REGİONLAR
“Yalama Aqropark”da əsas qaba yem komponenti olan silosluq qarğıdalı biçini aparılıb VİDEO
Xaçmaz, 6 sentyabr, Elxan Yusifli, AZƏRTAC
Bu il “Yalama Aqropark”da 349 hektar dənlik, 262 hektar silosluq qarğıdalı əkini aparılıb. Aqroparkda əsas qaba yem komponenti olan silosluq qarğıdalı biçininin ilkin mərhələsi artıq yekunlaşıb.
AZƏRTAC-ın bölgə müxbiri xəbər verir ki, silosluq qarğıdalının biçininə avqust ayının əvvəlindən başlanılıb. İlkin olaraq 125 hektar silosluq qarğıdalı sahələri biçilib. Təkrar əkin aparılan 137 hektar yemlik qarğıdalı sahələri isə sentyabr ayında biçiləcək.
“Yalama Aqropark” MMC-nin əkinçilik xidmətinin rəhbəri Rza Rzayev bildirib ki, ilkin mərhələdə biçilən silosluq qarğıdalı əkinindən 5 min ton yaşıl kütlə götürülüb. Orta hesabla hər hektardan 40 ton məhsuldarlıq əldə edilib.
“Yalama Aqropark”da qarğıdalı üzrə yüksək məhsuldarlıq səviyyəsinə nail olunması üçün istehsal sahələri üzrə innovativ yanaşma və müasir texnologiyadan istifadə olunur. Son illərdə aqroparkın sahələrində dənlik qarğıdalı əkini üzrə orta məhsuldarlıq, ümumilikdə, 15 ton və ondan yuxarı olub. Bu, ölkə üzrə qeydə alınan ən yüksək göstəricidir.
Aqroparkda sentyabrın 15-dən dənlik qarğıdalının toplanmasına başlanılacaq. Əldə olunan məhsul aqroparkdakı heyvandarlıq təsərrüfatlarının əsas qaba yem komponenti ilə təmin olunmasında istifadə edilir.
Aqroparkın əkin sahələrində yerli iqlim şəraitinə uyğun ənənəvi sortlarla yanaşı, digər hibrid qarğıdalı sortları da becərilir.
Qarğıdalı sahələrindən yüksək məhsul əldə etmək üçün bitkilərə aqrotexniki qulluq edilir. Əkin sahələri ziyanverici və alaq otlarına qarşı dərmanlanır, herbisid səpilir. Qarğıdalı sahələri ay ərzində müasir suvarma şəbəkəsi vasitəsilə 7-8 dəfə suvarılır. Aqroparkın ərazisində qarğıdalı ilə yanaşı, arpa, yonca, soya bitkiləri də becərilir.
Təsərrüfatın bu il üzrə ümumi əkin sahəsi 1500 hektardır. Bu ilin məhsulu üçün aqroparkın əkin sahələrində 583 hektar dənlik arpa əkilib. Bundan əlavə, 200 hektar da qarışıq yem üçün əkin aparılıb. Aqroprakda 59 hektar sahədə toxumluq arpa da əkilib. Həmin sahələrdə məhsuldarlıq 65 sentnerdən çox olub.
Hazırda “Yalama Aqropark”da 3105 baş simmental cins heyvan bəslənilir ki, onlardan 980 başdan çoxu sağmal heyvandır. Təsərrüfatda il ərzində 1350 baş bala əldə edilib.
“Yalama Aqropark”da innovativ üsullardan və müasir texnologiyadan istifadə edildiyindən istehsal sahələri üzrə ölkədə ən yüksək məhsuldarlıq səviyyəsinə nail olunub. Hazırda müəssisədə gündəlik süd istehsalı 18-20 ton təşkil edir. Aylıq göstərici isə 650 tona yaxındır. Bir il ərzində diri çəkidə ət istehsalı isə 360 tondan çoxdur.
Qeyd edək ki, Azərbaycanda yaradılan ilk aqropark Xaçmaz rayonunun Yalama qəsəbəsində yerləşir. 2016-cı il sentyabrın 8-də Prezident İlham Əliyevin iştirakı ilə “Yalama Aqropark”ın açılış mərasimi keçirilib. Layihənin ilkin mərhələsinə uyğun olaraq, “Yalama Aqropark”da 3 min başlıq cins iribuynuzlu heyvandarlıq kompleksi, istehsal gücü saatda 5 ton olan yem zavodu yaradılıb.