2001-ci ilin noyabrında ölkəmiz üçün çox mühün olan bir hadisə baş verdi. Bakıda dünya azərbaycanlılarının birinci qurultayı keçirildi. Azərbaycan Prezidenti Heydər Əliyevin müdrikcəsinə və uzaqgörənliklə irəli sürdüyü dəyərli təşəbbüs, beləcə, həyata keçdi. Dövlətimizin başçısı respublikanın hüdudlarından kənarda nüfuzlu Azərbaycan diasporu yaradılmasına həmişə xüsusi əhəmiyyət vermişdir. Elə bir diaspor ki, bu və ya digər ölkədə Vətənimizin, soydaşlarımızın mənafeyinin qorunmasına yönəldilmiş siyasətin formalaşdırılmasına kömək göstərmək iqtidarında olan nüfuzlu Azərbaycan lobbisi yaradılması üçün əsas ola bilsin.

Xarici Ölkələrdə Yaşayan Azərbaycanlılarla İş üzrə Dövlət Komitəsinin yaradılması haqqında Prezidentin 2002-ci il 5 iyul tarixli Fərmanı da ölkəmizin ictimai-siyasi həyatında mühüm hadisə oldu. Bu Komitənin vəzifəsi soydaşlarımızı dəstəkləmək və onlara zəruri kömək göstərməkdir. Xaricdə yaşayan həmyerlilərimizlə əlaqələr yaradılmasında “Vətən” cəmiyyəti də əhəmiyyətli rol oynayır.

Taleyin hökmü ilə doğma torpaqdan uzaq düşmüş soydaşlarımızın əksəriyyəti tarixi Vətənlərinə candan bağlı olduqlarını hiss edirlər. “Vətən” cəmiyyəti sədrinin müavini Heydər Məmmədəliyev bizi belə həmyerlilərimizdən biri ilə - Məmmədağa Zərrinnicatla tanış etdi.

O, Azərbaycanı müəyyən səbəblərə görə ötən əsrdə - 1931-ci ildə tərk etmişdir. Həyatda ən böyük arzusu isə 15 gün bundan əvvəl həyata keçdi, Məmmədağa kişi yenidən doğma Bakıya gəldi.

O, 1916-cı ildə dünyaya göz açmışdır. Bakıda orta məktəblərdən birini bitirdikdən sonra ali məktəbə daxil olmuşdur. Lakin totalitar rejimin o dövrdə apardığı və adi hala çevrilən repressiyalar, həbslər Məmmədağa Zərrinnicatın ailəsini qonşu İrana köçməyə məcbur etdi. Burada Məmmədağa ali məktəbi bitirərək kinematoqrafiya ilə məşğul oldu. Lakin qurub-yaratmaq həvəsi üstün gəldi və o, peşəsini dəyişərək, inşaat mühəndisi ixtisasına yiyələndi.

Məmmədağa kişi ömür-gün sirdaşı ilə xoşbəxt həyat svrmüşdür. Onlar üç qeyrətli oğul böyütmüşlər. Böyük oğlu Milad Zərrin azərbaycanlı qızla həyat qurmuşdur və İsveçrədə yaşayır, Noşatel universitetinin professorudur. Ortancıl oğlu Fərhad Zərrin də professordur, ABŞ-da bir neçə nüfuzlu firma və şirkətin məsləhətçisidir. Sonbeşikləri Azad Zərrin hazırda atası ilə birlikdə Toronto şəhərində (Kanada) yaşayır, universitetlərdən birində professordur.

