CƏMİYYƏT


“Xəzəri qoruyaq” kampaniyası çərçivəsində 10 hektar ərazi tullantılardan təmizlənib

Bakı, 3 oktyabr, AZƏRTAC

Ölkənin ən böyük ekoloji aksiyalarından olan “Xəzəri qoruyaq” Beynəlxalq Sahilyanı Təmizlik kampaniyası 10 gün davam edərək 8 şəhər və rayonu əhatə edib. Aksiya oktyabrın 1-də Bakıda yekunlaşıb. On ildən artıqdır həyata keçirilən ekoloji hərəkat bu il ilk dəfə bütün Xəzər sahili rayonları əhatə edib.

Kampaniyanın keçirilməsində məqsəd ölkədə ekoloji durumun yaxşılaşdırılması, əhalinin bu sahədə maarifləndirilməsi və ətraf mühitə məsuliyyətli yanaşma prinsiplərini təbliğ etməkdir.

AZƏRTAC xəbər verir ki, bu il “Xəzəri qoruyaq!” Beynəlxalq Sahilyanı Təmizlik Kampaniyası “Coca-Cola”, “Carlsberg Azerbaijan”, “PAŞA Bank” və “Bakcell” şirkətlərinin tərəfdaşlığı, Ekologiya və Təbii Sərvətlər Nazirliyinin, “ASAN xidmət”in, “ASAN Könüllüləri” təşkilatının dəstəyi və “EcoHub” ekoloji platformasının icraçı tərəfdaşlığı ilə həyata keçirilib. Aksiyasının təşkilatçılığında “Regional İnkişaf” İctimai Birliyi, Azərbaycan Könüllü Təşkilatları İttifaqı, “Təmiz Şəhər” Açıq Səhmdar Cəmiyyəti, Azərbaycan Dövlət Reklam Agentliyi, ADA Universiteti Fondu, Global Shapers Shamakhi Hub, ABŞ-ın Azərbaycandakı səfirliyi, ABŞ Təhsilli Azərbaycan Məzunları İctimai Birliyi, Azərbaycan Jurnalistlər Şəbəkəsi İctimai Birliyi, Bakı Nəqliyyat Agentliyi, Bakı Beynəlxalq Dəniz Ticarət Limanı, LU-MUN Holding və “Baker Hughes” şirkəti iştirak edib.

Kampaniya çərçivəsində sentyabr ayı ərzində Xaçmaz, Şabran, Siyəzən, Neftçala, Astara, Lənkəran, Sumqayıt və Bakıda yerləşən ictimai çimərliklərdə təşkil olunan təmizlik aksiyalarında 1500 könüllü 10 hektar ərazini 5 ton tullantıdan təmizləyib.

Qeyd edək ki, son otuz il müddətində dünyanın 100-dən çox ölkəsində qeyd olunan Beynəlxalq Sahilyanı Təmizlik Günü Yer kürəsində su hövzələri sahillərinin tullantılardan təmizlənməsinə yönələn ən irimiqyaslı könüllü hərəkatıdır. Azərbaycan da bu beynəlxalq ekoloji aksiyada “Xəzəri qoruyaq” şüarı ilə artıq 10 ildən çoxdur ki, iştirak edir və ildən-ilə aksiyanın miqyası genişlənir. Bu kampaniya çərçivəsində Xəzər dənizinin çimərliklərinin 45 hektardan çox ərazisi təxminən 40 ton məişət tullantısından təmizlənib. Təmizlənən ərazilərdən toplanan tullantılar qeydə alınaraq məlumatlar “Ocean Conservancy” beynəlxalq təşkilatına göndərilir. Həmin məlumatlar isə öz növbəsində dünya su hövzələrinin təmizlənməsi haqqında ölkələr üzrə beynəlxalq hesabatlarda əks olunur.

 

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.