq. O cümlədən Şuşaya səfər edərkən də Prezident İlham Əliyev xüsusilə vurğuladı ki, işğaldan azad olunmuş ərazilər tezliklə yenidən qurulacaq.
Azad olunmuş ərazilərin bərpasına və yenidən qurulmasına isə artıq başlanılıb. Bu istiqamətdə ilk addımlar isə yolların bərpasıdır. Artıq Tərtər rayonunun işğaldan azad olunmuş Suqovuşan və Talış kəndlərinə yeni yolun çəkilişi başa çatmaq üzrədir. Bərdə-Ağdam dəmir yolu xəttinin çəkilişi də artıq başlayıb. Prezident İlham Əliyevin Şuşaya səfəri zamanı Füzuli-Şuşa avtomobil yolunun, o cümlədən beynəlxalq hava limanının təməli qoyuldu. O cümlədən işğaldan azad edilmiş ərazilərin elektrik enerjisi ilə təminatında son iki ayda xeyli iş görülüb və onların bir qisminə enerjinin verilişi təmin edilib.
Qeyd edək ki, 2021-ci ilin dövlət büdcəsində işğaldan azad olunmuş ərazilərdə aparılacaq bərpa və yenidənqurma işlərinə 2,2 milyard manat vəsait ayrılıb. Bu, onu göstərir ki, il ərzində Qarabağ bölgəsinin yenidən qurulması və 30 ilə yaxındır ki, məcburi köçkün olan insanların öz doğma yurdlarına qayıdışını təmin edə bilmək üçün böyük işlər görüləcək.
Yanvarın 4-də Prezident İlham Əliyev “Qarabağ Dirçəliş Fondu” publik hüquqi şəxsin yaradılması haqqında Fərman imzalayıb. Fond Azərbaycanın işğaldan azad edilmiş ərazilərinin bərpası və yenidən qurulması, habelə dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən tədbirlərə maliyyə dəstəyinin göstərilməsini, sərmayələrin cəlb olunmasını, bu sahədə dövlət-özəl tərəfdaşlığının inkişafını təmin edəcək. Əlbəttə, işğaldan azad edilmiş ərazilərdə quruculuq işlərinin aparılması istiqamətində hər bir şəxsin göstərəcəyi dəstək tarixi qələbəmizə, qüdrətli və güclü Azərbaycan naminə milli birlik ideyasına, suveren və təhlükəsiz yaşamaq məqsədimizə mühüm töhfə olacaq. Bu baxımdan “Qarabağ Dirçəliş Fondu” publik hüquqi şəxsin yaradılması “Böyük Qayıdış” proqramının daha sürətlə həyata keçirilməsinə təkan verəcək.
Azərbaycan xalqının ərazilərini Ermənistan işğalından azad edərək, tarixinin yaddaqalan və şanlı dövrünə qədəm qoydu. Bu Qələbənin qazandığımız kimi azad etdiyimiz ərazilərimiz də tezliklə bərpa olunacaq, yenidən qurulacaq. Otuz ilə yaxın bir müddət ərzində erməni qəsbkarları tərəfindən maddi və mədəni sərvətləri talan edilmiş ərazilərimizin yenidən həyata qaytarılması respublikamızın növbəti nailiyyətlərindən biri kimi tarixə düşəcək.
Hazırda Ağdamdan olan məcburi köçkünlər də səbirsizliklə doğma yurdlarına qayıdacaqları günü gözləyirlər. Azərbaycan dövləti Qarabağı yenidən qurmaqla doğma el-obalarına qayıdacaq insanların layiqli yaşayışını və məşğulluğunu ən yüksək səviyyədə təmin edəcək. İşğaldan azad olunmuş bütün şəhər və kəndlərimizdə həyat yenidən öz axarına dönəcək, onların əvvəlki şöhrəti bərpa olunacaq.