Məmmədağa kişi deyir:

- Hazırda yaşadığım şəhərdə 43 kilometr uzunluğunda bir prospekt var. Bu prospektdə çoxlu etnik azərbaycanlı yaşayır. Biz tez-tez bir yerə toplaşır, ölkəmizin beynəlxalq aləmdəki uğurlarına ürəkdən sevinirik. Xəzər dənizinin Azərbaycan sektorundakı neft yataqlarının işlənilməsinə dair dünyanın ən iri neft şirkətləri ilə bağlanmış “Əsrin müqaviləsi” bütün dünyada, o cümlədən də Kanadada böyük əks-səda doğurmuşdur. Nəhayət, bütün soydaşlarımızın səbirsizliklə gözlədikləri bir hadisə baş verdi – Bakıda dünya azərbaycanlılarının birinci qurultayı keçirildi. Yadımdadır, biz bu əlamətdar hadisəni Torontonun kinoteatrlarından birində bayram kimi qeyd etdik. Bəli, Azərbaycan dünyada öz mövqelərini ardıcıl surətdə möhkəmləndirir. Lakin Vətənimizdə hərc-mərclik və özbaşınalıq hökm sürdüyü, dövlətimizin parçalanması təhlükəsi yarandığı vaxtlar ağır günlər də keçiridik. Mən 1990-1993-cü illəri nəzərdə tuturam. Şükürlər olsun ki, Tanrı dualarımızı eşitdi və ölkəmizə vaxtılə Azərbaycan üçün çox işlər görmüş, zəmanəmizin görkəmli siyasi və dövlət xadimi Heydər Əliyev başçılıq etdi. Indi, tariximizin o dəhşətli dövrünün arxada qaldığı vaxtda əminik ki, belə hadisələr bir daha təkrar olunmayacaqdır. Bu gün Azərbaycanda demokratik, hüquqi dövlət qurulur, iqtisadiyyatın inkişafı üçün hər cür şərait yaradılmışdır. Bu yaxınlarda Bakıda turist səfərində olmuş kanadalı dostlarımız çox xoş təəssüratlarla dönmüşlər. Bilin ki, Kanadada yaşan biz azərbaycanlılar Vətənimizin taleyinə biganə deyilik. Əminik ki, hörmətli Prezident Heydər Əliyevin Azərbaycan üçün ən ağrılı problem olan Dağlıq Qarabağ münaqişəsinin dincliklə nizama salınması sahəsində göstərdiyi səylər öz bəhrəsini verəcəkdir.

Məmmədağa Zərrinnicat bizə söylədi ki, hazırda Kanadadakı Azərbaycan diasporunun 70 min nəfərədək üzvü var. Ölkəmiz müstəqillik əldə etdikdən sonra onların bir çoxu öz tarixi Vətənində olmuşdur. Məmmədağa kişinin də, özünün dediyi kimi, bir əlçatmaz arzusu vardı – uzun ayrılıqdan sonra doğma Bakını görmək. Budur, bu arzu həyata keçdi. O, yenidən Bakıdadır və çoxdan həsrətini çəkdiyi bu şəhər onu öz gözəlliyi ilə valeh edir. Məmmədağa kişi deyir:

-Bilirsinizmi, şəhərimizdə cəlbedici, insanın qəlbini əfsunlayan, onu özünə çəkən nə isə var.

Onu da qeyd edək ki, Məmmədağa kişi ölkəmizin paytaxtına kiçik oğlu ilə birlikdə gəlmişdir. Atasından fərqli olaraq, o, öz tarixi Vətənini bir neçə dəfə ziyarət etmişdir.

Məmmədağa kişi deyir:

-Harada oluramsa-olum, Azərbaycanın uğurlarına həmişə hədsiz dərəcədə sevinirəm, Vətənimin rifahı naminə nə isə bir iş görmək fürsətini əldən vermirəm. Mən özümü bakılı sayıram və bunu hər yerdə fəxrlə deyirəm. Torontoya qayıtdıqdan sonra biz azərbaycanlılar yenidən bir yerə toplaşacağıq və onlara müstəqil respublikamızın böyük uğurlarından danışacağam. Mən də, oğullarım da ucsuz-bucaqsız dünyanın harasında yaşasaq da, qürbətdə özümüzü nə qədər yaxşı hiss etsək də, doğulduğumuz və göz açdığımız ilk ocağımızı, sevimli diyarımızı heç zaman unutmayacağıq.

Fərhad Nuriyev

AZƏRTAC-ın müxbiri