QAN YADDAŞI
Vyanada Xocalı soyqırımının beynəlxalq müstəvidə tanıdılması və diasporun bu istiqamətdə rolu müzakirə edilib
Vyana, 27 fevral, AZƏRTAC
Xocalı soyqırımının 29-cu ildönümü münasibətilə “Xocalı soyqırımı, onun beynəlxalq müstəvidə tanıdılması və diasporun bu istiqamətdə rolu” mövzusunda videoformatda tədbir keçirilib.
Avstriyada fəaliyyət göstərən Azərbaycan Akademik Birliyinin təşkilatçılığı ilə keçən tədbirdə Azərbaycanın Avstriyadakı səfirliyinin əməkdaşları, Azərbaycan və Türkiyə diaspor təşkilatlarının fəalları, bu ölkədə yaşayan soydaşlarımız iştirak ediblər.
AZƏRTAC xəbər verir ki, tədbirin əvvəlində iştirakçılara Xocalı soyqırımı haqqında məlumat verilib və “Xocalıya ədalət!” beynəlxalq kampaniyası çərçivəsində hazırlanmış “Xocalı nişanəsi” bədii-sənədli qısametrajlı filmi nümayiş olunub.
Azərbaycan Akademik Birliyi, Avstriya-Azərbaycan Mədəniyyət və İş Adamları Dərnəyi və Avstriya Azərbaycanlıları Cəmiyyətinin təmsilçiləri Xocalı soyqırımının tanıdılması istiqamətində indiyədək görülən işlər və qarşıdakı fəaliyyətin təşkili barədə çıxış ediblər.
Azərbaycanın Avstriyadakı səfiri Qalib İsrafilov çıxışında Xocalı soyqırımına beynəlxalq müstəvidə hüquqi qiymətin verilməsi barədə danışıb. Qeyd edib ki, artıq 17 dövlətin milli qanunvericilik orqanı, həmçinin ABŞ-ın 23-dən çox ştatı, İslam Əməkdaşlıq Təşkilatı və Türkdilli Dövlətlərin Əməkdaşlıq Şurası Xocalıda dinc əhalinin soyqırımını pisləyən və bunu insanlıq əleyhinə cinayət aktı kimi dəyərləndirən qətnamə və qərarlar qəbul ediblər. Avstriyanın qonşuluğunda olan Sloveniyanın da bu sırada yer aldığını diqqətə çatdıran Q.İsrafilov Avstriyada soyqırımının tanıdılması, xüsusilə də həm yerli ictimaiyyət, həm də dövlət qurumları və parlamentarilərin məlumatlandırılması barədə danışıb. Qeyd edilib ki, Xocalı soyqırımına beynəlxalq hüquqi qiymətin verilməsi və tanıdılması həm tarixi ədalətin bərpa olunması baxımından önəmlidir, həm də münaqişə tərəfləri arasında münasibətlərin yenidən qurulmasına töhfə verə bilər.
Mövzu ilə bağlı sualların cavablandırılmasından sonra diaspor təmsilçiləri konkret fəaliyyət istiqamətləri, işçi qrupların yaradılması və diaspor qurumları arasında əməkdaşlığın dərinləşdirilməsi ətrafında fikir mübadiləsi aparıblar.
Elgün Niftəli
AZƏRTAC-ın xüsusi müxbiri
Vyana