1992-ci il fevralın 25-dən 26-a keçən gecə Xocalı şəhərinin sakinləri erməni qəsbkarları tərəfindən qəddarcasına qətlə yetirilmişlər. Xocalı faciəsi XX əsrdə misli görünməmiş ən dəhşətli soyqırım hadisəsi kimi Azərbaycan xalqının qan yaddaşına yazılmışdır. Ona görə də hər il bu müthiş faciəni dünyanın müxtəlif guşələrində yaşayan soydaşlarımız ürək ağrısı ilə qeyd edirlər. Bu barədə AZƏRTAC-a xeyli məlumat daxil olmuşdur.

TÜRKİYƏ

Fevralın 25-də Ankara şəhərində Xocalı faciəsinin 11-ci ildönümü ilə əlaqədar anma mərasimi keçirilmişdir. Xarici Ölkələrdə Yaşayan Azərbaycanlılarla İş üzrə Dövlət Komitəsi ilə Türkiyədəki səfirliyimizin birgə təşkil etdiyi mərasimdə şəhidlərin xatirəsi bir dəqiqəlik sükutla yad edilmişdir. Azərbaycanın Türkiyədəki səfiri Məmməd Əliyev Azərbaycan Prezidenti Heydər Əliyevin Xocalı faciəsinin 11-ci liqönümü ilə bağlı Azərbaycan xalqına Müraciətinin mətnini oxumuşdur. Mərasimdəki çıxışlarda qeyd edilmişdir ki, belə ağır günlərimizin təkrarlanmaması üçün bütün azərbaycanlılar harada yaşamalarından asılı olmayaraq birləşərək düşmənə qarşı birgə mübarizə aparmalıdırlar. Tədbirin sonunda BMT, ATƏT və Avropa Şurasına müraciətlər qəbul olunmuşdur.

X X X

FRANSA

Fransada azərbaycanlı universitet tələbələri Xocalı faciəsi ilə bağlı materialları təhsil aldıqları Unıversitetlərdə, insanların sıx toplaşdıqları yerlərdə paylamışlar. Fransız və ingilis dillərində nəşr olunmuş materiallar, eyni zamanda, 4000-ə yaxın elektron poçtlara göndərilmişdir. Fevralın 26-da Fransadakı Azərbaycan diasporu Avropa Şurası Parlament Assambleyasının qarşısında anma mərasimi keçirmişdir.

X X X

İRAN

Azərbaycanın Tehrandakı səfiri Abbasəli Həsənov İranın tanınmış qəzet və informasiya agentlikləri əməkdaşlarının iştirakı ilə mətbuat konfransı keçirmişdir. Səfir 1988-i ildə Ermənistanın Azərbaycana qarşı başladığı əsassız ərazi iddialarından və Dağlıq Qarabağda erməni seperatizminin boy atmasından, ermənilərin beynəlxalq hüququn norma və prinsiplərinə məhəl qoymadan torpaqlarımızın 20 faizni işğal etmələrindən danışmışdır.

Erməni vəhşiliyinin ən yüksək zirvəsinin Xocalı soyqırımı olduğunu bildirən səfir bu faciəni əks etdirən videofilmləri və fotoşəkilləri nümayiş etdirmişdir.

X X X

RUSİYA

Moskva və Sankt-Peterburq şəhərlərindəki Azərbaycan icmaları Xocalı faciəsi ilə bağlı bir sıra tədbirlər keçirmişlər. Soyqırımı əks etdirən videokassetlər, fotoşəkillər və digər materiallar tədbirlərin iştirakçılarına paylanmışdır.

Rusiyanın müxtəlif şəhərlərində keçirilən anma mərasimlərində Xarici Ölkələrdə Yaşayan Azərbaycanlılarla İş üzrə Dövlət Komitəsinin əməkdaşları da iştirak etmişlər. Tədbirlərin iştirakçıları Prezident Heydər Əliyevin Azərbaycan torpaqlarının azad olunması üçün apardığı siyasəti tam dəstəklədiklərini və ərazi bütövlüyümüzün bərpası, xalqımızın haqq səsinin dünya ictimaiyyətinə çatdırılması üçün dönmədən mübarizə aparacaqlarını bildirmişlər. Xocalı şəhərinin sağ qalmış əhalisinin ATƏT, BMT və Avropa Şurasına müraciəti diplomatik yolla Sankt-Peterburq şəhərində akkreditə olunmuş 37 ölkənin nümayəndəliklərinə çatdırılmışdır.

