Bakı, 14 sentyabr, AZƏRTAC 

Sentyabrın 14-də Ekologiya və Təbii Sərvətlər Nazirliyində (ETSN) Xəzər dənizinin hazırkı vəziyyəti, çirklənməsi və onun ekoloji durumunun yaxşılaşdırılması istiqamətində görülən tədbirlərə və su bioresurlarına həsr edilmiş mətbuat konfransı keçirilib.

AZƏRTAC xəbər verir ki, nazirliyin ətraf mühitin siyasəti, ekoloji vəziyyətin təhlili və qiymətləndirilməsi şöbəsinin müdiri Rasim Səttarzadə Xəzər dənizinin çirklənməsi və onun mənfi təsirlərindən danışıb. O, plastik tullantılarla çirklənmənin artdığını, bunun gələcəkdə daha acınacaqlı nəticələrə səbəb olacağını deyib. R.Səttarzadə problemin həllində dövlət qurumları, qeyri-hökumət təşkilatları, ictimaiyyət nümayəndələrinin nazirliklə birgə əməkdaşlığının vacibliyini qeyd edib.

ETSN-in əməkdaşı Faiq Mütəllimov Xəzər dənizinin əsas çirklənmə mənbələrinin antropogen fəaliyyətlə bağlı olduğunu diqqətə çatdırıb. O, həmçinin deyib: “Xəzər dənizinin sahil zolağında və çimərliklərdə fəaliyyət göstərən istirahət mərkəzləri və ictimai-iaşə obyektləri tərəfindən, üzən vasitələrdən dənizin çirkləndirilməsini, vətəndaşlar tərəfindən ətraf ərazilərin zibillənməsini xüsusi qeyd etmək olar. Belə hallar Xəzərin ekoloji vəziyyətinin pisləşməsinə, antisanitar vəziyyətin yaranmasına gətirib çıxarır, eyni zamanda, ekoturizmin inkişafına mənfi təsir göstərir.

ETSN tərəfindən Xəzər dənizinin çirklənməsinin qarşısının alınması məqsədilə mütəmadi olaraq aksiyalar, reydlər və maarifləndirilmə tədbirləri keçirilir.

Xəzər dənizinin çirklənməsinin qarşısının alınmasında vətəndaşların və xüsusilə də ictimaiyyətin rolu əvəzsizdir. Bu təkcə bir qurumun işi və vəzifəsi deyil, bütün aidiyyəti qurumlar öz öhdəliklərini yerinə yetirməlidirlər. Ona görə ictimaiyyət nümayəndələri və vətəndaşlar bu məsələyə daha həssas yanaşmalıdırlar. Ətraf mühitin çirkləndirilməsi hallarının şahidi olduqda 24 saat ərzində fəaliyyət göstərən Nazirliyin 168 nömrəli “Qaynar xətt” xidmətinə məlumat verilməsi xahiş olunur”.

Nazirlik rəsmisi bildirib ki, ETSN və Daxili İşlər Nazirliyinin əməkdaşları Xəzər dənizində mövcud vəziyyəti yaxşılaşdırmaq və çirkləndirmənin qarşısını almaq məqsədilə Xaçmaz, Astara, Lənkəran rayonları, Sumqayıt şəhəri və Bakı şəhərinin Binəqədi və Sabunçu rayonlarının Xəzərsahili ərazilərində birgə reydlər keçiriblər: “Reydlər zamanı Xəzər sahilində yerləşən bəzi istirahət mərkəzlərində və ictimai-iaşə obyektlərində formalaşan məişət tullantılarının və çirkab suların düzgün idarə olunmadığı müəyyənləşib. Məişət tullantılarının qalaqlanması və çirkab suların təmizlənmədən birbaşa Xəzər dənizə axıdılması ilə bağlı 46 fakt aşkarlanıb. Nöqsanların aradan qaldırılması məqsədilə obyekt sahiblərinə icrası məcburi olan müddətli “məcburi göstəriş”lər verilib və onlar inzibati qaydada cərimələniblər.

