MƏDƏNİYYƏT
YAY Qalereyasında Əməkdar Rəssam Hüseyn Haqverdinin “Qırılma” adlı fərdi sərgisi açılıb
Bakı, 10 oktyabr, AZƏRTAC
YAY Qalereyasında Əməkdar Rəssam Hüseyn Haqverdinin “Qırılma” adlı fərdi sərgisi açılıb.
AZƏRTAC xəbər verir ki, “Qırılma” sərgisi – fərqli bir palitra, fərqli bir hekayə olsa da, dialoq sistemi əsasında fiziki gerçəklikdən kənara çıxan yaradıcılığın təzahürüdür. Bu layihəni bəlkə də “rəngin təbiətini hədəfə alan tədqiqat” adlandırmaq olardı, ancaq Hüseyn Haqverdinin əsərlərinin xarakteri buna heç də tam əsas vermir. Sənətkar intuisiya ilə kor-koranə hərəkət edir, materialın fakturası, görünüşü ilə dialoqa girir, cizgiləri və rəng laylarını bir araya gətirərək danışdırır, özünü rənglərin yeni “sədaları” dalğasına “kökləyir”.
Sərgidə sənətkarın yaradıcı dəst-xəttinə xas olan işlər – qarışıq texnikada hazırlanmış qrafika, rəngkarlıq, daşdan və ağacdan hazırlanmış heykəltəraşlıq əsərləri təqdim olunur.
Hüseyn Haqverdinin əsərləri zəncirvarı reaksiya kimi suallar doğurur. Həmin suallar alışdığımız "üslub" anlayışının tərk etdiyi və bu günün postmodernist dövrünə həyəcan qatan düşüncələr oyadır. Rəssamın yaradıcılığına aid edildikdə isə, bunu dialoq sisteminin qurulması kimi müəyyən etmək olar.
Bu modeli sənətkar ilk dəfə “Daş” adlı layihəsində təklif edib. Layihənin məğzini Abşeron daşından hazırlanmış heykəllər deyil, dialoq prinsipi təşkil edib. Dialoq əsnasında bir-birini hissiyyat baxımından tamamlayan, bir-biri ilə söhbətləşən, qarşılıqlı cazibə qüvvəsinə malik olan daşlardan ibarət balaca qalaktika ab-havası yaradılıb.
Hüseyn Haqverdinin “Hüdudları aşaraq” adlı növbəti layihəsi Venesiya Biennalesində təqdim olunaraq, dialoq sistemini inkişaf etdirməklə yeni müstəviyə çıxarıb. Dialoq burada zaman körpüsü konseptini təşkil edərək, bizim dövrü 1960-cı illərin Azərbaycan rəssamlarının andeqraund cərəyanı ilə birləşdirib. Rəssam qaraya boyadığı ağac instalyasiyalarından ibarət labirint ekspozisiyası yaradıb. Qara xaos – rəssamın atasının da məxsus olduğu bir nəslin keçdiyi yolu, yaşadığı həyatı ifadə edən metaforadır.
Hüseyn Haqverdi 2003-cü ildən Azərbaycanın Əməkdar Rəssamı fəxri adını daşıyır, Əzim Əzimzadə adına Bakı Rəssamlıq Məktəbinin (1975) və V.İ. Muxina adına Leninqrad Ali Rəssamlıq-Sənaye Məktəbinin (1980) məzunudur. Rəssam müxtəlif vasitələrlə və müxtəlif janrlarda, o cümlədən heykəltəraşlıq, rəngkarlıq, şəkil, monumental incəsənət sahələrində işləyir; yaratdığı əsərlərdə əsasən irihəcmli formalara üstünlük verir. O, Bakı Kafedral Kilsəsində yerləşən Müqəddəs Məryəm heykəlinin, habelə Səngəçal terminalında epik məzmunlu mozaik pannonun, Bakıda rəssam Cavad Mircavadovun və Moskvada bəstəkar Qara Qarayevin xatirə lövhələrinin müəllifidir.
Hüseyn Haqverdinin “Qırılma” adlı fərdi sərgisi noyabrın 10-dək davam edəcək.