Tbilisi, 16 avqust, AZƏRTAC

Azərbaycan bizim tarixi Vətənimiz, qürur mənbəyimizdir. Düşünürəm ki, bu təkcə mənim deyil, bütün dünya azərbaycanlılarının fikridir. Damarında azərbaycanlı qanı axan hər bir kəs, harada yaşamasından, hansı vəzifədə çalışmasından asılı olmayaraq doğma Vətənini, millətini və xalqını ürəkdən sevməli və millətinə xidmət etməlidir.

Bu sözləri AZƏRTAC-ın Gürcüstan bürosuna müsahibəsində Estoniyada yaşayan şair, tərcüməçi, publisist, ictimai xadim, professor, Estoniya- Azərbaycan Cəmiyyətinin sədri Xaqani Qayıblı söyləyib.

Onun sözlərinə görə, Estoniyada yaşayan azərbaycanlılar doğma Vətən Azərbaycanın adını hər zaman üstün tuturlar. Bu gün Estoniya Azərbaycanlıları Cəmiyyəti Estoniyada yaşayan gənc və yeniyetmə azərbaycanlıların da bu ruhda tərbiyə olunmasında, azərbaycançılıq ideyası ətrafında sıx birləşmələri, bu ideyanı yaşatmaları üçün əlindən gələni edir.

X.Qayıblı deyib: “Düzdür bir neçə ilə əvvəl həm cəmiyyətin üzvləri, həm də ayrı-ayrı insanlar xalqımızın başının üstünü almış qara buludlar, torpaqlarımızın 20 faizinin işğalı ilə bağlı bir qədər bədbin düşünürdülər. Lakin böyük əksəriyyət inanırdı ki, Dünya Azərbaycanlılarının birliyinin yaradıcısı, azərbaycançılıq ideyasının müəllifi, ümummilli liderimiz Heydər Əliyevin siyasi kursunun layiqli davamçısı Prezident, Müzəffər Ali Baş Komandan İlham Əliyevin qətiyyəti nəticəsində bu məsələlər öz müsbət həllini tapacaq. İndi fəxrlə deyə bilərəm ki, tapdı da. İndi biz daha qürurluyuq”.

Onun sözlərinə görə, 2020-ci il sentyabrın 27-də Azərbaycan Ordusunun erməni təxribatına qarşı başlatdığı əks hücum əməliyyatlarının, Vətən müharibəsinin başladığı ilk gündən əldə olunan uğurlar artıq bizə xoş ümidlər verirdi. Bütün dünya azərbaycanlıları kimi Estoniyada yaşayan azərbaycanlılar da Vətənə xidmət üçün əlindən gələni edirdi. Təbiidir ki, ürəyi Azərbaycan ilə döyünən bütün azərbaycanlılar doğma Vətənimizə yardım üçün nə isə etmək üçün çalışırdı. Biz də təbliğatımızı gücləndirmişdik.

“Hamı bu müharibədən nə isə gözləyirdi. Dünyanın gözü Azərbaycanda idi. Heç kim inana bilməzdi ki, ermənilərin bir neçə il ərzində xarici havadarlarının silah və sursatı, canlı qüvvəsinin köməyi ilə işğal etdikləri torpaqları 30 ildən sonra Azərbaycan bir həmlə ilə alacaq. Amma Qüdrətli Azərbaycan Ordusu Müzəffər Ali Baş Komandan, Prezident İlham Əliyevin rəhbərliyi ilə 44 günlük müharibə nəticəsində Şanlı Tarix yazdı. Azərbaycan nəyə qadir olduğunu bir daha dünyaya sübut etdi. “Azərbaycanın bu qələbəsi tarixdə çox nadir qələbələrdən biri və bəlkə də, birincisidir. İndi Azərbaycanı təkcə neftinə, təbii sərvətlərinə görə deyil, həm də güclü ordusuna görə tanıyırlar” – deyə, cəmiyyət sədri vurğulayıb.

