Avqustun 6-da Azərbaycan Respublikasının xarici işlər naziri Vilayət Quliyev İran İslam Respublikası xarici işlər nazirinin Asiya, Okeaniya və Müstəqil Dövlətlər Birliyi ölkələri üzrə müavini Möhsün Əminzadəni qəbul etmişdir. 

Qonağı səmimi salamlayan nazir Vilayət Quliyev ölkələrimiz arasındakı münasibətlərin son zamanlar intensivlik dövrü yaşadığını qeyd etmiş, bu səfərin də qarşılıqlı əməkdaşlığa xidmət edəcəyini bildirmişdir. Nazir Vilayət Quliyev ölkələrimiz arasında iqtisadi sahədə əməkdaşlığın genişlənməsi istiqamətində bir sıra işlərin aparıldığını bildirərək, elm, təhsil və mədəniyyət sahələrində də əməkdaşlığın zəruri olduğunu vurğulamışdır.

Nazir Vilayət Quliyev Xəzər dənizinin hüquqi statusunun müəyyən edilməsi sahəsində sahilyanı dövlətləri qane edəcək ortaq prinsiplər əsasında tez bir zamanda birgə səylərlə müsbət nəticələr əldə olunacağına də ümid etdiyini bildirmişdir. Xarici siyasət idarəsinin başçısı Ermənistan-Azərbaycan, Dağlıq Qarabağ münaqişəsinin həlli istiqamətində görülən işlərdən danışaraq, İran tərəfinin bu məsələdə dəyişməz mövqeyini xüsusilə qiymətləndirmişdir.

İran İslam Respublikasının xarici işlər nazirinin müavini Möhsün Əminzadə İran ilə Azərbaycan arasındakı əlaqələrin nəzərə çarpacaq irəliləyişindən məmnun olduğunu bildirərək, dövlətlərimiz arasında münasibətlərin inkişafında İran tərəfinin öz səylərini davam etdirəcəyini vurğulamışdır.

Xarici işlər nazirinin müavini Möhsün Əminzadə Xəzər dənizinin hüquqi statusu ilə bağlı danışıqların faydalı aparıldığını qeyd edərək, bu məsələnin tezliklə tərəfləri qane edəcək şəkildə öz həllini tapacağına ümid etdiyini bildirmişdir.

Ermənistan-Azərbaycan, Dağlıq Qarabağ münaqişəsinin həlli istiqamətində aparılan işlərə və Azərbaycanın işğal edilmiş Dağlıq Qarabağ bölgəsində erməni separatçı rejimi tərəfindən keçirilməsi nəzərdə tutulan “prezident seçkilərinə” münasibət bildirən qonaq, münaqişənin siyasi dialoq vasitəsilə həllinə maneə törədən bu kimi addımların təqdir olunmadığını vurğulamışdır.

Sonra qonaq, nazir Vilayət Quliyevin İrana rəsmi səfər etməsi üçün İİR-in xarici işlər naziri Kamal Xərrazinin dəvətini xarici siyasət idarəsinin başçısına çatdırmışdır.

Görüşdə qarşılıqlı maraq doğuran bir sıra məsələlər də müzakirə edilmişdir.