ELM VƏ TƏHSİL


Xalq yazıçısı Kamal Abdulla gənclərlə görüş keçirib

Bakı, 25 may, AZƏRTAC

Azərbaycan Respublikasının Gənclər Fondunun dəstəyi və Gənclər Təşkilatları Milli Şurasının “Gənclər təşkilatlarının fəaliyyətlərinin dəstəklənməsi" proqramı çərçivəsində Xalq yazıçısı, Azərbaycan Dillər Universitetinin (ADU) rektoru akademik Kamal Abdulla ilə görüş keçirilib. Görüş Dünya Gənc Türk Yazarlar İctimai Birliyi tərəfindən “Əbədi sevgi - Vətən" layihəsi çərçivəsində reallaşıb.

Bu barədə AZƏRTAC-a ADU-dan bildirilib. Xalq yazıçısı Kamal Abdulla elmi və ədəbi yaradıcılığı, sevdiyi yazıçılar, mütaliə, “Kitabi-Dədə Qorqud” dastanı haqqında gənclərin suallarını cavablandırıb, mədəniyyətşünaslıq, mifologiya və mifolinqvistika haqqında fikirlərini bölüşüb. Eyni zamanda, gənclər Azərbaycan Dillər Universitetinin və Azərbaycan Yaradıcılıq Fondunun uğurlu layihəsi olan Yaradıcılıq fakültəsi, fondun həyata keçirdiyi digər işlər haqqında məlumatlandırılıb.

Görüşdə Bakı Beynəlxalq Multikulturalizm Mərkəzinin təşkilatçılığı və Azərbaycan Respublikası Prezidentinin İşlər İdarəsinin Prezident Kitabxanasının, Ekologiya və Təbii Sərvətlər Nazirliyinin, Azərbaycan Dillər Universitetinin tarixçi alimləri, toponimlər, dilçilik və xəritəçəkmə üzrə təcrübəli mütəxəssislərinin cəlb olunması ilə nəşr edilən “Həqiqətin onomastikası” kitabı haqqında məlumat verilib. Qeyd olunub ki, gərgin tədqiqat işlərinin bəhrəsi olan bu kitab erməni vandalizminin və erməni saxtakarlığının ən bariz nümunələrindən birinə – tarixi Azərbaycan torpaqlarında, indiki Ermənistan Respublikası ərazisində əsrlər boyu yaşamış azərbaycanlıların izlərinin silinməsi üçün bizə məxsus 1600-ə yaxın toponim, hidronim və oronimlərin kütləvi şəkildə dəyişdirilməsi və saxtalaşdırılması, bir çox yaşayış məntəqələrinin isə məqsədli şəkildə yer üzündən tamamilə silinməsi faktlarına həsr olunub.

Yazıçı 2020-ci ildə Türkiyədə çap olunan “Mifologiya elçisi Kamal Abdulla ərməğanı” kitabını gənclərə hədiyyə edib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.