Bakı, 26 iyun, AZƏRTAC

26 İyun - Silahlı Qüvvələr Günü münasibətilə Xəzər Rayon İcra Hakimiyyətinin (RİH) və Səfərbərlik və Hərbi Xidmətə Çağırış üzrə Dövlət Xidmətinin Xəzər rayon İdarəsinin birgə təşkilatçılığı ilə Azərbaycan Respublikası Prezidentinin Sərəncamına əsasən Xəzər rayonu üzrə təltif olunmuş bir qrup hərbi qulluqçunun medallarının təqdim edilməsi mərasimi keçirilib.

AZƏRTAC xəbər verir ki, iyunun 26-da Mərdəkan Mədəniyyət Sarayında təşkil olunan mərasimdə Xəzər RİH başçısı Elşən Salahov, Millət vəkilləri Rauf Əliyev və Soltan Məmmədov, YAP Xəzər rayon təşkilatının sədri Namiq Əhmədov, Rayon hüquq-mühafizə orqanlarının rəhbərləri, şəhid ailələri və müharibə iştirakçıları iştirak ediblər.

İlk öncə Azərbaycan Respublikasının Dövlət Himni səsləndirilib, daha sonra RİH başçısı E.Salahov tərəfindən tədbir açıq elan edilərək, vətən müharibəsi şəhidlərinin xatirəsi 1 dəqiqəlik sükutla yad olunub.

Tədbirin davamında Millət vəkilləri Rauf Əliyev, Soltan Məmmədov və YAP Xəzər rayon təşkilatının sədri Namiq Əhmədov çıxışlar ediblər.

Daha sonra Azərbaycan Respublikası Prezidentinin 2021-ci il 24 iyun tarixli Sərəncamına əsasən Azərbaycan Respublikası ərazilərinin işğaldan azad olunması zamanı döyüş tapşırıqlarını yerinə yetirərkən cəsarət və fədakarlıq göstərmiş, habelə təşəbbüskar və qətiyyətli hərəkətlər nümayiş etdirmiş Azərbaycan Respublikası Silahlı Qüvvələrinin hərbi qulluqçuları “Döyüşdə fərqlənməyə görə” , “Hərbi xidmətlərə görə”, “Cəsur döyüşçü”, “İgidliyə görə” və “Vətən uğrunda” medalları ilə təltif olunub, şəhid və müharibə iştirakçılarının medallarının təqdimatına başlanılıb.

Ümumilikdə Xəzər rayonu üzrə şəhid olmuş 44 hərbi qulluqçudan ilkin mərhələdə 26 şəhidin ailəsinə “Vətən uğrunda” medalları təqdim edilib, 5 nəfər müharibə iştirakçısına “Cəsur döyüşçü” medalları, 1 nəfər müharibə iştirakçısına “Döyüşlərdə fərqlənməyə görə” medalı, 1 nəfər müharibə iştirakçısına 3-cü dərəcəli “Vətənə xidmətə görə” medalı və 1 nəfər müharibə iştirakçısına “Vətən uğrunda” medalı təqdim olunub.

Təqdimetmə mərasimi başa çatdıqdan sonra Şəhid Şirvani Həsənağanın anası Rəfiyeva Şəfəq Faiq qızı, Şəhid Məmmədzadə Bəhram və İman qardaşlarının atası Məmmədzadə Elman Dədəkişi oğlu, Şəhid Qasımov Ramiz Vaqif oğlunun həyat yoldaşı Qasımova Günel Heydər qızı və “Cəsur döyüşçü” medalı ilə təltif olunmuş Əfəndiyev Murad Nəsrəddin oğlu çıxışlar edərək, dövlətimizin başçısının şəhid ailələri və müharibə iştirakçılarına qarşı göstərdiyi yüksək diqqət və qayğıya görə öz dərin təşəkkürlərini bildiriblər.