REGİONLAR
Xalqımızın birliyi qələbəmizi təmin edən mühüm faktordur
Bərdə, 19 may, AZƏRTAC
Xalqımızın vahidliyi qələbələrimizi təmin və əbədi edən mühüm faktordur.
AZƏRTAC-ın bölgə müxbiri xəbər verir ki, bu fikir “İdeoloji maarifləndirmə konsepsiyası” ilə bağlı Yeni Azərbaycan Partiyası (YAP) Bərdə rayon təşkilatı təbliğat qrupunun üzvü, Bərdə bələdiyyəsinin sədri Sadiq Xəlilovun təşkilatçılığı ilə “Xalqın vahidliyi” mövzusunda keçirilən tədbirdə səsləndirilib.
Tədbir Bərdə şəhər 3 nömrəli tam orta məktəbinin şagirdlərin əl işlərindən ibarət sərgiyə və xalqın birliyi ilə bağlı hazırladıqları kompozisiyaya baxışla başlayıb. Şəhid anaları, qazilər, müxtəlif kateqoriyadan olan iş adamları, media, özəl sektor və müxtəlif partiyaların yerli təşkilatlarının nümayəndələrinin iştirakı ilə dəyirmi masa ətrafında davam etdirilən tədbirdə respublikamızın bütövlüyü uğrunda həlak olmuş şəhidlərimizin xatirəsinin bir dəqiqə sükutla yad edilib. Bərdə bələdiyyəsinin sədri Sadiq Xəlilov çıxışında xalqımızın vahidliyinin dövlətimizin qazandığı qələbələrdə əsas amil olduğunu vurğulayıb.
YAP Bərdə rayon təşkilatının sədri Fəqət Şadlinskaya ümummilli lider Heydər Əliyevin azərbaycançılıq ideologiyası ətrafında respublikamızda yaşayan bütün millətlərin vahid xalq birliyinin möhkəmliyindən, müzəffər Ali Baş Komandan İlham Əliyevin rəhbərliyi ilə xalq-iqtidar-ordu birliyindən danışıblar.
Diskussiya şəraitində keçən tədbirdə YAP Bərdə rayon təşkilatı təbliğat qrupunun üzvləri - Samir Səfərov, Etibar Hüseynova, Mehparə Mustafayeva, Tofiqə Məmmədova, Aynurə Əyyubova, Teymur Həmidov, Məhərrəm Şəfiyev, həmçinin şəhid ailələri - Radə Qurbanova, Arzu Hüseynova, Türkanə Qəribzadə, QHT nümayəndələri Aydın Zeynalov, Bəxtiyar Hüsüyev, Nərgiz Cəfərova, iş adamı Fəxrəddin Hüseynov, bələdiyyə sədri Knyaz Əliyev və başqaları çıxış edərək, xalqın vahidliyindən, xalqın birliyinin müxtəlif aspektlərdə təbliğ olunmasının əhəmiyyətindən söz açıblar.