MƏDƏNİYYƏT


Xocalı faciəsinin qurbanları Gənc Tamaşaçılar Teatrında anılıb

Bakı, 22 fevral, Flora Şükürova, AZƏRTAC

Fevralın 22-də Azərbaycan Dövlət Gənc Tamaşaçılar Teatrında Xocalı faciəsinin 26-cı ildönümünə həsr edilmiş tədbir keçirilib.

AZƏRTAC xəbər verir ki, tədbir Müdafiə Nazirliyinin Həzi Aslanov adına Mərkəzi Zabitlər Evi (MZE) və Gənc Tamaşaçılar Teatrının birgə təşkilatçılığı ilə reallaşıb.

Anım tədbiri dövlət himninin səslənməsi və soyqırımı qurbanlarının xatirəsinin bir dəqiqəlik sükutla yad edilməsi ilə başlayıb. Daha sonra teatrın pedaqoq-təşkilatçısı, Əməkdar Artist Ötkəm İsgəndərov Azərbaycan xalqının erməni millətçiləri tərəfindən davamlı olaraq etnik təmizləmə, soyqırımı siyasətinə məruz qalmasından, öz tarixi torpaqlarından qovularaq qaçqın və məcburi köçkünə çevrilməsindən danışaraq Xocalı soyqırımının heç zaman unudulmayacağını vurğulayıb.

Natiq 1992-ci il fevralın 25-dən 26-na keçən gecə Ermənistan qoşunlarının Xocalı şəhərinə hücumu nəticəsində 613 nəfərin öldürüldüyünü, bu soyqırımı faktının dünyada tanısılmasını, cinayətkarların cəza alacağına inamı qeyd edib.

Tədbir iştirakçıları teatrın repertuarında yer alan S.Elsevərin Xocalı faciəsinə həsr edilmiş “Arzu və Murad” tamaşasına baxıblar. Tamaşanın quruluşçu rejissoru Gülnar Hacıyeva, bədii rəhbəri teatrın baş rejissoru, Əməkdar incəsənət xadimi Bəhram Osmanovdur.

Tamaşaya baxışdan sonra Azərbaycan Respublikası Müdafiə Nazirliyinin H.Aslanov adına Mərkəzi Zabitlər Evinin təbliğat və hərbi kütləvi iş bölməsinin rəisi, kapitan Ramil Qasımov çıxış edərək bildirib ki, Xocalı soyqırımı tarixə qanla yazılan faciədir. Bu faciə illər, əsrlər ötsə də xalqımızın yaddaşından silinməyəcək və soyqırımı qurbanlarının xatirəsi daim yaddaşlarda yaşayaraq, ruhları əziz tutulacaq. Bu gün bizim güclü ordumuz var. O güclü ordunun rəşadətli oğulları soyqırımı qurbanlarının erməni daşnaklarından qisasını alacaq , ata-baba torpağını düşmən torpaqlarından azad edəcək , üçrəngli bayrağımızı Qarabağ torpaqlarında dalğalandıracaq.

Tədbirin sonunda MZE-nin nümayəndəsi kapitan R.Qasımov Müdafiə Nazirliyi Mənəvi-Psixoloji Hazırlıq və İctimaiyyətlə Əlaqələr idarəsinin rəisi general-mayor Rasim Əliyevin adından teatrın rəhbərliyi və kollektivinə təşəkkürünü bildirib. Tamaşanın yaradıcı heyəti gənc nəslin hərbi vətənpərvərlik ruhunda tərbiyəsində göstərdikləri təşəbbüsə görə Fəxri fərmanla təltif edilib.

Qeyd edək ki, səhnə əsərində əsas obrazları Əməkdar Artist Gülər Nəbiyeva, aktyorlar Səbinə Məmmədova, Güşvər Şərifova, Nuriyə Əliyeva, Anar Seyfullayev, Eşqin Quliyev, Vüsal Mehrəliyev, Kərəm Hadızadə, Elşən Şıxəliyev və İlham Əsədov ifa edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.