Vyana, 12 may, AZƏRTAC

Vyana şəhərinin mərkəzində yerləşən Aşağı Avstriya Sarayında Azərbaycan Xalq Cümhuriyyətinin və Azərbaycan Silahlı Qüvvələrinin yaradılmasının 105, Ümummilli Lider Heydər Əliyevin anadan olmasının 100 illik yubileyi münasibətilə rəsmi qəbul təşkil edilib.

AZƏRTAC xəbər verir ki, qəbulda Vyanada akkreditə olunmuş diplomatik korpusun, beynəlxalq təşkilatların təmsilçiləri, Avstriyanın dövlət və hökumət nümayəndələri, iqtisadi dairələrin, media və yerli ictimaiyyətin üzvləri iştirak ediblər.

Tədbir Azərbaycanın və Avstriyanın Dövlət himnlərinin səsləndirilməsi ilə başlayıb.

Azərbaycanın Avstriyadakı səfiri Rövşən Sadıqbəyli tədbirdə çıxış edərək Azərbaycan Respublikasının 105-ci ildönümünün bu il Ümummilli Lider Heydər Əliyevin anadan olmasının 100-cü ildönümü ilə eyni dövrdə qeyd olunduğu bildirib. Diqqətə çatdırıb ki, 105 il əvvəl - 1918-ci il mayın 28-də müsəlman Şərqində ilk demokratik parlamentli respublika – Azərbaycan Xalq Cümhuriyyəti elan olunub. Ölkənin bütün vətəndaşlarına eyni hüquqlar verməklə irqi, etnik, dini və sosial bərabərsizlikləri aradan qaldıran Cümhuriyyətin siyasəti öz dövrünə görə inqilabi xarakter daşıyıb. Şərqdə ilk dəfə olaraq Azərbaycanda qadınlara səsvermə hüququ verilib. Cümhuriyyətin qanun və sərəncamlarında dövlət institutlarının qurulması, ölkənin müstəqilliyinin və ərazi bütövlüyünün qorunması, insan hüquq və əsas azadlıqlarının təmin edilməsi, məhkəmə-hüquq sisteminə əsaslanan demokratik dünyəvi dövlət yaradılması diqqət mərkəzində olub. Təəssüf ki, Azərbaycan Xalq Cümhuriyyəti cəmi 23 ay yaşayıb və bolşeviklərin müdaxiləsi ilə 1920-ci ilin aprelində süqut edib. Bununla belə, onun idealları, dəyərləri və ənənələri azərbaycanlıların gələcək nəsillərinin qəlbində və şüurunda yaşamağa davam edib.

R.Sadıqbəyli bildirib ki, 1991-ci ildə müstəqilliyini bərpa edən Azərbaycan Respublikası özünü Cümhuriyyətin siyasi-hüquqi varisi elan edib. Lakin müstəqilliyin ilk illəri sözün bütün mənalarında Azərbaycan üçün gərgin mübarizə ilə keçib. Belə ki, Azərbaycan ərazilərinin işğalı və silahlı münaqişə, tənəzzül edən iqtisadiyyat və respublikanı dağılmaq həddinə çatdıran daxili hakimiyyət mübarizəsinə məhz 1993-cü ildə son qoyulub. Həmin vaxt xalqın təkidi ilə Heydər Əliyevin hakimiyyətə qayıdışı Azərbaycan tarixində dönüş nöqtəsinin və yeni epoxanın başlanğıc nöqtəsi olub. Müasir Azərbaycan tarixinin hər bir mərhələsi Ulu Öndər Heydər Əliyevin gələcək nəsillərin inkişafın təsir göstərən irsi ilə sıx bağlıdır. Heydər Əliyevin təbirincə desək, Azərbaycan xalqının tarixi nailiyyəti olan Azərbaycan Respublikasının Dövlət müstəqilliyini qorumaq, möhkəmləndirmək və inkişaf etdirmək onun bütün ömrünün məqsədi olub.

Çıxışda, həmçinin diqqətə çatdırılıb ki, Heydər Əliyev siyasətinin əsas hədəfləri arasında həm də bu gün dünyanın ən güclü orduları sırasında yer alan, 2020-ci ildə Azərbaycan Respublikasının suverenliyinin, ərazi bütövlüyünün və birliyinin bərpasında həlledici rol oynayan Azərbaycan Ordusunun inkişafı və təkmilləşdirilməsi də yer alıb. Səfir Azərbaycanın ərazi bütövlüyünün qorunmasında canını fəda etmiş Vətən övladlarının xatirəsinin yaddaşlarda əbədi yaşayacağını və onların daim ehtiramla yad olunacağını bildirib.

Qeyd edilib ki, bu gün Prezident İlham Əliyevin rəhbərliyi ilə Azərbaycan milli maraqlara söykənən siyasət həyata keçirir. Müstəqilliyin Bərpası Günü və Heydər Əliyevin yubileyinin keçirildiyi bu günlərdə yeni postmünaqişə reallıqları yaranır, Azərbaycanın Qarabağ bölgəsində yenidən dinc inkişaf, yenidənqurma və dirçəliş işləri həyata keçirilir. Bu gün Azərbaycan canlı, çoxmillətli və çoxkonfessiyalı cəmiyyəti, çoxşaxəli iqtisadiyyatı və yetkin siyasi sistemi ilə tarixdə heç vaxt olmadığı qədər güclüdür. Azərbaycan regionun ən böyük iqtisadiyyatıdır və öz coğrafiyasında və beynəlxalq arenada mühüm rol oynayır.

Sonra Azərbaycan və Avstriya musiqiçiləri klassik musiqi proqramı ilə çıxış ediblər.

Rəsmi qəbulun keçirildiyi sarayda, həmçinin Heydər Əliyev Fondu tərəfindən hazırlanmış sərgi nümayiş olunub. Sərgidə Ulu Öndər Heydər Əliyevin həyatının müxtəlif dövrlərini, xidməti fəaliyyətini, sovet dövründə və müstəqillik illərində Azərbaycana rəhbərliyi dövrdə gördüyü işləri, keçirdiyi görüşləri, ölkəmizin regionlarına və xaricə səfərlərini, o cümlədən 2000-ci ildə Avstriyaya səfərini əks etdirən fotoşəkillər və məlumatlar nümayiş olunub.

Qəbul ziyafətlə davam edib.

Elgün Niftəli

AZƏRTAC-ın xüsusi müxbiri

Vyana