SİYASƏT


Yalçın Hacızadə: Azərbaycan Ordusu xalqın qürurunu, gücünü və şərəfini özündə birləşdirir

Bakı, 26 iyun, AZƏRTAC

Azərbaycan Silahlı Qüvvələri Cənubu Qafqazın ən güclü ordusudur. Gücünə və peşəkarlığına görə Silahlı Qüvvələrimiz dünya ölkələrinin reytinqində də yüksək yerlərdədir.

Azərbaycan Ordusu tarixi bir yol keçib. Ordumuzun yaranması 1918-ci il iyunun 26-na təsadüf etsə də, qısa müddətdən sonra Azərbaycan Xalq Cümhuriyyətinin süqutu ilə bu proses dayandı. Dövlət müstəqilliyinin bərpası ilə Ordumuz 1991-ci ildə yenidən dirçəlməyə başladı. Azərbaycan Ordusunun formalaşması və inkişaf isə 1993-cü ildən sonra sürətləndi.

Bu fikirləri AZƏRTAC-a açıqlamasında Ana Vətən Partiyasının sədr müavini Yalçın Hacızadə söyləyib.

O qeyd edib ki, müstəqilliyimizin ilk illərində Azərbaycan Ordusu parçalanaraq, ayrı-ayrı şəxslərin rəhbərliyi altına düşüb. Ordu dövlətin təhlükəsizliyini, ölkənin ərazi bütövlüyünü qorumaqdan daha çox şəxsi maraqlara, intriqalara alət edilirdi. Ulu öndər Heydər Əliyevin 1993-cü ildə hakimiyyətə gəlişi ilə bir çox sahələrdə olduğu kimi ordu quruculuğunda da mühüm tədbirlər həyata keçirilməyə başladı. Döyüş meydanında plansız, rəhbərsiz və təminatsız qalan, fərariliyin baş alıb getdiyi Azərbaycan Ordusunda ruh yüksəkliyi, əzm yarandı. Silahlı Qüvvələr ayrı-ayrı şəxslərdən alınaraq dövlətin tam nəzarətinə keçdi. Qısa müddət ərzində görülmüş tədbirlər döyüş meydanında vəziyyətin müsbət istiqamətdə inkişafına şərait yaratdı. Ermənistan tərəfindən işğal olunmuş Füzuli və Ağdam rayonlarının bir sıra yaşayış məntəqələri düşməndən azad olundu.

“Azərbaycan Ordusunun bir çox zabit heyəti 1971-ci ildə ulu öndər Heydər Əliyev tərəfindən yaradılmış Cəmşid Naxçıvanski adına Hərbi Liseyin yetirmələridir. Hərbi təhsil sisteminin daha da təkmilləşdirilməsi, milli ruhlu, dövlətə bağlı Azərbaycan hərbçisinin formalaşdırılması üçün 1999-cu ildə Ümummilli Lider tərəfindən Hərbi Akademiyanın yaradılması haqqında Fərman imzalandı. Azərbaycan Ordusu qarşısında ən başlıca vəzifələr ərazi bütövlüyünün bərpa edilməsi və dövlətin suverenliyinin təmin edilməsi idi. İlham Əliyevin Prezident seçilməsi ilə bu istiqamətdə məqsədə çatmaq üçün ordumuzun inkişafı, təkmilləşməsi daha da sürətləndi. Dövlət büdcəsindən ən böyük maliyyə vəsaiti ordu quruculuğuna ayrıldı. Belə ki, müasir silahların, hərbi texnikanın alınmasına başlanıldı. Hərbi qulluqçuların maddi təminatının yaxşılaşdırılması istiqamətində məqsədyönlü işlər aparıldı. Hərbi əməkdaşlıq sahəsində beynəlxalq əlaqələrin qurulması, inkişaf etdirilməsi və şaxələndirilməsi ilə yanaşı, ölkənin milli müdafiə sənayesi də yaradıldı”, - deyə politoloq bildirib.

O əlavə edib ki, ölkəmizdə düşmən işğalına son qoymaq, qələbəni təmin etmək üçün hərb və siyasi idarəçilik nəzəriyyələrində göstərilmiş bütün şərtlər təmin edildi. Dövləti idarə edən liderə inam olduğu üçün, güclü ordu formalaşdı, ölkədə iqtisadi-siyasi sabitlik yaradıldı. Eyni zamanda, xalqımızın birliyi formalaşdı, həmçinin beynəlxalq münasibətlərdə dövlətlərlə və təşkilatlarla düzgün siyasi əlaqələr tənzimləndi.

Aparılan sülh danışıqlarının nəticəsizliyində torpaqların hərb yolu ilə işğaldan azad edilməsi üçün Azərbaycan dövləti tərəfindən siyasi şərait formalaşdırılmağa başladı. Xalq və ordu tərəfindən uzun illərdir gözlənilən əmr Prezident, Ali Baş Komandan İlham Əliyev tərəfindən 2020-ci ilin sentyabr ayının 27-də Azərbaycan Silahlı Qüvvələrinə verildi. Azərbaycan Ordusu hücum əməliyyatı ilə düşmənin 200 illik işğal planını 44 gündə məhv edərək, Ermənistanı təslim aktını imzalamağa məcbur etdi. Müharibə müddətində İlham Əliyev Azərbaycan Prezidenti, Ali Baş Komandan və Baş diplomat kimi dünyaya xalqımızın savadını, əzmini, milli ruhunu, vahidliyini təcəssüm etdirdi. Xalq – Ordu – Dövlət – Lider düsturu isə özünü doğrultdu.

Y.Hacızadə deyib: “Azərbaycan Silahlı Qüvvələrinin döyüş texnikası, qabiliyyəti dünya hərb tarixində dönüş etdi. Ordumuz texnologiyası sahəsində 4-cü nəsil silahlarının gücünü də dünyaya göstərdi. Bu gün Azərbaycan Silahlı Qüvvələri öz vəzifəsini layiqincə yerinə yetirərək, yeni döyüş birliklərinin yaradılması, müasir silahların əldə olunması, həmçinin istifadə edilməsi sahəsində fəaliyyətini və inkişafını davam etdirir. Azərbaycan Silahlı Qüvvələri xalqımızın tərkib hissəsidir. Ordumuz Azərbaycan xalqının qürurunu, gücünü və şərəfini özündə birləşdirir”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.