SİYASƏT


Yalçın Hacızadə: Prezident İlham Əliyevin hakimiyyəti dövründə regionların sosial–iqtisadi inkişafı xüsusi diqqət mərkəzindədir

Bakı, 15 avqust, AZƏRTAC

Prezident İlham Əliyevin 19 illik hakimiyyəti dövründə regionların sosial–iqtisadi inkişafı xüsusi diqqət mərkəzindədir. Bu istiqamətdə geniş və çoxşaxəli layihələr hazırlanaraq həyata keçirilir. Dövlətimizin başçısı İlham Əliyevin və birinci xanım Mehriban Əliyevanın İsmayıllı və Ağsu rayonlarına səfəri də bu istiqamətdə həyata keçirilən növbəti tədbirlərdən biridir. Qeyri-neft sektorunun davamlı və rəqabətqabiliyyətli inkişafı dövlətin iqtisadi siyasətinin prioritet istiqamətlərindəndir. Müxtəlif sahələrlə yanaşı, ixtisaslaşmış turizm sənayesinin inkişafına dair Strateji Yol Xəritəsi də hazırlanıb. Qeyri-neft sektorunun inkişafında turizm sahəsinin xüsusi çəkisi var. Prezident İlham Əliyevin son səfəri zamanı turizm obyektlərinin açılışı, Azərbaycanın çoxəsrlik tarixini özündə əks etdirən abidələrin bərpası turizm potensialının yaradılmasıdır.

Qlobal pandemiyanın nəticələrinin aradan qaldırılması işlərinə, Vətən müharibəsindən sonra həyata keçirilən sosial layihələrə, Qarabağ və Şərqi Zəngəzur bölgəsində aparılan böyük bərpa və quruculuq fəaliyyətinə baxmayaraq, eyni zamanda, digər şəhər və rayonlarımızın da sosial-iqtisadi vəziyyəti yaxşılaşdırılır. Sosial-iqtisadi sahələrdə görülən fəaliyyətlər və bu işlərə dövlətimizin başçısının özünün birbaşa nəzarəti əlbəttə ki, çox sevindirici və təqdirəlayiq haldır.

Bu fikirləri AZƏRTAC-a açıqlamasında Ana Vətən Partiyası sədrinin müavini Yalçın Hacızadə söyləyib.

Politoloq qeyd edib ki, dünyada yaranan münaqişələr ərzaq təhlükəsizliyi məsələlərini də qabardır. Ölkəmizdə bu sahədə aparılan işlər gələcəkdə belə bir təhlükənin nəticələrinin aradan qaldırılması məqsədi daşıyır. İxrac olunan məhsullar üçün yeni bazarların müəyyən olunması, idxaldan asılılığın azaldılması başlıca şərtlərdir. Həmçinin idxaldan asılılığın aradan qaldırılması üçün həmin məhsulların istehsalının artırılması ərzaq təhlükəsizliyinin təmin olunmasına təkan verən amillərdəndir.

Torpaqlarımızın işğaldan azad olunması ilə əkinəyararlı sahələri və su ehtiyatlarını da əldə etdik. Həmin ərazilərdə həyata keçirilən infrastruktur layihələri ilə yanaşı, əkinəyararlı sahələrin becərilməsi ərzaq təhlükəsizliyi sahəsində görülən işlərdəndir. İşğal müddətində torpaqların yandırılması, hərbi məqsədlər üçün istifadə edilməsi, becərilməməsi, texniki qulluq edilməməsi məhsuldarlığı azaltsa da, indi görülən işlər gələcəkdə yüksəkkeyfiyyətli məhsul istehsalını təmin edəcək.

“Vətən müharibəsində Qələbədən sonra regionda yeni geosiyasi vəziyyət formalaşıb. Azərbaycan tərəfi bölgənin iqtisadi və kommunikasiya imkanlarından istifadə edə biləcək ölkələrə birgə əməkdaşlıq barədə təkliflər versə də, yeni reallıqlarla barışa bilməyən və münaqişələrdən qidalanan bəzi dövlətlər sabitliyin və inkişafın təmin edilməsində maraqlı olmadıqlarını göstərməkdədirlər. Hələ də başqalarından mədət uman, imzaladığı kapitulyasiya aktının şərtlərini yerinə yetirməyən Ermənistan, reallıqdan uzaq, revanş və işğal xülyaları ilə yaşayır. Halbuki bütün dünya ilə yanaşı, ermənilərə də agah oldu ki, Azərbaycan istədiyini etmək, öz maraqlarını və təhlükəsizliyini təmin etmək gücündədir. Həyata keçirilən son “Qisas” əməliyyatı bunun bariz nümunəsidir. Bu, onu göstərir ki, Azərbaycan məqsədlərinə çatmaq üçün bütün mümkün imkanlardan istifadə etməyə hazırdır. Prezident İlham Əliyevin mətbuata verdiyi son müsahibəsində Ermənistana ünvanlanmış “odla oynamasınlar”, “özlərini yaxşı aparsınlar”, “yeni reallıqları qəbul etsinlər”, “bizi heç kim və heç nə dayandıra bilməz”, “oxşar təxribat təkrarlanarsa, cavab daha da sərt olacaq, daha da peşman olacaqlar, daha da gur səslə imdad diləyəcəklər” xəbərdarlığı Azərbaycan dövlətinin gücünün, onun liderinin qətiyyətinin göstəricisidir”, - deyə Yalçın Hacızadə vurğulayıb.