X X X

QAZAXISTAN

Astana şəhərində azərbaycanlıların “Xəzər” İctimai Birliyi Xocalı faciəsinin 11-ci ildönümü ilə bağlı tədbir keçirmişdir. Tədbirdə çıxış edənlər Ermənistan-Azərbaycan, Dağlıq Qarabağ münaqişəsinin həlli üçün Azərbaycan Prezidenti Heydər Əliyevin apardığı məqsədyönlü siyasəti bəyəndiklərini bildirmişlər. Mərasimdə Qazaxıstan prezidenti N.Nazarbayevə, həmçinin BMT-yə, ATƏT-ə və AŞ-a Xocalı soyqırımı barəsində müraciət qəbul edilmişdir.

Fevralın 22-də “Qazaxıstan-1” mərkəzi televiziyasının qazax və rus dillərində xəbərlər proqramında, “Astana” və “Azadlıq” radiolarında keçirilmiş mətbuat konfranslarında Xocalı soyqırımı haqqında ictimaiyyətə geniş məlumatlar verilmişdir.

X X X

ÖZBƏKİSTAN

Fevralın 25-də Xocalı faciəsinin ildönümü Daşkənd şəhərində də qeyd edilmişdir. Tədbiri Azərbaycanın Özbəkistandakı səfirliyi və Daşkənddəki Azərbaycan Mədəniyyət Mərkəzləri Assosiasiyası təşkil etmişdir. Tədbirdə səfirliyin müşaviri S.Əliyev və assosiasiyanın sədri A.Ağatalıbov və başqa natiqlər çıxış edərək Azərbaycan Prezidenti Heydər Əliyevin torpaqlarımızın azad olunması üçün apardığı siyasətin tezliklə öz nəticəsini verəcəyini bildirmişlər.

X X X

QIRĞIZISTAN

Fevralın 26-da Qırğızıstanın Bişkek şəhərində fəaliyyət göstərən “Azəri” Mədəniyyət Mərkəzləri Assosiasiyasının ofisində Xocalı faciəsinin 11-ci lidönümü qeyd edilmişdir. Tədbirdə Xocalı şəhidlərinin xatirəsi bir dəqiqəlik sükutla yad edilmişdir.

X X X

İSVEÇ

Xocalı şəhidlərinin xatirəsi İsveçdə də yad edilmişdir. Xarici Ölkələrdə Yaşayan Azərbaycanlılarla İş üzrə Dövlət Komitəsindən verilən məlumatda deyilir ki, Stokholm şəhərində BMT-nin daimi nümayəndəliyi qarşısında icazəli mitinq keçirilmişdir. Əllərində Azərbaycan, ingilis və İsveç dillərində yazılmış plakatlar tutmuş aksiya iştirakçıları erməni vandalizmini lənətləmişlər. Mitinqdə Xocalı soyqırımı ilə bağlı ictimaiyyətə geniş məlumat verilmişdir, BMT-nin Daimi Nümayəndəliyinin rəsmisi ilə görüş keçirilmiş və faciə haqqında məktub nümayəndəyə təqdim olunmuşdur.

X X X

NİDERLAND

Fevralın 25-də Hollandiyadakı Azərbaycan diasporunun üzvləri Haaqa Dünya Sülh Məhkəməsinin rəsmiləri və Dünya İnsan haqları müdafiəsi təşkilatında görüşlər keçirmişlər. Görüşlərdə Xocalı faciəsi ilə bağlı məlumatlar, fotoşəkillər və digər sənədlər məhkəmə rəsmilərinə və hüquq müdafiəçilərinə təqdim edilmişdir.