Bakı, 12 dekabr, AZƏRTAC

1993-cü ilin yayında Azərbaycan dənizin qoynunda yelkənsiz gəmini xatırladırdı. Şahə qalxan dalğalar, əsən küləklər onu hara gəldi apara bilərdi. Vətəndaş qarşıdurması təhlükəsi ilə üz-üzə dayanan xalq özünün xilaskarını gözləyirdi, - deyə Fəxri xiyabanda ümummilli lider Heydər Əliyevin anım mərasimində iştirak edən Qarabağ qazisi Güləli Fərziyev AZƏRTAC-ın müxbiri ilə söhbətində deyib.

O, Ulu Öndərin müstəqil dövlətimizin ali rəhbərliyinə qayıdışından sonra onun şəxsi iradəsi və siyasi uzaqgörənliyi nəticəsində Azərbaycan parçalanıb dağılmaq, müstəqilliyini itirmək və vətəndaş müharibəsi təhlükəsindən xilas olduğunu xatırladaraq deyib: “Qısa müddət ərzində dövlət və hakimiyyət böhranına, xaos və anarxiyaya son qoyuldu, torpaqlarımızın işğalı prosesinin qarşısını alan atəşkəs barədə razılaşma əldə edildi. Çoxsaylı dövlət çevrilişi cəhdlərinin və terror aktlarının qarşısı qətiyyətlə alınmaqla sabitliyə nail olundu, insanların dinc yaşaması üçün təhlükə yaradan cinayətkarların hakimiyyətə meydan oxuması, qanunsuz silahlı birləşmələrin mövcudluğu kimi mənfi təzahürlər aradan qaldırılmaqla kriminogen durum stabilləşdi.

Qanunçuluğun qorunmasını özünün başlıca fəaliyyət prinsiplərindən biri elan etmiş Heydər Əliyev hər bir fərdin maraq və mənafelərini təmin etmədən, ədalət meyarını qorumadan güclü dövlət yaratmağın mümkünsüzlüyünü çıxışlarında hər zaman vurğulayaraq vətəndaşlara göstərilən hüquqi yardımın səviyyəsinin yaxşılaşdırılması təşəbbüsü ilə çıxış etdi. Onun qətiyyətli rəhbərliyi altında dövlət-vətəndaş münasibətlərinin hüquq müstəvisində tənzimləndiyi, insan hüquq və azadlıqlarının yüksək səviyyədə qorunduğu, humanizm ideyalarının möhkəm təmələ çevrildiyi sivil cəmiyyət formalaşdırıldı, dövlət idarəçiliyi demokratik yola qədəm qoydu.

Daha sonra deyib: “Xalqımızın dahi oğlu, dünya şöhrətli siyasətçi Heydər Əliyevin müqəddəs adı və möhtəşəm fəaliyyəti Azərbaycanın müstəqil dövlətçilik tarixinə qızıl hərflərlə həkk olunub. O, öz müdrik siyasəti, dönməz əqidəsi və tarixi uzaqgörənliyi ilə xalqımızın müstəqillik arzusunun gerşəkləşdirilməsini, milli dövlətçiliyimizin dirçəldilməsini və möhkəm bünövrə üzərində yenidən qurulmasını təmin edib. Bu gün Prezident İlham Əliyevin rəhbərliyi altında məhz bu bünövrə üzərində dinamik inkişaf edən Azərbaycan dünya miqyasında öz sözünü deyən ölkə, regionun lider dövləti kimi tanınır”.