SİYASƏT
YAP Səbail rayon təşkilatının rayon şurasının və ərazi ilk partiya təşkilat sədrlərinin onlayn formatda iclası keçirilib
Bakı, 9 iyul, AZƏRTAC
İyulun 9-da YAP Səbail rayon təşkilatında rayon şurasının və ərazi ilk partiya təşkilat sədrlərinin onlayn formatda növbəti geniş tərkibli iclası keçirilib.
AZƏRTAC xəbər verir ki, iclasa sədrlik edən YAP Səbail rayon təşkilatının sədri professor Şəmsəddin Hacıyev koronavirus (COVID-19) epidemiyası ilə mübarizə çərçivəsində ölkəmizdə həyata keçirilən ardıcıl, sistemli və qabaqlayıcı tədbirlər, dövlətimizin başçısının qəbul etdiyi qərarlar və hökumət tərəfindən atılan addımlar haqqında danışıb. Bildirib ki, bütün bəşəriyyət üçün qlobal sınağa çevrilmiş koronavirus pandemiyası, bu pandemiya ilə əlaqədar respublika ərazisində tətbiq olunan xüsusi karantin rejimi bir daha göstərdi ki, Azərbaycan Prezidenti üçün əhalinin sağlamlığı prioritetdir. Yaranmış iqtisadi təzyiqə baxmayaraq, hökumət tərəfindən sosial dövlət konsepsiyasına uyğun olaraq sosial proqramlar davam etdirilir və özünütəcrid şəraitində vətəndaşlara maksimum sosial-iqtisadi dəstək göstərilir, səhiyyə sisteminin virusla mübarizə üçün hazır vəziyyətə gətirilməsi məqsədilə təxirəsalınmaz tədbirlər vaxtında icra olunur.
Ş.Hacıyev deyib: “Pandemiya ilə mübarizənin 6 aylıq təcrübəsi göstərdi ki, bu ümumbəşəri bəla ilə mübarizə üçün ölkələr ayrı-ayrılıqda deyil, yalnız bütün səylərini birləşdirərək uğur qazana bilərlər. Təəssüf ki, hətta inkişaf etmiş bəzi ölkələrdə virusdan ölüm hallarının sayının artmasına baxmayaraq, iqtisadi tənəzzülün aradan qaldırılması prioritet vəzifə kimi irəli sürülür. Azərbaycan Respublikasının Prezidenti, Yeni Azərbaycan Partiyasının sədri İlham Əliyev isə bu məsələdə tamamilə fərqli mövqe nümayiş etdirdi, insani dəyərlərə, həmrəyliyə, əməkdaşlığa həmişə olduğu kimi bu dövrdə də sadiq qaldı və pandemiyaya qarşı ən mütərəqqi mübarizə modelini nümayiş etdirdi. Təsadüfi deyil ki, möhtərəm Prezidentimiz pandemiyanın dünyada sürətlə vüsət aldığı ilk gündən etibarən real addımlar atdı, konstruktiv təkliflərlə dünya ölkələrini bu pandemiyaya qarşı mübarizədə birliyə, həmrəyliyə dəvət etdi. Prezident İlham Əliyevin təşəbbüsü ilə Türk Şurasının və Qoşulmama Hərəkatının Zirvə görüşləri keçirildi. Həmçinin dövlətimizin başçısı pandemiya ilə mübarizə məqsədilə BMT Baş Assambleyasının Xüsusi sessiyasının keçirilməsi təşəbbüsü ilə çıxış etdi və dünyanın 130-dan çox ölkəsi Azərbaycan Prezidentinin bu təşəbbüsünü dəstəklədi. Bu hadisə Azərbaycan üçün diplomatik tarixi uğurdur”.
İclasda Baş Nazirin müavini, Yeni Azərbaycan Partiyasının sədr müavini-icra katibi Əli Əhmədovun sədrliyi ilə iyunun 13-də keçirilmiş müşavirədə rayon partiya təşkilatları qarşısında qoyulan vəzifələr, o cümlədən partiya üzvlərinin uçot qeydiyyatı məsələləri haqqında iclas iştirakçılarına ətraflı məlumat təqdim olunub və bütün ərazi ilk partiya təşkilatları sədrlərinə bu vəzifələrdən irəli gələn konkret tapşırıqlar verilib.
Sonra məsələ ilə bağlı çıxışlar dinlənilib və qarşıda duran vəzifələrlə bağlı təkliflər səsləndirilib.