Xəbərdarlıq: Bakıda və Abşeron yarımadasında şimal-qərb küləyi saniyədə 35 metrədək güclənəcək
Bakı, 29 mart, AZƏRTAC
Bir neçə gün davam edən mülayim hava şəraitindən sonra Bakıda və Abşeron yarımadasında martın 30-u səhərdən aprelin 1-i axşamadək şimal-qərb küləyinin sürətinin saniyədə 18-23 metr olacağı, arabir 25-30 metr, martın 30-da axşam, martın 31-də gecə və səhər yarımadanın bəzi yerlərində arabir 35 metrədək güclənəcəyi gözlənilir.
Ekologiya və Təbii Sərvətlər Nazirliyinin Milli Hidrometeorologiya Xidmətindən AZƏRTAC-a verilən məlumata görə, martın 30-u axşamdan aprelin 1-i gündüzədək havanın fasilələrlə yağıntılı olacağı, bəzi yerlərdə intensivləşəcəyi, şimşək çaxacağı ehtimalı var. Havanın temperaturu ötən günlərlə müqayisədə tədricən 5-10° enəcək.
Martın 30-u səhər şimal və qərb rayonlarından başlayaraq hava şəraitinin dəyişəcəyi, arabir yağıntılı olacağı, dağlıq və dağətəyi rayonlarda qar yağacağı, Böyük və Kiçik Qafqazın bəzi ərazilərində yağıntıların intensivləşəcəyi proqnozlaşdırılır. Martın 31-də isə yağıntıların əksər rayonları əhatə edəcəyi, bəzi yerlərdə intensiv olacağı sulu qar, qar yağacağı bildirilir.
Aprelin 1-də günün ikinci yarısında yağıntıların intensivliyi azalacaq. Axşama doğru isə tədricən kəsiləcək. Bəzi yerlərdə dolu düşəcəyi ehtimal edilir. Qərb küləyi əsəcək, sürəti saniyədə 15-20 metr olacaq, arabir 25-30, bəzi yerlərdə arabir 35 metrədək güclənəcək. Havanın temperaturunun ötən günlərlə müqayisədə tədricən 8-10° enəcəyi proqnozlaşdırılır. Çaylarda sululuğun artacağı ehtimal edilir.
Bölmənin digər xəbərləri
