İDMAN
“XƏZƏR-LƏNKƏRAN” YARIMFİNALA VƏSİQƏ QAZANDI
AZƏRTAC xəbər verir ki, aprelin 28-də “Şəfa” stadionunda ölkə futbol kuboku uğrunda yarışların dörddəbir final mərhələsi çərçivəsində “Xəzər-Lənkəran” və “MKT-Araz” komandaları arasında cavab oyunu olmuşdur.
Gərgin idman mübarizəsi şəraitində keçən görüş qolsuz bərabərliklə (0:0) başa çatmışdır.
Beləliklə, aprelin 25-də keçirilən ilk oyunda 1:0 hesabı ilə qalib gəlmiş “Xəzər-Lənkəran” komandası yarışların yarımfinal mərhələsində Yevlaxın “Karvan” klubu ilə oynamaq hüququ qazanmışdır.
Xatırladaq ki, bir ay öncə komandalar dörddəbir final mərhələsində qarşılaşmış və iki oyunun nəticəsinə əsasən, “MKT-Araz” yarımfinala vəsiqə qazanmışdı. Lakin “Xəzər-Lənkəran” klubunun “MKT-Araz”ın heyətində aşkar etdiyi pozuntulara dair etiraz ərizəsindən sonra, AFFA-nın Nizam-İntizam Komitəsi bu komandalar arasında görüşlərin nəticəsini ləğv edərək, oyunların yenidən və neytral meydanda keçirilməsi barədə qərar çıxarmışdı.