CƏMİYYƏT
Yanvar-iyun aylarında respublikada 848 yol-nəqliyyat hadisəsi baş verib
Bakı, 24 avqust, AZƏRTAC
Yanvar-iyun aylarında ölkənin avtomobil yollarında 848 yol-nəqliyyat hadisəsi baş verib. Bu, ötən ilin müvafiq dövrü ilə müqayisədə 6,3 faiz azdır. Həmin hadisələr nəticəsində zərər çəkən şəxslərin sayı 10 faiz azalaraq 1147 nəfər olub.
Dövlət Statistika Komitəsindən AZƏRTAC-a bildiriblər ki, onlardan 315-i həlak olub, 832-si isə yaralanıb. Hadisələrin 45,2 faizi gündüz, 38,1 faizi gecə, 16,7 faizi isə toran vaxtı baş verib. Yol-nəqliyyat hadisələrinin 88,9 faizi yaşayış məntəqələrində baş verib. Bu hadisələr nəticəsində həlak olanların sayı 2016-cı ilin müvafiq dövrünə nisbətən 16,1 faiz artaraq 223 nəfər, yaralananların sayı isə 13,7 faiz azalaraq 779 nəfər olub.
Bütün yol-nəqliyyat hadisələrinin 49,1 faizi nəqliyyat vasitələrinin və piyadaların, 32,5 faizi bir neçə nəqliyyat vasitəsinin, 18,4 faizi bir nəqliyyat vasitəsinin iştirakı ilə baş verib. Həlak olanların 78,7 faizini, yaralananların isə 73,9 faizini kişilər təşkil edib.
Nəqliyyat vasitələrinin sərxoş vəziyyətdə idarə olunması səbəbindən ölümlə və ya bədən xəsarəti alınması ilə nəticələnən 14 hadisə baş verib, nəticədə 9 nəfər ölüb, 13 nəfər isə yaralanıb. Belə hadisələrin 78,6 faizi minik avtomobillərinin sürücüləri tərəfindən törədilib.
Cari ilin yanvar-iyun aylarında yol hərəkəti qaydaları əleyhinə aşkarlanmış inzibati xətaların sayı əvvəlki ilin müvafiq dövrü ilə müqayisədə 12,1 faiz artaraq 1 milyon 555,4 min olub. Xətaların 51,1 faizi yolda müəyyən edilmiş hərəkət sürəti həddinin aşılması (ötən ilin müvafiq dövrü ilə müqayisədə 10,5 faiz çox), 11,1 faizi dayanma və ya durma qaydalarının pozulması (3,0 faiz çox), 10,4 faizi svetoforun və ya nizamlayıcının qadağanedici işarəsi verilərkən hərəkətin davam etdirilməsi (30,3 faiz çox), 9,5 faizi yol nişanlarının və ya yolların hərəkət hissəsinin işarələrinin tələblərinə riayət edilməməsi (83 faiz çox), 3,7 faizi təhlükəsizlik kəmərini bağlamadan nəqliyyat vasitəsinin idarə olunması (9,4 faiz az), qalan hissəsi isə digər səbəblər üzrə aşkarlanıb. Qaydaların pozulmasına görə 30,3 milyon manat məbləğində cərimələr tətbiq edilib.