İQTİSADİYYAT


Xidmət sahələri və istehlakçılar daha mükəmməl davranış nümayiş etdirməlidirlər

Bakı, 9 iyul, AZƏRTAC

Son günlər COVID-19 pandemiyasının yayılmasının qarşısının alınması məqsədilə ticarət və xidmət sahələrinin işinə nəzarət daha da gücləndirilib. Qaydaları pozan obyektlərin səlahiyyətli əməkdaşları, eləcə də istehlakçılar qanunvericiliyə uyğun cərimə edilirlər.

Azad İstehlakçılar Birliyinin rəhbəri Eyyub Hüseynov AZƏRTAC-a deyib ki, bir müddət öncə xidmət və ticarət müəssisələrində COVID-19-la mübarizə çərçivəsində görülməli olan tədbirlər açıqlanıb: “Həmin qaydalara əsasən, obyektlərdə sanitar-məişət otaqlarının (sanitar qovşağı, soyunub-geyinmə otağı və sair), mətbəxlərin, heyət otaqlarının, xidmət zallarının mütəmadi dezinfeksiya edilməsi və digər təmizlik işlərinin aparılması, qida zallarında ara məsafənin gözlənilməsi, işçilərin qoruyucu maskadan, eləcə də dezinfeksiya məhlulundan düzgün istifadə etmələrinin təmin edilməsi və digər təlimatlara əməl olunması vacib şərtlər kimi qoyulur.

Xidmət sahələrində giriş-çıxışlardakı ayaqaltlıqlar, qapı və qapı tutacaqları, istehlakçıların şəxsi əşyalarının saxlanılması üçün nəzərdə tutulan dolablar və onların tutacaqları, məhsulların saxlandığı rəflər, stellajlar, daşındığı araba və səbətlər, çoxmərtəbəli müəssisələrdəki eskalatorlar və onların tutacaqları, liftlər, anbarlar, tullantı qabları, ödəniş terminalları, kassada yerləşən konveyerlər və s. mütəmadi qaydada dezinfeksiya olunmalıdır.

Birlik rəhbərinin sözlərinə görə, maskadan istifadə etməyən istehlakçıların ticarət və xidmət obyektlərinə buraxılması qadağan edilib. Girişdə isə onların temperaturu ölçülür və yalnız hər şey qaydasında olduğu təqdirdə, obyektə daxil olmağa icazə verilir: “Yaranmış şəraitə görə istehlakçılar, satıcılar, xidmət göstərən digər şəxslər daha mükəmməl davranış nümayiş etdirməlidirlər. Hər kəs başa düşməlidir ki, bütün bunlar insanların sağlamlığının qorunmasına, pandemiyanın qarşısının alınmasına xidmət edir. Müəyyənləşdirilmiş qaydalara sözsüz əməl olunmaqla bərabər, düşünürəm ki, digər məsələlərə də diqqət yetirilməlidir. Azad İstehlakçılar Birliyinə daxil olan müraciətlərdə kartlardan istifadə zamanı yoluxma ehtimalının yarandığını bildiriblər. Ticarət obyektlərində çalışan kassirlər yüzlərlə kartla təmasda olduqları halda, bəzən əllərini dezinfeksiya etməyə məhəl qoymurlar. Təəssüf ki, biz bəzən marketlərdə çalışan şəxslərin də maskadan istifadə etmədiyinin şahidi oluruq. Bütün bu məsələlərə ciddi nəzarət edilməlidir”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.