DÜNYA


Yaponiya hökuməti tam tərkibdə istefa verib

Tokio, 16 sentyabr, AZƏRTAC

Baş Nazir Şinzo Abenin rəhbərlik etdiyi Yaponiya hökuməti sentyabrın 16-da tam tərkibdə istefa verib.

AZƏRTAC xəbər verir ki, bu barədə Yaponiya hökumətinin dəftərxanası məlumat yayıb.

Hökumətin istefasından sonra jurnalistlərlə görüşən Şinzo Abe Yaponiya ictimaiyyətinə hakimiyyətdə olduğu dövrdə göstərilən dəstəyə görə minnətdarlığını bildirib, yapon xalqını yeni yaranacaq Yoşihide Suqa hökumətini dəstəkləməyə çağırıb.

Yaponiya parlamentinin yaxın saatlarda yeni Baş nazirin namizədliyini dəstəkləmək üçün səs verəcəyi gözlənilir. Yaponiyanın Baş Naziri vəzifəsini hakim Liberal Demokratik Partiyanın yeni sədri Yoşihide Suqa tutacaq. Y.Suqa bundan sonra hökumətin yeni tərkibini elan edəcək.

Yerli KİV-lərin yaydığı məlumata görə, yeni hökumətdə vəzifələrin əksəriyyəti Şinzo Abenin son hökuməti dövründə hakimiyyətdə olmuş nazirlər tərəfindən tutulacaq. Əsasən, Taro Asonun Baş nazirin müavini və Maliyyə naziri, Toşimitsu Moteqinin isə Xarici İşlər naziri portfellərini saxlayacağı gözlənilir. Bununla yanaşı, Kaziyoşi Akabanın Dövlət Torpaqları, İnfrastruktur və Turizm naziri, xanım Seyko Haşimotonun Olimpiya və Paralimpiya Məsələləri naziri, Yasutoşi Nişimuranın isə İqtisadiyyatın Bərpası naziri vəzifələrində qalacaqları bildirilir. Hökumətdə Rusiya ilə iqtisadi əməkdaşlığa cavabdeh olmuş Hiroşi Kaziyamanın İqtisadiyyat, Ticarət və Sənaye naziri portfelini alacağı qeyd edilir.

Eyni zamanda, Müdafiə naziri Taro Konunun Dövlət İslahatlarına Cavabdeh nazir vəzifəsinə təyin ediləcəyi gözlənilir. Müdafiə naziri vəzifəsini isə Şinzo Abenin kiçik qardaşı, son hökumətdə Xarici İşlər nazirinin müavini olmuş Nobuo Kişi tutacaq.

 

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.