“Toxumçuluq və tinglik təsərrüfatlarından satılan 1-ci və 2-ci reproduksiyalı toxumlar və tinglərə görə dövlət büdcəsindən təsərrüfatlara subsidiyaların ödənilməsi qaydasının təsdiq edilməsi barədə” Nazirlər Kabinetinin 2007-ci il 25 iyun tarixli qərarının icrası ilə əlaqədar Kənd Təsərrüfatı Nazirliyi Xanlar rayonunda zona seminar-müşavirəsi keçirmişdir.

Xanlar, Yevlax, Samux, Daşkəsən və Goranboy rayonlarının fermer təsərrüfatlarının və “aqrolizinq” rəhbərlərinin, rayon icra hakimiyyəti başçılarının aqrar məsələlər üzrə müavinlərinin, elmi-tədqiqat institutları və elmi idarə rəhbərlərinin iştirakı ilə keçirilən seminar-müşavirəni Xanlar Rayon İcra Hakimiyyətinin başçısı Arif Seyidov açaraq, tədbirin əhəmiyyətindən və ölkədə aqrar sektorun inkişafı istiqamətində aparılan islahatların səmərəsindən danışmış və Azərbaycan Prezidentinin bu sahəyə göstərdiyi diqqət və qayğını qeyd etmişdir.

Sonra kənd təsərrüfatı nazirinin müavini Aslan Aslanov çıxış etmişdir. Nazir müavini əsası ümummilli liderimiz Heydər Əliyev tərəfindən qoyulan aqrar islahatların bu gün daha yüksək templə aparıldığını vurğulamışdır. Hələ birinci dəfə hakimiyyətdə olduğu illərdə Azərbaycanda kənd təsərrüfatının inkişafı naminə böyük işlər görən ümummilli liderimiz Heydər Əliyevin misilsiz xidmətlərindən danışan natiq demişdir ki, bu gün Müstəqil Dövlətlər Birliyi ölkələri arasında ön cərgədə gedən Azərbaycanın qazandığı böyük nailiyyətlər məhz dahi rəhbərin adı və fəaliyyəti ilə bağlıdır.

Kənd təsərrüfatı nazirinin müavini demişdir ki, Azərbaycan Prezidenti İlham Əliyevin aqrar sahənin inkişafına xüsusi diqqət yetirməsi, kəndli-fermer təsərrüfatlarına dövlət tərəfindən tez-tez maliyyə yardımlarının edilməsi ölkədə ərzaq bolluğuna zəmin yaratmış, insanların həyat səviyyəsinin yüksəlməsinə səbəb olmuşdur. Bu yaxınlarda ölkə başçısının Sərəncamına uyğun olaraq Nazirlər Kabinetinin qərarı əsasında toxumçuluq və tinglik təsərrüfatlarından satılan 1-ci və 2-ci reproduksiyalı toxumlara və tinglərə görə təsərrüfatlara dövlət büdcəsindən subsidiyanın verilməsi də bu qayğının bariz nümunəsidir.

Kənd təsərrüfatı məhsulları bolluğu, xüsusilə də etibarlı taxıl ehtiyatının yaradılması üçün aparılan məqsədyönlü tədbirlərdən danışan Aslan Aslanov demişdir ki, hazırda respublikada istənilən qədər taxıl ehtiyatı vardır. Lakin bu gün əsas diqqət gələcək üçün möhkəm taxıl bazasının yaradılmasına yönəldilməlidir ki, bunun da əsası yüksək reproduksiyalı toxumun əldə edilməsindən başlayır. Məhz buna görə də ölkə başçısı keyfiyyətli toxum yetişdirmək üçün hər bir fermerə güzəştlər müəyyənləşdirmişdir. Natiq Nazirlər Kabinetinin müvafiq qərarına aydınlıq gətirərək demişdir ki, həmin qərara əsasən 1-ci reproduksiyalı toxumun hər tonu üçün 100 manat, 2-ci reproduksiyalı toxumun hər tonuna isə 70 manat əlavə vəsait veriləcəkdir. Bundan əlavə, tinglik və bostan toxumçuluğunun inkişafı üçün də güzəştlər müəyyənləşdirilmişdir.

Kənd təsərrüfatı nazirinin müavini Aslan Aslanov seminar-müşavirədə iştirakçıları maraqlandıran məsələlərə də aydınlıq gətirmişdir. Xüsusilə sənədləşmənin vaxtında və düzgün aparılmasının vacibliyini diqqətə çatdıraraq hər bir fermer təsərrüfatı rəhbərinin bu işdə operativliyinin səmərə verəcəyinə əminlik ifadə etmişdir. Bildirmişdir ki, aparılan monitorinqlər nəticəsində bəzi fermerlərin yüksək reproduksiyalı toxum yetişdirməsi, lakin sənədləşdirməni vaxtında aparmadığına görə dövlətin ayırdığı güzəştlərdən yararlana bilməməsi məlum olmuşdur. A.Aslanov demişdir ki, məhz buna görə də Ərazi kənd təsərrüfatı idarəsi bu işdə fermerlərə lazımi kömək göstərməli, onların güzəştlərdən yararlanmasına yardım etməlidir.

Seminar-müşavirədə Ərazi kənd təsərrüfatı idarəsinin rəisi Ziyad Abbasov Nazirlər Kabinetinin müvafiq qərarının icrası istiqamətində görülən işlərdən danışmış, Kənd Təsərrüfatı Nazirliyi yanında yaradılmış ekspert şurasına çıxarılan sənədlərin şəhadətnamə alması üçün müəyyənləşdirilmiş prosedurları müşavirə iştirakçılarının nəzərinə çatdırmışdır.

Seminar-müşavirədə Samux, Goranboy, Daşkəsən rayonlarının və Yevlax şəhər icra hakimiyyəti başçılarının aqrar məsələlər üzrə müavinləri çıxış edərək, təmsil etdikləri bölgədə toxumçuluğun inkişafı istiqamətində həyata keçirilən tədbirlərdən və Nazirlər Kabinetinin müvafiq qərarından irəli gələn vəzifələrin yerinə yetirilməsi üçün görüləcək işlərdən danışmışlar.

Respublika kənd təsərrüfatı nazirinin müavini Aslan Aslanov müşavirəyə yekun vurmuşdur.

Seminar-müşavirənin sonunda uzun illər respublikamızda kənd təsərrüfatının inkişafı sahəsində səmərəli fəaliyyət göstərmiş Rəhim Abbasova 75 illik yubileyi münasibətilə Kənd Təsərrüfatı Nazirliyinin fəxri fərmanı və qiymətli hədiyyəsi təqdim olunmuşdur.