MOSKVA. Ölkəmizin Rusiyadakı səfirliyində oktyabrın 15-də səhər saat 8-dən bütün beş seçki məntəqəsində Azərbaycan Respublikası prezidenti seçkiləri üzrə səsvermə başlanmışdır. Rusiya ərazisində yaşayan və bu günlərdə burada olan həmvətənlərimiz özlərinin vətəndaşlıq borclarını yerinə yetirmişlər.

Əgər Moskva vaxtı ilə saat 11-dək bütün məntəqələrdə 369 seçici, saat 14-dək 2000 seçici, saat 17-dək isə 3300 seçici səs vermişdisə, seçki prosesinin sonuna yaxın onların sayı 7030 nəfərə çatmışdır ki, bu da səs vermələri gözlənilən seçicilərin 96 faizinə bərabərdir.

Azərbaycanın Rusiyadakı fövqəladə və səlahiyyətli səfiri Ramiz Rizayevin sözlərinə görə, seçkilər görünməmiş fəallıqla keçmişdir. Səfir bunu seçkilərə ciddi hazırlıqla və bu işə Ümumrusiya Azərbaycan Konqresinin və ayrı-ayrı həmvətənlərimizin yaxından kömək göstərməsi ilə izah etmişdir.

Vətənimiz üçün bu əlamətdar gündə səs verənlər heç də təkcə Moskvada yaşayan həmvətənlərimiz deyildi. Voronej, Yaroslavl, Ryazan, Tula, İvanovo, Tver şəhərlərindən və digər yaxın bölgələrdən həmvətənlərimiz qatarlarla, xüsusi avtobuslarla səs verməyə gəlmişdilər.

Məntəqə seçki komissiyasının sədri Nağı Qurbanov demişdir ki, seçkilər azad və demokratik şəraitdə keçmiş, bundan ötrü maksimum şərait yaradılmışdı. Məsələn, Moskvadakı Azərbaycan vətəndaşlarının xahişi ilə səyyar qruplar təşkil olunmuşdu. Bu qruplar seçicilərimizin yığcam yaşadıqları və işlədikləri yerlərə gedərək, onlara öz vətəndaşlıq borclarını yerinə yetirməyə imkan yaradırdılar.

Seçicilərin yüksək fəallığını müşahidəçilər də qeyd etmişlər. Misal üçün, müstəqil müşahidəçi Pərviz Hacıyevin sözlərinə görə, o, Seçki Məcəlləsinin tələblərinin pozulduğuna, seçicilərə təzyiq göstərildiyinə dair heç bir fakt qeydə almamışdır.

Seçkilərə gələn adamların yaxşı ovqatda olması sübut edirdi ki, onlar kimə səs verdiklərini, gözəl gələcək üçün öz ümidlərini kimə bağladıqlarını bilirlər.

X X X

ANKARA. Türkiyədə yaşayan və işləyən, buraya müvəqqəti ezamiyyətə gələn vətəndaşlarımız, dost və qardaş ölkənin ali təhsil ocaqlarında oxuyan tələbələrimiz oktyabrın 15-də Ankaradakı Azərbaycan Mədəniyyət Mərkəzinə və İstanbuldakı baş konsulluğumuza gələrək, azad və demokratik şəraitdə prezident seçkilərində iştirak etmişlər.

Seçkilər bayram əhval-ruhiyyəsində, yüksək fəallıq şəraitində keçmişdir. Türkiyənin kütləvi informasiya vasitələri də seçkilərə böyük diqqət yetirmişdir. Seçki məntəqələrinə gələn jurnalistlər səsvermə prosesi ilə maraqlanmışlar. Bütün gün ərzində Türkiyənin televiziya kanallarında və İnternet saytlarında ölkə ictimaiyyətinə Azərbaycanda keçirilən prezident seçkilərinin gedişi barədə məlumat verilmişdir, türk jurnalistləri Azərbaycandakı və Türkiyədəki seçki məntəqələrində həmyerlilərimizdən müsahibələr almışlar.

Ankaradakı məntəqə seçki komissiyasının sədri, Azərbaycanın xalq artisti, tanınmış musiqiçimiz, professor Sərvər Qəniyev AZƏRTAC-ın müxbiri ilə söhbətində bildirmişdir ki, səsvermə zamanı heç bir pozuntuya yol verilməmiş, seçkilər mütəşəkkil və şəffaf keçmişdir.

Ankarada seçici siyahılarına 554 nəfər daxil edilmiş, ezamiyyətə gəlmiş daha bir nəfər də əlavə olunmaqla 555 seçici səs vermişdir.

İstanbulda siyahılara daxil olunmuş 733 seçicidən 662 nəfəri səsvermədə iştirak etmişdir.

