REGİONLAR
YAP rayon təşkilatları ictimai-siyasi həyatda fəallıqları ilə seçilir
Naxçıvan, 18 oktyabr, AZƏRTAC
Yeni Azərbaycan Partiyası (YAP) Culfa Rayon Təşkilatı ərazi ilk partiya təşkilatları ilə əlaqəni gücləndirib, birgə ideoloji işin aparılması üçün bütün imkanlardan istifadə edilib.
AZƏRTAC-ın Naxçıvan bürosu xəbər verir ki, bu barədə təşkilatın növbəti şura iclasında ətraflı söhbət açılıb, ərazi ilk təşkilatların bu ilin 9 ayında gördükləri işlər və qarşıda duran vəzifələr müzakirə olunub.
Tədbirdə YAP Culfa Rayon Təşkilatının sədri, Naxçıvan Muxtar Respublikası Ali Məclisinin deputatı Qadir İbrahimov dövlət müstəqilliyinin qorunub saxlanılmasında ümummilli lider Heydər Əliyevin çoxşaxəli fəaliyyətindən danışıb, bu gün ölkəmizdə, o cümlədən muxtar respublikada həyata keçirilən genişmiqyaslı quruculuq tədbirlərinin müstəqilliyimizin bəhrəsi olduğunu vurğulayıb.
“Ölkəmizin, o cümlədən muxtar respublikamızın dünya miqyasında tanınması, beynəlxalq tədbirlərin, yarışların yüksək səviyyədə ardıcıl keçirilməsi, 2018-ci ildə Naxçıvan şəhərinin İslam Mədəniyyətinin Paytaxtı və ölkəmizin Gənclər Paytaxtı seçilməsi hər birimizdə qürur hissi doğurur”, - deyən Qadir İbrahimov qeyd edib ki, Naxçıvan şəhərində “Avropa günləri”nin təşkil olunması muxtar respublikaya olan etimadın və tədbirlərin yüksək səviyyədə keçirilməsinə inamın ifadəsi kimi dəyərləndirilir.
Bildirilib ki, 2018-ci ilin 9 ayında Yeni Azərbaycan Partiyasının Nizamnamə və Proqramından irəli gələn müddəaların yerinə yetirilməsi, partiya intizamının və ideoloji işin gücləndirilməsi sahəsində xeyli işlər görülüb, rayonda partiya üzvləri arasında intizam gücləndirilib, partiya sıralarına qəbul zamanı siyasi bilik və intellektual potensial nəzərə alınıb, təşkilatın tərkibində keyfiyyət və kəmiyyət dəyişikliklərinə nail olunub. Naxçıvan şəhərinin Gənclər Paytaxtı seçilməsi ilə bağlı təşkilatın Gənclər Birliyi tərəfindən müxtəlif mədəni-kütləvi tədbirlər keçirilib, mart ayında “Gənclər bağı” salınıb. Gənclər Birliyi ilə rayon Gənclər və İdman İdarəsi birgə tədbirlər reallaşdırırlar. Rayonun ictimai-iqtisadi həyatında, keçirilən müxtəlif mədəni-kütləvi tədbirlərdə, çağırışçıların hərbi xidmətə yolasalma mərasimlərində, idman yarışlarında, müsabiqələrdə və digər tədbirlərdə partiya üzvü olan gənclər fəal iştirak edirlər.
Qeyd olunub ki, rayon Qadınlar Şurası ötən 9 ayda fəaliyyətini daha da genişləndirib. Hazırda təşkilatın təhsil üzrə 908, mədəniyyət üzrə 186, idarəetmədə 31 və digər sahələr üzrə 1143 nəfər qadın partiya üzvü var. Onların 811 nəfəri ali təhsillidir. Ərazi ilk partiya təşkilatı sədrlərindən 12 nəfəri qadındır. Gənclərlə, qadınlarla aparılan işlər daim diqqət mərkəzində olmalıdır. Bu sahədə ideoloji işin təşkilinə xüsusi önəm verilməli, partiya üzvlərinin nəzəri bilikləri, gənclərin partiya orqanlarında rolu artırılmalı, Azərbaycançılıq, dövlətçilik, millilik və vətənpərvərlik mövzusunda tədbirlər keçirilməlidir.
Şura iclasında YAP Culfa Rayon Təşkilatı Gənclər Birliyinin sədri Təbriz Hüseynzadə, Qadınlar Şurasının sədri Xanım Tağıyeva, Culfa Şəhər Musiqi Məktəbi ərazi ilk partiya təşkilatının sədri Samirə Səfərova, Yaycı kənd ərazi ilk partiya təşkilatının sədri Vaqif Abdullayev çıxış ediblər.
Sonda bir qrup gənc partiya sıralarına qəbul olunub.
X X X
YAP Sədərək Rayon Təşkilatında 2018-ci ilin doqquz ayı ərzində görülmüş işlərin yekunları və qarşıda duran vəzifələrlə bağlı keçirilən yığıncaqda təşkilatın sədri, Naxçıvan Muxtar Respublikası Ali Məclisinin deputatı Arif Qasımov hesabat məruzəsi ilə çıxış edib.
Bildirilib ki, təşkilat fəaliyyətini ilin əvvəlində təsdiq olunmuş iş planı əsasında qurub. Vaxtlı-vaxtında keçirilən partiya yığıncaqlarında görülən işlərin hesabatı dinlənilib, işin keyfiyyətinin yüksəldilməsi üçün məqsədyönlü tədbirlər həyata keçirilib. Qeyd olunub ki, bu il prezident seçkilərində xalqımız bir daha tarixi seçim edərək sabitliyə, inkişafa, sosial-iqtisadi və mədəni-mənəvi tərəqqiyə, demokratik dəyərlərə səs verib, İlham Əliyevə sarsılmaz etimad göstərdiyini bir daha nümayiş etdirib. Ölkəmizdə yüksək səviyyədə baş tutan bu siyasi kampaniyada Sədərək Rayon Təşkilatının üzvləri də fəallıq göstəriblər.
Vurğulanıb ki, bu ilin ötən dövründə təşkilatın idarə heyətinin 9, şuranın 3 iclası keçirilib. Hesabat dövründə rayon partiya təşkilatının sıralarına 36 nəfər üzv qəbul edilib. Hazırda 21 ərazi ilk partiya təşkilatının 1523 nəfər üzvü var. Partiya üzvlərinin 302 nəfəri qadın, 404 nəfəri isə gəncdir.
Arif Qasımov deyib ki, qarşıda duran əsas vəzifə əhali arasında ideya-siyasi işi gücləndirməkdən ibarət olmalıdır. Tutduğu vəzifədən asılı olmayaraq, hər bir partiya üzvü Proqram və Nizamnamənin tələblərinə, prinsiplərinə əməl etməli, siyasi proseslərdə, rayonda gedən quruculuq-abadlıq işlərində, yaşıllaşdırma tədbirlərində və qarşıya qoyulan digər vəzifələrin həyata keçirilməsində fəallıq göstərməlidir.
Məruzə ətrafında partiya fəallarının çıxışları olub. Yığıncaqda təşkilatın Qadınlar Şurasının sədri, Naxçıvan Muxtar Respublikası Ali Məclisinin deputatı Vüsalə Əliyeva, təşkilatın Gənclər Birliyinin sədri Polad Rzazadə, Sədərək kənd ərazi ilk partiya təşkilatının sədri Əjdər Məmmədhəsənov, Heydərabad qəsəbə ərazi ilk partiya təşkilatının sədri Vüqar Qasımov çıxış ediblər.