AZƏRTAC xəbər verir ki, aprelin 12-də Azərbaycanın yığma futbol komandası Tofiq Bəhramov adına Respublika stadionunda 2002-ci il dünya çempionatının bürünc mükafatçısı Türkiyə millisi ilə yoldaşlıq görüşü keçirmişdir. Türkiyədə və Avropada milli futbol çempionatları davam etdiyindən, rəqib komandanın baş məşqçisi Fatih Terim Bakıya əsas heyəti gətirə bilməmişdi.

Qarşılıqlı hücumlar şəraitində keçən ilk hissədə hər iki tərəfin fərqlənmək imkanı olsa da, qapılara top vurulmadı - 0:0.

İkinci hissədə isə Azərbaycan millisi hesabı açdı. Yığmamızın əks-hücumu zamanı Türkiyə millisinin 2 nömrəli oyunçusu Topuz Mehmet cərimə meydançasında boş qapıya ünvanlanan topu əli ilə çıxardığına görə, rəqib qapısına təyin olunan 11 metrlik cərimə zərbəsini Rəşad Sadıqov dəqiq yerinə yetirdi - 1:0. Lakin, bundan sonra, hücumların kəsərini artıran Fatih Terimin yetirmələri 77-ci dəqiqədə Hasan Kabzenin qolu sayəsində hesabı bərabərləşdirdilər - 1:1. Görüş bu hesabla başa çatmışdır.

Beləliklə, yığma komandamızın bu il keçirdiyi ikinci yoldaşlıq oyunu da heç-heçə başa çatdı. Xatırladaq ki, fevralın sonlarında Bakıda Ukrayna yığması ilə keçirilən görüş də 0:0 hesabı ilə qurtarmışdı.