O bildirib ki, alternativ yeni yolun inşası Laçın şəhərində, Zabux və Sus kəndlərində qanunsuz yerləşdirilmiş ermənilərin çıxarılmasını şərtləndirir. Laçın dəhlizinə alternativ yeni yolun salınması şərtinin üçtərəfli Bəyanata salınması Prezident İlham Əliyevin uzaqgörənliyinin nəticəsidir. Həmin ərazilərdə qanunsuz yerləşmiş ermənilər də paralel olaraq, Ermənistan dövləti tərəfindən çıxarılır. Əgər Laçında qanunsuz məskunlaşanları bizim dövlət çıxarmış olsaydı, ermənilər bütün dünyaya səs salacaqdılar ki, Azərbaycan üzərinə götürdüyü öhdəliyi yerinə yetirmir, erməniləri qovur. Halbuki Prezident İlham Əliyevin də dediyi kimi ermənilərin qanunsuz olaraq yerləşdirilməsi hərbi cinayət xarakteri daşıyır və Cenevrə konvensiyalarının qaydalarına ziddir.

Ermənistanın Azərbaycana qarşı ərazi iddialarını davam etdirməsi onun özünün müstəqilliyini, varlığını təhlükə altına salır. Ermənistan dövləti 1918-ci ildə tarixi Azərbaycan torpaqlarında qurulub. Tarixi Azərbaycan şəhəri olan İrəvanın Ermənistanın paytaxtı elan edilməsinə razılığın istənməsi, Zəngəzur mahalının Ermənistana verilməsi ilə bağlı əlimizdə hüquqi sənədlər var. Əlbəttə, bütün bunlar bizə imkan verir ki, Ermənistana qarşı torpaq iddiaları ilə çıxış edək.

Yalçın Hacızadə, həmçinin vurğulayıb: “Torpaqlarımızın işğalda qaldığı 30 ilə yaxın müddətdə Ermənistan Qarabağın “müstəqilliyi”, ermənilərin “statusu” məsələlərini qabardırdı. Amma indi onların heç biri müzakirə predmeti deyil. Müzakirələr Azərbaycan Ermənistan sərhədlərinin müəyyən edilməsi prizmasında gedir. Bütün bunlar Ermənistana dərs olmalıdır. Onlar reallıqları qəbul etməlidirlər, qonşuluq münasibətlərində yaşamağı öyrənməli, xəstə xülyalardan əl çəkməlidirlər. Dövlətimizin başçısı deyirdi: “Qarabağda yaşayan ermənilər düzgün addım atmalıdırlar, başa düşməlidirlər ki, onların gələcəyi ancaq Azərbaycan cəmiyyətinə inteqrasiyadan keçir. Başqa cür mümkün deyil. Yəni, biz real həyatda yaşayırıq. Həm iqtisadi, həm coğrafi, həm nəqliyyat, həm də tarixi və beynəlxalq hüquq nöqteyi-nəzərdən Qarabağ Azərbaycanın ayrılmaz hissəsidir. Əgər Qarabağda kimsə yenə də, bilmirəm, hansısa populizm naminə, yaxud da ki, indi, necə deyərlər, kimdənsə qorxduğu üçün hansısa statusdan, müstəqillikdən söhbət aparırsa, bilmək lazımdır ki, o, erməni xalqının birinci düşmənidir. Çünki Qarabağda yaşayan ermənilərin nə statusu olacaq, nə müstəqilliyi olacaq, nə də ki, hansısa xüsusi imtiyazı olacaq. Azərbaycan vətəndaşları necə, onlar da elə. Azərbaycan vətəndaşlarının hüquqları necə qorunursa, onların da elə. Azərbaycanda yaşayan xalqların hüquqları necə qorunursa, onların da elə. Ancaq budur yol fikirləri onlar üçün nəsihət və böyük şansdır”.

O əlavə edib ki, Ermənistan regionun ən zəif və beynəlxalq layihələrindən təcrid olunmuş, coğrafi mövqeyinə görə dalanda yerləşmiş ölkəsidir. Azərbaycan və Türkiyəyə qarşı torpaq iddiaları onun blokadada qalmasını şərtləndirib. Amma bütün bunlardan əl çəkməsi, yeni reallıqları qəbul etməsi Ermənistana beynəlxalq kommunikasiyalardan istifadə, dünya dənizlərinə rahat və qısa yollarla çıxış imkanı yaradır. Əlbəttə ki, bu imkanlar Ermənistanın üzərinə götürdüyü Zəngəzur dəhlizinin açılması öhdəliyini yetirə yetirdikdən sonra yarana bilər. Beynəlxalq yükdaşımaların artması, Rusiya–Ukrayna müharibəsi, Zəngəzur dəhlizinin Şərqlə Qərbi birləşdirəcək ən qısa yollardan olması bu dəhlizin beynəlxalq əhəmiyyətini və imkanlarını artırır. Zəngəzur dəhlizin açılması beynəlxalq tələbdir və Azərbaycanın enerji təhlükəsizliyi və digər sahələrdə oynadığı beynəlxalq rolunu daha da yüksəldəcək.

Zəngəzur dəhlizinin açılması şərtinin üçtərəfli Bəyanata daxil edilməsi dövlətimizin başçısının diplomatik məharətinin nəticəsidir. Eyni zamanda, Prezident İlham Əliyevin yeni dünya düzənini, müharibədən sonra regionun imkanlarını və Zəngəzur dəhlizinin beynəlxalq əhəmiyyətini əvvəlcədən görməsi deməkdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.