QAN YADDAŞI


Xocalı soyqırımı qurbanlarının xatirəsi Batumidə də ehtiramla anılıb

Tbilisi, 25 fevral, AZƏRTAC

Azərbaycan Respublikasının Batumi şəhərindəki baş konsulluğu tərəfindən Xocalı soyqırımının 28-ci ildönümünə həsr olunmuş tədbir keçirilib.

AZƏRTAC xəbər verir ki, tədbirdə Acarıstan MR-in hökumət rəsmiləri, Türkiyənin və İranın Batumidəki baş konsulları, SOCAR-Batumi heyətin rəhbəri, Kulevi QDT direktoru Azərbaycan və gürcü ictimaiyyətinin nümayəndələri, Batumi Dövlət Universitetinin professor-müəllim heyəti və tələbələri, M.F.Axundov adına Gürcüstan-Azərbaycan xeyriyyə cəmiyyətinin əməkdaşları iştirak ediblər.

Mərasimdə əvvəlcə Xocalı soyqırımı qurbanlarının xatirəsini bir dəqiqəlik sükutla yad olunub.

Baş konsul Pərviz İsmayilzadə tədbirdə çıxışında qeyd edib ki, Xocalı faciəsi Azərbaycan xalqına və insanlığa qarşı törədilmiş ən ağır cinayətlərdən biridir. 1992-ci il fevralın 25-dən 26-na keçən gecə Ermənistan silahlı qüvvələri SSRİ dövründən Xankəndi şəhərində yerləşən 366-cı motoatıcı alayın zirehli texnikası və hərbi heyətinin köməkliyi ilə Xocalı şəhərində günahsız dinc əhaliyə, o cümlədən qadın, qoca və uşaqlara qarşı ən qəddar cinayətlər törətmişlər. Nəticədə, fevralın 26-sı Xocalı tam alova büründü. Bir günün içində yer üzündən silinən şəhəri tərk edən 2500 Xocalı sakinindən 613-ü vəhşicəsinə öldürüldü. Bu soyqırımı nəticəsində 63 uşaq, 106 qadın, 70 yaşlı Xocalı sakini qətlə yetirildi, 8 ailə tamamilə məhv edildi, 25 uşaq hər iki valideynini, 130 uşaq valideynlərindən birini itirdi. Yaralanan 487 nəfərdən 76-sı uşaq idi. 1275 xocalılı əsir, 150 xocalılı itkin düşdü. Xocalı soyqırımı özünün siyasi-hüquqi qiymətini yalnız ümummilli lider Heydər Əliyev hakimiyyətə qayıtdıqdan sonra aldı və bundan sonra Azərbaycan reallıqlarının beynəlxalq ictimaiyyətə çatdırılması üzrə məqsədyönlü tədbirlər görülməyə başlandı. Məhz Ümummilli Liderin təşəbbüsü ilə 1994-cü ildə Azərbaycan parlamenti fevralın 26-sını Xocalı Soyqırımı Günü elan edib.

Baş konsul bildirib ki, bu gün Azərbaycan dünya birliyinə dinc əhaliyə qarşı soyqırımı, Xocalı faciəsinin tanınması, o cümlədən Azərbaycan xalqına qarşı erməni millətçiləri tərəfindən törədilmiş bir çox cinayətlər haqqında həqiqəti çatdırmaq üçün məqsədyönlü və ardıcıl fəaliyyət həyata keçirir.

P.İsmayilzadə həmçinin, vurğulayıb ki, 2008-ci il mayın 8-dən etibarən Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət!” beynəlxalq təşviqat kampaniyasına start verilib. Ötən müddət ərzində “Xocalıya ədalət” kampaniyası çərçivəsində dünyanın çox ölkəsində müxtəlif tədbirlər həyata keçirilib.

Mərasimdə hüquq üzrə ekspert professor Rostom Quntaişvili bu faciəni Azərbaycan xalqına qarşı soyqırımı kimi xarakterizə edib. R.Guntaşivili iştirakçıları qardaş Azərbaycan xalqına dəstək verməyə çağırıb.

Tədbirdə Baş konsulluq tərəfindən məktəb şagirdləri arasında “Xocalıya ədalət!” rəsm müsabiqəsinin qalibləri də mükafatlandırılıblar.

Baş konsulluq tərəfindən təşkil olunan Azərbaycan dilinin bazar günü məktəbin gürcü və azərbaycanlı şagirdlər arasında Azərbaycan dilini oxumağa meyilli olan ən fəal şagirdi Lizi Ninidze müsabiqədə qalib oldu.

Baş konsulluğun Azərbaycan dilinin bazar günü məktəbinin şagirdləri Xocalı soyqırımına həsr olunmuş şeirlər söyləyib, kompozisiya təqdim ediblər.

Sonda müsabiqə iştirakçılarına Baş Konsulluq tərəfindən xatirə hədiyyələri təqdim edilib.

Mərasim və baş konsulun müsahibəsi “Acariya TV” kanal tərəfindən işıqlandırılıb.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.