MƏDƏNİYYƏT


Xocalı faciəsi haqqında çəkilən film beynəlxalq festivallarda uğur qazanıb

Bakı, 24 iyun, AZƏRTAC

Azərbaycan Televiziyasının istehsalı olan və Xocalı faciəsinə həsr edilən “26.02.92” adlı qısametrajlı film bir sıra nüfuzlu beynəlxalq festivallarda mükafatlara layiq görülüb.

AZƏRTAC xəbər verir ki, ekran işi “Ən yaxşı baş rolun ifaçısı”, “Rəssam işi”, “Qrim və qadın haqqında ən yaxşı film” və digər nominasiyalarda uğur qazanıb.

Türkiyədə bir neçə nominasiya üzrə, həmçinin Hindistanda “Crown Wood” beynəlxalq film festivalında yüksək mükafata layiq görülən filmin ABŞ və Avropa ölkələrində də uğur qazanacağı gözlənilir. “Andromeda” və Hollivud müstəqil kinematoqrafçılarının festivalları da bu qəbildəndir.

Filmin rejissoru Elvin Əhmədoğlunun sözlərinə görə, bu cür festivallarda iştirak etmək Azərbaycanı beynəlxalq aləmdə başqa bir rakursdan tanıtmaqla yanaşı, erməni vəhşiliyi və yalanları haqqında daha çox insana düzgün məlumat çatdırmaq nöqteyi-nəzərindən mühüm əhəmiyyətə malikdir.

Baş rolun ifaçısı Münəvvər Əliyeva filmin texniki və yaradıcı heyətinin mükəmməl olduğunu və bu komanda ilə çalışmaqdan böyük zövq aldığını bildirib. Aktrisa Azərbaycan Televiziyasının istehsalı olan və erməni dilində də yayımlanan bu filmdə yaratdığı obrazın öz daxili dünyasına yaxın olduğunu, doğmalarının Qarabağ münaqişəsi zamanı məcburi köçkün düşdüyünü və Xocalı ağrısını dərindən hiss etdiyini vurğulayıb. O, bu filmi sənətə qiymət verənlərin birgə əməyi kimi dəyərləndirib və qazanılan mükafatları da məhz bunun nəticəsi olduğunu bildirib.

Filmin ssenari müəllifi və rejissoru Elvin Əhmədoğlu, rəssamı Fəridbəy Kərimov, qrim ustası Eldar İsrafilov, montaj edəni Əhməd Qasımov, vizual qrafika işlərini görəni Rövşən Abiyev, rejissor assistenti Novruz Məmmədov, icraçı prodüseri Zamiq Əlövsətoğlu, layihə rəhbəri isə Ranar Musayevdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.