X X X

KİYEV. Azərbaycan Respublikası prezidenti seçkilərində Kiyevdəki həmvətənlərimiz də yüksək fəallıq göstərmişlər. Azərbaycanın Ukraynadakı səfirliyində yaradılmış məntəqə seçki komissiyasının sədri Arif Quliyev AZƏRTAC-ın müxbirinə bildirmişdir ki, siyahılara daxil edilmiş 2853 seçicidən 2496 nəfəri Bakı vaxtı ilə saat 17-dək səs vermişdi. Xarkov və Dnepropetrovsk şəhərində də seçki məntəqəsi fəaliyyət göstərmişdir.

Azərbaycanın Ukraynadakı səlahiyyətli səfirinin Dnepropetrovsk şəhəri üzrə fəxri müşaviri Mərhəmət Bəşirov bildirmişdir ki, 16 saylı Yasamal ikinci seçki dairəsinin 3 saylı Dnepropetrovsk seçki məntəqəsində 652 vətəndaşımıza bildiriş verilmişdi. Onların böyük əksəriyyəti Dnepropetrovskın özündə, bir qismi isə qonşu Zaporojye, Kirovoqrad, Pavloqrad, Krivoy-Roq, Novomoskovsk, Melitopol və s. şəhərlərdə yaşayırlar. Buna baxmayaraq, həmvətənlərimiz böyük fəallıq göstərmiş, Azərbaycanın müqəddəratında mühüm rol oynayacaq bu seçkilərdən kənarda qalmamaq üçün seçki günü onların 632 nəfəri seçki məntəqəsinə gəlib səsvermədə iştirak etmişdir.

X X X

MİNSK. Oktyabrın 15-də Belarus Respublikasında olmuş soydaşlarımız öz vətəndaşlıq borcunu böyük ruh yüksəkliyi ilə yerinə yetirmişlər. Bakı vaxtı ilə saat 17-dək Minskdə 305 seçicinin 270 nəfəri səs vermişdir.

X X X

Azərbaycanın Fransadakı səfirliyində təşkil olunmuş seçki məntəqəsi səhər tezdən seçiciləri qəbul etmişdir. Seçkilərin normal şəraitdə keçməsi üçün burada maksimum şərait yaradılmışdı. Seçki keçirilən otaqda ölkəmizin üçrəngli bayrağı qoyulmuş, seçkilərlə bağlı müxtəlif plakatlar asılmışdı, prezidentliyə namizədlərin siyahısı və onlar barədə qısa məlumatlar, seçki haqqında qanun və digər sənədlər vardı.

Səsverməyə hamıdan əvvəl səfirliyin əməkdaşları gəlmişdilər. Fransada yaşayan, təhsil alan, ezamiyyətdə olan azərbaycanlılar səsvermədə böyük həvəslə iştirak etmişlər.

Tələbə Emin Qurbanov AZƏRTAC-ın müxbirinə demişdir:

- Mən Parisdən uzaqda, Kann şəhərində yaşamağıma baxmayaraq, öz vətəndaşlıq borcumu yerinə yetirmək üçün buraya gəlmişəm. Vətəndən uzaqda olsam da, ölkəmizdə baş verən hadisələri diqqətlə izləyirəm. Mən öz seçimimi əvvəldən etmişdim və bu gün Azərbaycanımızın, daha yaxşı gələcəyinə səs verdim.

Mən və tələbə dostlarım ölkəmizdə sabitliyin davam etməsini, Azərbaycanın beynəlxalq aləmdəki nüfuzunun daha da yüksəlməsini, respublikamızın iqtisadi qüdrətinin artmasını, xalqın rifah halının yaxşılaşmasını istəyirik.

Parisdə seçici siyahısındakı 62 seçicidən 49-u, habelə Fransada ezamiyyətdə olan 28 vətəndaşımız səsvermədə iştirak etmişdir.

X X X

Berlində Azərbaycan Respublikasının Almaniya Federativ Respublikasındakı səfirliyində yaradılmış seçki məntəqəsində prezident seçkiləri demokratik, ədalətli və şəffaf şəraitdə keçirilmişdir. Demək olar ki, bütün prezidentliyə namizədlərin mənsub olduqları partiyaların müşahidəçiləri səsvermənin gedişini əvvəldən sona qədər izləmişlər. Şəffaf seçki qutusu açılarkən onların iştirakı ilə səsvermənin nəticələri hesablanmış və elan olunmuşdur. 3 səsvermə bülleteni etibarsız sayılmışdır.

Səsvermədə 138 Azərbaycan vətəndaşı iştirak etmişdir.

