CƏMİYYƏT


Xəzərlə bağlı Çərçivə Konvensiyasının 6-cı Tərəflər Konfransı oktyabrın 19-21-də Bakıda keçiriləcək

Lənkəran, 30 sentyabr, AZƏRTAC

Xəzər dənizi planetimizin unikal su hövzəsidir və sahilyanı dövlətlərin xalqları üçün qlobal əhəmiyyətə malik olan təbii sərvətləri ilə məşhurdur.

Hazırda Xəzər regionu həll olunmamış ekoloji problemlərin mənfi təsiri ilə bağlı bir sıra çətinliklərlə üzləşir. Bioresursların azalması, dəniz mühitinin çirklənməsi kimi antropogen təsirlərlə yanaşı, təbii mənşəli problemlər - iqlim dəyişikliyi nəticəsində dəniz səviyyəsinin uzunmüddətli enməsi dəniz ekosistemlərinin deqradasiyasına gətirib çıxarır. Xəzər dənizinin səviyyə tərəddüdləri sahilboyu zonaların vəziyyətinə və iqtisadiyyatın dənizlə bağlı olan bir sıra sahələrinə mənfi təsir göstərir.

AZƏRTAC xəbər verir ki, bunu ekologiya və təbii sərvətlər nazirinin müavini Rauf Hacıyev deyib.

Nazir müavininin sözlərinə görə, Xəzər dənizinin ətraf mühitinin mühafizəsi və təbii ehtiyatlardan səmərəli istifadə məsələləri Azərbaycanın milli siyasətinin prioritet istiqamətlərindəndir. Azərbaycanda Xəzər dənizinin ətraf mühitə mənfi təsirini minimuma endirmək üçün tədbirlər görüldüyünü bildirən R.Hacıyev deyib: “Xəzər dənizinin Azərbaycana mənsub olan bölməsində ekoloji vəziyyətin qiymətləndirilməsi, dənizin bioloji ehtiyatlarının və hidroloji vəziyyətinin öyrənilməsi və dəniz ətraf mühitinə mümkün neqativ təsirlərin müəyyənləşdirilməsi məqsədilə Ekologiya və Təbii Sərvətlər Nazirliyinin “Əlif Hacıyev” elmi-tədqiqat gəmisi ilə mütəmadi ekspedisiyalar keçirilir.

Bu gün nazirliyin fəaliyyət hədəflərindən biri də Xəzər dənizinin çirklənməsinin qarşısını almağa yönəlib. Çirkləndiricilərə qarşı ən sərt tədbirlər görülür.

Eyni zamanda, regional əməkdaşlığın, xüsusilə ekoloji problemlərin həllində Xəzəryanı ölkələrin səylərinin birləşdirilməsi üçün hüquqi baza yaradan “Xəzər dənizinin ətraf mühitinin mühafizəsi üzrə Çərçivə Konvensiyası”nın mühüm rolunu qeyd etmək lazımdır.

Yeri gəlmişkən, bu il oktyabrın 19-dan 21-dək Bakı şəhərində Konvensiyasının 6-cı Tərəflər Konfransının keçirilməsi nəzərdə tutulur.

Qeyd olunan konfransda Xəzəryanı ölkələrin ətraf mühit nazirlərinin başçılıq etdiyi xarici işlər nazirliklərinin və digər aidiyyəti qurumların yüksək vəzifəli əməkdaşlarının daxil olduğu nümayəndə heyətlərinin, Konvensiyanın katibliyi funksiyalarını yerinə yetirən Birləşmiş Millətlər Təşkilatının Ətraf Mühit Proqramının və digər beynəlxalq təşkilatların yüksək səviyyəli təmsilçilərinin iştirakı nəzərdə tutulur.

Konvensiyanın 6-cı Tərəflər Konfransının keçirilməsi bir sıra sənədlərin, o cümlədən Nazirlər Bəyannaməsi və Qərarlarının qəbul olunması, Konvensiyanın növbəti illər üzrə iş proqramı və büdcəsinin, Xəzər dənizinin ətraf mühitinin vəziyyətinə dair hesabatın, “Xəzər dənizində fövqəladə hallarda neftlə çirklənmə ilə mübarizə sahəsində regional əməkdaşlıq Planı”nın təsdiq edilməsi və Konvensiya Katibliyinin Bakıda yerləşdirilməsi ilə bağlı inzibati idarəetmə məsələləri barədə qərarın verilməsi baxımından vacib hesab olunur.

Bu gün Xəzər dənizinin ətraf mühitinin mühafizəsi və təbii ehtiyatlardan səmərəli istifadə məsələləri bütün Xəzəryanı ölkələrin milli siyasətinin prioritet istiqamətlərindəndir. Bu baxımdan mən inanıram ki, bu görüşdə qəbul olunmuş qərarlar əsasında Xəzəryanı ölkələr Xəzər dənizinin təbii mühitinin yaxşılaşdırılması üçün daha sıx əməkdaşlıq edəcəklər”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.