REGİONLAR
Xızıda Cəfər Cabbarlının xatirəsi anılıb
Sumqayıt, 11 iyun, Ətrabə Rzayeva, AZƏRTAC
Xızıda Cəfər Cabbarlının ev-muzeyində görkəmli ədibin xatirəsi anılıb. Tədbir Sumqayıt Regional Mədəniyyət İdarəsinin dəstəyi, Xızı rayon Cəfər Cabbarlı ev-muzeyi və Bakı şəhər Cəfər Cabbarlı ev-muzeyinin birgə təşkilatçılığı ilə baş tutub.
İdarədən AZƏRTAC-a bildirilib ki, tədbirə ev sahibliyi edən Sumqayıt Regional Mədəniyyət idarəsinin Xızı rayon nümayəndəliyi üzrə baş məsləhətçisi Möhsün Bağırov və Bakı şəhər Cəfər Cabbarlı ev-muzeyinin direktoru Qəmər Bağırova belə tədbirlərin önəmindən danışıblar.
Sonra söz-sənət ustalarının, elm və incəsənət xadimlərinin, Prezident yanında Dövlət İdarəçilik Akademiyasının tələbələrinin ədibin yaradıcılığı, zəngin ədəbi irsi, keşməkeşli həyat yolu ilə bağlı çıxışları dinlənilib.
Daha sonra şagirdlərin ifasında Cəfər Cabbarlının şeirləri səslənib.
Məşhur kamança ifaçısı, Xalq artisti Şəfiqə Eyvazova və qızı Mehri Əsədullayevanın, Əməkdar artist Rəşad İlyasovun ifasında Cəfər Cabbarlının sözlərinə yazılmış mahnılar, xalq və bəstəkar mahnıları, o cümlədən instrumental musiqi və muğamlar tamaşaçılar tərəfindən maraqla qarşılanıb.