SİYASƏT
Yalçın Hacızadə: IX Qlobal Bakı Forumu Azərbaycanın öz mövqeyini dünyaya çatdırması üçün uğurlu platformadır
Bakı, 17 iyun, AZƏRTAC
Bu gün Azərbaycan regional və beynəlxalq əhəmiyyətli təbirlərin keçirildiyi bir mərkəzə çevrilib. Belə ki, ölkəmizdə beynəlxalq idman yarışları, mədəniyyət tədbirləri, konfranslar ən yüksək səviyyədə təşkil olunur. Əlbəttə ki, dövlətimizin beynəlxalq nüfuzu, ölkəmizdəki siyasi mühit, sabitlik və təhlükəsiz şərait belə tədbirlərin keçirilməsi üçün başlıca amillərdəndir.
Bu fikirləri AZƏRTAC-a açıqlamasında Ana Vətən Partiyasının sədr müavini Yalçın Hacızadə söyləyib.
O qeyd edib ki, bu günlərdə keçirilən Qlobal Bakı Forumu əhəmiyyətinə görə digərlərindən fərqlənir. Foruma maraq ildən–ilə artır və iştirakçıların sayı da çoxalır. IX Qlobal Bakı Forumunu əhəmiyyətli edən həm də onun proqram və mövzusunun aktuallığıdır. Dünyamızın xaosa sürükləndirildiyi, müharibələrin baş verdiyi, aclıq və səfalətin yarandığı, mövcud dünya düzəninin müxtəlif süni yollar və variantlarla dəyişdirilməyə çalışıldığı bir zamanda paytaxt Bakıda “Qlobal dünya nizamına təhdidlər” mövzusunda müzakirələrin aparılması dövlətimizin beynəlxalq aləmdə rolunun, baş verən prosesləri, mövcud problemləri gördüyünü, təhlil etdiyini, bunlarla bağlı proqram və planının olduğunun göstəricisidir.
“Dünya İqtisadi Forumu və Münxen Təhlükəsizlik Konfransı kimi müzakirə platformaları da var. Amma bu platformalarda müzakirə olunan sahələr konkretdir - iqtisadiyyat və təhlükəsizlik. Yəni, Bakı Forumunda müzakirə olunan məsələlər geniş və çoxşaxəlidir. Dünya nizamını təhdid edən problemlər müxtəlifdir və çoxdur. Bu mövzular əsasən sülhün və təhlükəsizliyin pozulması, nüvə təhdidləri, enerji təhlükəsizliyi, qloballaşan dünyada artan ədalətsizliklər, yoxsulluğun artması, miqrasiya problemləri, qida və ərzaq qıtlığının yaradılması, kənd təsərrüfatı sektorunun transformasiyası kimi mühüm məsələlərdir. Yəni, Qlobal Bakı Forumu bu mənada daha universal və əhatəlidir. Bu Forumda beynəlxalq gündəmdə olan bütün siyasi, iqtisadi, humanitar, mədəni, hərbi və digər mövzular müzakirə olunur”, - deyə Y.Hacızadə deyib.
O əlavə edib ki, ümumiyyətlə, bu cür beynəlxalq tədbirlər Azərbaycanın öz mövqeyini dünyaya çatdırması üçün uğurlu platformadır. IX Qlobal Bakı Forumunda 50-dən çox ölkədən 400-dək nümayəndə, o cümlədən dövlət və hökumət nümayəndələri, sabiq dövlət və hökumət başçıları, gənc liderlər iştirak edirlər. Albaniya, Bolqarıstan, Gürcüstan və digər ölkələrin rəhbərlərinin, çoxsaylı ölkələrin sabiq başçılarının, tanınmış ictimai-siyasi xadimlərin, aparıcı ekspertlərin, habelə Ümumdünya Səhiyyə Təşkilatının, Ərəb Dövlətləri Liqasının və digərlərinin sədrlərinin iştirakı, Böyük Britaniya, İtaliya, Latviya və digər ölkələrin rəhbərlərinin Foruma müraciətlər ünvanlamaları beynəlxalq aləmin bu tədbirə xüsusi diqqətlə yanaşdığının bariz nümunələridir.