Sevindirici haldır ki, keçirilən reydlərin nəticəsi olaraq artıq bəzi obyekt sahibləri tərəfindən verilən göstərişlərin icrası təmin edilib. Lənkəran və Astara rayonları və paytaxtın Sabunçu rayonunda obyektlər tərəfindən məcburi göstərişlər yerinə yetirilib və tullantıların təmizlənməsi təmin olunub. Digər rayonlarda isə hazırda bu istiqamətdə tədbirlər görülməkdədir.

Bundan başqa, Xəzər dənizinin Azərbaycan sektorunda üzən gəmilərdə formalaşan maye və bərk tullantıların düzgün idarə olunması və gəmilərdən çirkləndirmənin qarşısının alınması istiqamətində nəzarətin gücləndirilməsi məqsədilə ETSN reydlər keçirməyə başlayıb.

Nazirliyin Ətraf Mühitin Mühafizə Departamentinin əməkdaşları Xəzər dənizinin Azərbaycan sektorunda gəmiçilik təsərrüfatı ilə məşğul olan “Bakı Beynəlxalq Dəniz Ticarət Limanı” Qapalı Səhmdar Cəmiyyətində, Xəzər Dəniz Neft Donanma İdarəsində, Dəniz Nəqliyyat Donanma İdarəsində və “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin Təlim Tədris Mərkəzində “Ətraf mühitin mühafizəsi haqqında”, “Su məcəlləsi haqqında”, “İstehsalat və məişət tullantıları haqqında” qanunların və digər qəbul olunmuş normativ hüquqi aktların tələblərinin icra vəziyyətini araşdırıblar.

Aparılmış araşdırmalar zamanı həmin müəssisələrdə qanunlara riayət edilmədiyi faktları aşkarlanıb və protokollar tərtib edilərək cərimələr tətbiq olunub. Nöqsanların aradan qaldırılması üçün icrası məcburi olan müddətli “məcburi göstərişlər” verilib. Bu istiqamətdə reydlər davam etdirilir”.

Nazirliyin əməkdaşı ETSN tərəfindən görülən tədbirlərin Xəzər dənizinin çirklənməsinin qarşısını almağa hədəfləndiyini vurğulayıb. Bildirilib ki, həyata keçirilən tədbirlər Xəzər dənizinin ekoloji sabitlik zonasına çevrilməsinə yönəlib.

ETSN-in Elmi Tədqiqat Balıqçılıq Təsərrüfatı İnstitutunun direktoru Mehman Axundov son 15 ildə Xəzər dənizinin su bioresurslarının ehtiyatlarının əsasən antropogen təsirlər nəticəsində azaldığını deyib. Direktor son üç il ərzində bioresursların, xüsusilə kilkə balıqlarının ehtiyatlarının stabilləşdiyini qeyd edib. O, Xəzəryanı ölkələrin, o cümlədən ETSN-in digər dövlət qurumları ilə birgə su bioresurslarının mühafizəsi istiqamətində həyata keçirdiyi tədbirlər barədə məlumat verib. Nazirlik nümayəndəsi su bioresurslarının mühafizəsi zamanı dünya təcrübəsindən istifadə edildiyini deyib.

“İl ərzində Azərbaycanda balıq ovuna müəyyən qadağalar tətbiq edilir. Belə ki, mayın 1-dən sentyabrın 1-dək balıq ovuna icazə verilmir. Bu balıqların kürü tökməsi ilə əlaqədardır. Balıq ovu ilə məşğul olmaq istəyənlər nazirlikdə qeydiyyatdan keçməlidirlər. Qanunu pozanlara qarşı nazirlik tədbirləri daha da sərtləşdirib”, - deyə M.Axundov qeyd edib.

Sonda kütləvi informasiya vasitələri nümayəndələrinin sualları cavablandırılıb.