SİYASƏT
Vyanada Ermənistanın təcavüzkar siyasətinə qarşı etiraz VİDEO
Vyana, 7 aprel, AZƏRTAC
Avstriyadakı Azərbaycan icmasının nümayəndələri son günlərdə Ermənistan-Azərbaycan ordularının təmas xəttində baş vermiş gərginliklə əlaqədar aprelin 7-də ATƏT-in bu şəhərdə yerləşən katibliyi qarşısında etiraz aksiyası keçiriblər.
Aksiya iştirakçıları “Qarabağ Azərbaycandır”, “Minsk qrupu – təcavüzkara göz yummayın!”, “Xocalı faciəsinin təkrarlanmasını istəmirik”, “Ermənistan, işğalı dayandır!”, “Qarabağ Azərbaycanın beynəlxalq hüquqla tanınan ərazisidir” şüarları səsləndiriblər. Diaspor nümayəndələri ətrafında Prezident Administrasiyası, Federal Kansler Aparatı və ATƏT Katibliyinin yerləşdiyi meydanda Azərbaycanın dövlət himnini səsləndiriblər. Azərbaycan və türk diasporlarının nümayəndələri aksiya zamanı Ermənistan ordusu tərəfindən cəbhə boyunca atəşkəs rejiminin və beynəlxalq hüquq normalarının kobud şəkildə pozulmasını, davamlı olaraq təxribatlar törətməsini və dinc əhalinin qətlə yetirilməsini qətiyyətlə pisləyiblər.
Avstriya Azərbaycan Mədəniyyət və İş Adamları Dərnəyinin sədri Yardım Günəş Azərbaycanın 20 ildən artıqdır ki, sülh yolu ilə işğal altındakı torpaqlarının azad olunmasına çalışdığını söyləyib. Beynəlxalq ictimaiyyətdən, xüsusilə də danışıqlar prosesində vasitəçilik edən Minsk qrupundan heç bir təzyiq görməyən və cəzasızlıq şəraitindən yararlanan Ermənistan isə nəinki işğalı davam etdirir, mütəmadi olaraq təxribatçı əməllər törədir, günahsız insanları qətlə yetirir. Qoşunların təmas xəttində baş vermiş son gərginliyə diqqəti yönəldən və artıq Azərbaycan insanının səbir kasasının daşdığını bildirən Y.Günəş ATƏT başda olmaqla, bütün beynəlxalq təşkilatların Ermənistanı konkret nəticələrlə yekunlaşmalı olan sülh danışıqlarına məcbur etməyə, münaqişəyə son qoymaq üçün ciddi addımlar atmağa və məcburi köçkünlərin qədim Azərbaycan torpağı olan Qarabağa geri dönməsi üçün şərait yaratmağa çağırıb.
Aksiya zamanı Azərbaycan icması adından alman və ingilis dillərində bəyanat səsləndirilib. Bəyanatda bildirilir ki, Avstriyadakı Azərbaycan icması və vətəndaş cəmiyyəti təşkilatları Ermənistan ordusunun son günlərdə törətdiyi təxribatları qətiyyətlə pisləyir. Cəbhə xəttinə yaxın yerləşən kənd və qəsəbələrin Ermənistan ordusu tərəfindən ağır silahlardan atəşə məruz qalması nəticəsində çoxlu dağıntılar baş verib, mülki əhali arasında çoxlu sayda ölən və yaralananlar var. Ermənistan hərbi birləşmələrinin bu təxribatı beynəlxalq humanitar hüququn ciddi şəkildə pozulmasıdır və eyni zamanda, ağır müharibə cinayətidir.
Daha sonra qeyd edilib ki, Azərbaycanın dinc əhalisinə qarşı Ermənistan silahlı qüvvələrinin son hücumları bir daha etnik nifrətin bir elementi olmaqla, Dağlıq Qarabağ və digər işğal olunmuş ərazilərdən bütün azərbaycanlı əhalinin etnik təmizlənməsinin göstəricisidir. Yüksək səviyyədə təbliğ edilən etnik üstünlük siyasətinin nəticəsi olaraq, bir milyondan artıq azərbaycanlı öz tarixi torpaqlarından didərgin salınıb və onlar bu gün qaçqın və məcburi köçkün həyatı yaşamağa məcburdurlar.
Diqqətə çatdırılıb ki, Ermənistan beynəlxalq hüquqa zidd olaraq öz öhdəliklərini pozur, eləcə də Azərbaycanın işğal olunmuş ərazilərindən silahlı qüvvələrini çıxarmaqla bağlı beynəlxalq ictimaiyyətin çağırışlarına məhəl qoymur. “Biz Avstriyada yaşayan Azərbaycan icması olaraq ATƏT və onun Minsk qrupundan Azərbaycanın mülki əhalisinə qarşı Ermənistan ordusunun hücumlara son verməsini və Ermənistan-Azərbaycan münaqişəsinin erkən həlli üçün danışıqların aparılmasını tələb edirik. Biz ATƏT-in Minsk qrupundan münaqişənin tezliklə həllini təmin etməsini və yüz minlərlə məcburi köçkünün öz torpaqlarına geri dönməsini, eləcə də Minsk qrupunun həmsədrlərinin Ermənistanın qarşısında prinsipial mövqe nümayiş etdirməsini tələb edirik”, - deyə aksiya iştirakçıları bildiriblər.
Tədbir iştirakçılar meydanda hərəkət edən turistlərə və yerli sakinlərə Ermənistan-Azərbaycan, Dağlıq Qarabağ münaqişəsi barədə məlumat verib, onlara informativ materiallar təqdim ediblər.
Elgün Niftəliyev
AZƏRTAC-ın xüsusi müxbiri
Vyana