MƏDƏNİYYƏT


Xalq artisti Əbdül Mahmudovun 75 illik yubileyi qeyd olunub

Bakı, 15 may, AZƏRTAC

Mayın 15-də Cəfər Cabbarlı adına “Azərbaycanfilm” kinostudiyasında aktyor, rejissor və ssenarist, Xalq artisti Əbdül Mahmudovun 75 illik yubileyi qeyd olunub.

Kinostudiyadan AZƏRTAC-a bildirilib ki, tədbirdə qurumun direktoru, Əməkdar incəsənət xadimi Müşfiq Hətəmov, Əməkdar incəsənət xadimi Ayaz Salayev və başqaları çıxış edərək görkəmli sənətkarın Azərbaycan kino sənətində xidmətlərindən danışıblar. Bildirilib ki, Əbdül Mahmudovun kino sənətində özünəməxsus baxışı, dəstxəti, yaradıcılıq üslubu var.

Vurğulanıb ki, Əbdül Mahmudov 1966-cı ildə M.A.Əliyev adına Azərbaycan Dövlət İncəsənət İnstitutunun aktyorluq fakültəsini bitirdikdən sonra təyinatla “Azərbaycanfilm” kinostudiyasında ikinci rejissor kimi fəaliyyətə başlayıb, “Dəli Kür”, “Oxuyur Müslüm Maqomayev”, “Mən ki, gözəl deyildim”, “Bizim Cəbiş müəllim”, “Dağlarda döyüş” və s. filmlərdə Həsən Seyidbəyli, Adil İsgəndərov, Hüseyn Seyidzadə, Tofiq Tağızadə kimi görkəmli sənətkarlarla çalışaraq onların təcrübəsindən bəhrələnib, yüksək iş qabiliyyəti və professionallığı ilə hamının hörmətini qazanıb. O, həmçinin aktyor kimi çəkildiyi “Yeddi oğul istərəm”, “Nəsimi”, “Sevinc buxtası”, “O qızı tapın” “Axırıncı aşırım”, “Qətl günü” kimi filmlərdə yaratdığı yaddaqalan obrazlarla özünü tamaşaçılara sevdirə, onların qəlbinə yol tapa bilib.

1971-1973-cü illərdə Moskvada Ali rejissor və ssenarist kurslarını bitirdikdən sonra doğma kinostudiyada fəaliyyətini davam etdirən sənətkar “Atları yəhərləyin”, “Üzü küləyə”, “Doğma sahillər”, “Gecə qatarında qətl” kimi bədii filmlərə, “Mozalan” satirik kinojurnalı üçün çoxlu sayda bədii süjetlərə quruluş verib. Keçdiyi bu məhsuldar yaradıcılıq yolu daim yüksək qiymətləndirilib və 2018-ci ildə Xalq artisti fəxri adına layiq görülüb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.