X X X

TBİLİSİ. Gürcüstanda müvəqqəti yaşayan Azərbaycan Respublikası vətəndaşları ölkəmizin Tbilisidəki səfirliyində təşkil olunmuş seçki məntəqəsində səs vermişlər.

Məntəqə yerli vaxtla səhər saat 8-dən fəaliyyətə başlamışdır. Azərbaycanın Gürcüstandakı fövqəladə və səlahiyyətli səfiri Hacan Hacıyev bildirmişdir ki, seçkilərin şəffaf və demokratik keçirilməsi üçün bütün tədbirlər görülmüşdür. Marneulidə təhsil alan tələbələrin səs verməsi üçün xüsusi nəqliyyat vasitələri ayrılmışdır.

Məntəqə seçki komissiyasının sədri Hamlet Qaralov demişdir ki, Gürcüstanda olan bütün vətəndaşlarımızın səs vermələrinin təmin edilməsi üçün əvvəlcədən “Gürcüstan” və “Svobodnaya Qruziya” qəzetlərində səfirliyin bildirişi dərc olunmuş, habelə seçicilərə şəxsən və telefonla da xəbər verilmişdir. Bütün bu tədbirlərin nəticəsində seçicilər yüksək fəallıq göstərmişlər.

Axşam saat 19.00-da səsvermə başa çatmış, seçki bülletenləri sayılmışdır. Seçkilərdə 511 nəfər iştirak etmişdir.

X X X

DAŞKƏND. 17 nömrəli Yasamal üçüncü seçki dairəsinin Azərbaycanın Özbəkistandakı səfirliyində yaradılmış seçki məntəqəsində səsvermə mütəşəkkil başa çatmışdır. Səhər saat 8.00-dan axşam saat 19.00-dək Daşkənddə, Özbəkistanın digər şəhərlərində, habelə Cənubi Qazaxıstanda yaşayan Azərbaycan vətəndaşları səsvermədə iştirak etmiş, istədikləri namizədə səs vermişlər.

İlk olaraq Azərbaycan Respublikasının Özbəkistandakı fövqəladə və səlahiyyətli səfiri Aydın Əzimbəyov səs vermişdir.

Seçicilər arasında Bakıdakı ADO-Q tikinti şirkətinin əməkdaşları da var idi. Onlar Azərbaycanın Özbəkistandakı səfirliyinin yeni binasının tikintisində iştirak edirlər.

Məntəqə seçki komissiyasının məsul katibi Şahin Əhmədov AZƏRTAC-ın müxbirinə bildirmişdir ki, səsverməyə çox böyük maraq var idi. Seçicilər istədikləri namizədə səs verirdilər.

BMT-nin Mütəşəkkil cinayətkarlıq və narkotiklərə nəzarət idarəsinin Mərkəzi Asiyadakı regional nümayəndəliyinin müşaviri Tofiq Mürşüdlü demişdir ki, seçkilər çox demokratik və şəffaf keçdi. Arzum budur ki, seçiləcək yeni prezident xalqımızın ən ağır problemi olan Ermənistan-Azərbaycan, Dağlıq Qarabağ münaqişəsini sülh yolu ilə həll etsin, ev-eşiyindən qovulmuş köçkünlər yurd-yuvalarına qayıtsınlar.

X X X

AŞQABAD. 17 nömrəli Yasamal üçüncü seçki dairəsinin Azərbaycanın Aşqabaddakı səfirliyində yaradılmış seçki məntəqəsində Türkmənistanda yaşayan və işləyən, habelə ezamiyyətdə olan vətəndaşlarımız səs vermişlər. Səsvermənin demokratik qaydada keçməsi üçün səfirlikdə hər cür şərait yaradılmışdı.

Səhər tezdən Azərbaycanın Türkmənistandakı səfiri Elxan Hüseynov, səfirliyin əməkdaşları və onların ailə üzvləri səs vermişlər.

Məntəqə seçki komissiyasının sədri Nizami Rüstəmov AZƏRTAC-ın müxbirinə bildirmişdir ki, apardığımız təşviqat işinin nəticəsidir ki, vətəndaşlarımız seçkiyə böyük maraq göstərmiş və istədikləri namizədə səs vermişlər.

Aşqabadda yaşayan Cəbrayıl qaçqını İradə Mehdiyeva demişdir: Mən torpaqlarımızı qaytara biləcək namizədə səs verdim və ümid edirəm ki, o, buna nail olacaqdır.

Təqaüdçü Zemfira Qafarova isə arzu edir ki, Azərbaycan xalqı sülh və əmin-amanlıq şəraitində yaşasın, əhalinin güzəranı yaxşılaşsın. O, səs verdiyi namizədin bu arzuların həyata keçirilməsini təmin edə biləcəyinə ümid bəsləyir.