İQTİSADİYYAT


Xəzərin Azərbaycan sektorunda naviqasiyanın təhlükəsizliyinin təmin edilməsi müzakirə olunub

Bakı, 25 noyabr, AZƏRTAC

“Azərbaycan Xəzər Dəniz Gəmiçiliyi” QSC (ASCO), SOCAR, Dövlət Dəniz və Liman Agentliyi, Hərbi Dəniz Qüvvələrinin (HDQ) Hidroqrafiya İdarəsi və “Bakı Beynəlxalq Dəniz Ticarət Limanı” QSC-nin nümayəndələrinin iştirakı ilə Xəzər dənizinin Azərbaycan sektorunda naviqasiyanın təhlükəsizliyinin təmin edilməsinə dair görüş keçirilib.

Gəmiçilikdən AZƏRTAC-a bildirilib ki, ASCO-nun təşəbbüsü ilə baş tutan görüşdə Xəzər dənizinin Azərbaycan sektorunda ekoloji vəziyyətin yaxşılaşdırılması məqsədilə istismarı başa çatmış dəniz özülləri, estakadalar və digər metal konstruksiyaların dəniz dibindən kəsilərək çıxarılması, bununla əlaqədar dəniz xəritələrinin yenidən nəşri, Hidroqrafiya İdarəsi tərəfindən Azərbaycan bayrağı altında üzən gəmilər üçün Xəzərin elektron xəritəsinin yenilənməsi, Azərbaycan Respublikası ərazisində qeydiyyatdan keçmiş limanların dəniz akvatoriyası və gəmilərin yanalma körpülərinin yeni nəşr xəritələrində göstərilməsi kimi məsələlər müzakirə olunub.

Müzakirələrin nəticəsində qərara gəlinib ki, SOCAR Xəzər dənizinin Azərbaycan sektorunda gördüyü işlər (özüllərin tikintisi, təmiri istismarı başa çatmış özüllərin sökülməsi, sualtı boru xətlərinin çəkilməsi-sökülməsi və sair) barədə HDQ Hidroqrafiya İdarəsinə, eləcə də Dövlət Dəniz və Liman Agentliyinə məlumat verəcək.

HDQ-nin Hidroqrafiya İdarəsi ilk növbədə Səngəçalda (N.Nərimanov NQÇİ) SOCAR tərəfindən görülmüş işlərə müvafiq olaraq dəniz xəritələrinin yenilənməsini, Xəzər dənizinin elektron xəritələrinin müvafiq standart və tələblərə uyğunlaşdırılmasını, Azərbaycan Respublikası ərazisində qeydiyyatdan keçmiş limanların dəniz akvatoriyası və gəmilərin yanalma körpülərinin yeni nəşr xəritələrində göstərilməsini, naviqasiya ədəbiyyatlarının korrektəsini təmin edəcək.

Bundan başqa, gəmi heyəti dənizdə xəritələrdə göstərilməyən uyğunsuzluq aşkar etdikdə (hər hansı üzən obyekt, dərinliklərin dəyişdirilməsi və sair) ASCO-ya məlumat verməli, öz növbəsində ASCO həmin məlumatların Hidroqrafiya İdarəsinə ötürülməsini təmin etməlidir.

Görüşdə sözügedən işlərin icrasına nəzarət məqsədilə aidiyyəti qurumların əməkdaşlarından ibarət komissiyanın yaradılması və komissiya üzvlərinin ayda bir dəfə toplanması barədə razılığa da gəlinib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.