Dünya Azərbaycanlılarının birliyi barədə danışan X.Qayıblı deyib ki, bir neçə dəfə Dünya Azərbaycanlılarının qurultayında, müxtəlif tədbirlərində iştirak edib. Bunların içərisində isə ən yadda qalanı, bəlkə də ən qürurvericisi V qurultay oldu. Şuşada keçirilən V qurultayda biz zəfərimizi qeyd etdik. Dünya Azərbaycanlılarının qələbəsini qeyd etdik və möhkəm birliyimizi nümayiş etdirdik.

O, fikirlərini belə ifadə edib: “Bu qurultay mənim üçün həm də ona görə əlamətdar idi ki, qurultay ərəfəsində Azərbaycan Prezidenti İlham Əliyev məni “Tərəqqi” medalı ilə təltif etdi. Bu mükafat mənə Şuşada təqdim olunanda keçirdiyim hissləri ifadə edə bilmirəm. İnsanın həyatında çoxlu sayda mükafatlar olur. Amma “Tərəqqi” medalı özəl mükafatlardandır. Müzəffər Ali Baş Komandan İlham Əliyevin rəhbərliyi ilə igid oğullarımızın azad etdiyi Şuşa kimi şəhərdə “Tərəqqi” medalının təqdim olunması köksümü qabartdı. Bu etimad azərbaycanlı olaraq üzərimə daha çox məsuliyyət qoydu. Yaşadığımız ölkələrdə azərbaycanlı olmaq asandır, amma azərbaycanlı kimi yaşamaq çox çətindir. Davranışımız, atdığımız hər addım birbaşa mənsub olduğumuz xalqın adına yazılır.

Qalib Sərkərdənin bu mükafatı təkcə mənim fəaliyyətimə deyil, Estoniyada yaşayan, cəmiyyətimizin hər bir üzvünə verilən ali mükafat idi”.

Estoniyada yaşayan ermənilərin fəaliyyətinə toxunan X.Qayıblı bildirib ki, ermənilərlə azərbaycanlıları müqayisə etmək olmaz. Ermənilər dünyanın hər yerində azlıqdırlar və onların öz ölkələri yoxdur, Azərbaycan torpaqları hesabına özlərinə qondarma dövlət qurublar. Onların da çoxu Ermənistandakı iqtisadi və digər problemlər səbəbindən dünyanın müxtəlif ölkələrinə köçüblər. Yəni öz torpağında, öz ölkəsində yaşayan millətin diasporu ilə qaçqın, qaraçı tipində yaşayan millətin diasporunu müqayisə etmək düzgün deyil.

Qeyd edək ki, Xaqani Qayıblı Gürcüstanın Saqareco rayonunun Zemo Ləmbəli (Qaraçöp) kəndində anadan olub. 1989-cu ildə Azərbaycan Yazıçılar Birliyi (AYB) tərəfindən Moskvaya Qorki adına Ədəbiyyat İnstitutuna, həmin ilin sonunda Azərbaycan Təhsil Nazirliyinin xətti ilə AYB nəzdindəki Azərbaycan Bədii Tərcümə və Ədəbi Əlaqələr Mərkəzi tərəfindən Estoniyanın Tartu Universitetinə göndərilib.

O, Tartu Universitetini eston dilində bitirən ilk azərbaycanlı tələbə olub. Estoniya-Azərbaycan cəmiyyətinin sədri, Tartu Universiteti Türk Dili Mərkəzinin müdiri, fəxri Estoniya vətəndaşlığı alan, Fin-Uqor dilləri üzrə ilk azərbaycanlı alimdir. 1987-ci ildən Azərbaycan, Türkiyə, Gürcüstan və Estoniya mətbuatında vaxtaşırı şeir və publisistik yazıları ilə çıxış edir.

Xətayi Əzizov

AZƏRTAC-ın xüsusi müxbiri

Tbilisi