SİYASƏT


Yaponiya iş adamları Vətən müharibəsində Azərbaycanın Qələbəsini alqışlayıblar VİDEO

Tokio, 9 dekabr, AZƏRTAC

Azərbaycanda fəaliyyət göstərən Yaponiya şirkətlərinin nümayəndələri Vətən müharibəsində ölkəmizin qələbəsini alqışlayıblar.

AZƏRTAC xəbər verir ki, bu barədə Azərbaycanın Yaponiyadakı səfirliyində ölkəmizdə fəaliyyət göstərən yapon şirkətlərinin nümayəndələri ilə görüşdə bildirilib.

Əvvəlcə Vətən müharibəsi zamanı həlak olmuş şəhidlərin xatirəsi bir dəqiqəlik sükutla yad edilib.

Görüşdə çıxış edən Azərbaycanın Yaponiyadakı səfiri Gürsel İsmayılzadə sentyabrın 27-də Ermənistan silahlı qüvvələrinin atəşkəs rejimini kobud şəkildə pozaraq Ordumuzun cəbhə zonasında yerləşən mövqelərini və mülki əhalini atəşə tutması barədə danışıb. Vurğulayıb ki, Ermənistan silahlı qüvvələrinin mülki insanların sıx şəkildə yaşadığı yerləri və obyektləri intensiv şəkildə atəşə tutması nəticəsində çoxlu sayda insan həlak olub və yaralanıb, evlərə və digər mülki obyektlərə ciddi ziyan dəyib. Azərbaycan Silahlı Qüvvələri Ermənistanın növbəti hərbi təcavüzünün qarşısını almaq və təmas xətti boyunca sıx şəkildə yaşayan mülki əhalinin təhlükəsizliyini təmin etmək məqsədilə əks-hücuma keçib. Altı həftə davam edən döyüşlər işğal altında olan ərazilərin böyük bir hissəsinin azad edilməsi ilə başa çatıb.

Noyabrın 10-da Azərbaycan Prezidenti, Ermənistan baş naziri və Rusiya Prezidenti tərəfindən imzalanmış razılaşma hazırda həyata keçirilməkdədir. Həmin sənədə əsasən, Azərbaycanın 30 ilə yaxın müddətdə Ermənistan tərəfindən işğal olunmuş digər əraziləri də dekabrın 1-dək azad edilib. Oradan qovulmuş insanların öz evlərinə qayıdacağı bildirilib.

G.İsmayılzadə çıxışında Azərbaycan haqqında ümumi məlumat da verib, 1991-ci ildə müstəqilliyini bərpa edən Azərbaycanın ilk addımlarından bəhs edib. Bildirib ki, 1993-cü ildə ümummilli lider Heydər Əliyevin Azərbaycan xalqının təkidi ilə hakimiyyətə qayıtması, ölkəmizin dərin böhrandan çıxmasına, inkişaf yoluna qədəm qoymasına və güclü dövlətə çevrilməsinə zəmin yaradıb. Həmçinin səfir müasir Azərbaycanın bu gün Prezident İlham Əliyevin rəhbərliyi ilə dövlətçiliyin inkişafı yolunda inamla addımladığını, ölkədə davamlı sosial-iqtisadi islahatların həyata keçirildiyini vurğulayıb. Prezident İlham Əliyevin apardığı məqsədyönlü siyasət nəticəsində ölkəmizin son illərdə qazandığı böyük uğurlar barədə ətraflı məlumat verib, o cümlədən iqtisadiyyat, xüsusilə qeyri-neft sektorunun inkişafı ilə bağlı həyata keçirilən və gələcəkdə nəzərdə tutulan müxtəlif layihələr barədə ətraflı danışıb.

Qonaqlara ölkəmizdə açılmış yeni texnologiya və sənaye parkları, Yeni Bakı Limanı, Ələt İqtisadi Zonası barədə də məlumat verilib. Həmin obyektlərdə əlverişli biznes mühitinin və investisiya imkanlarının yaradılmasından bəhs olunub.

Çıxışının sonunda Azərbaycan-Yaponiya ikitərəfli münasibətlərinə toxunun səfir qeyd edib ki, iki dost ölkə arasındakı əlaqələr ümumi maraqlar, qarşılıqlı anlaşma və qarşılıqlı hörmət prinsiplərinə əsaslanır və iqtisadi əməkdaşlıq davamlı inkişaf edir. İki ölkə enerji sektoru da daxil olmaqla, digər sahələrdə iqtisadi əməkdaşlıq edir, ölkələrimiz arasında qarşılıqlı maraq kəsb edən və müxtəlif sahələri əhatə edən sıx əlaqələr mövcuddur.

Səfir nəzərə çatdırıb ki, azad edilmiş ərazilərdə iqtisadi inkişaf və yeni biznes mühiti üçün yaxşı imkanlar yaradılacaq və gələcəkdə bu sahədə də Azərbaycan ilə Yaponiya arasında əməkdaşlıq hər iki tərəf üçün faydalı olacaq.

Azərbaycanla əməkdaşlıq edən yaponiyalı iş adamları adından çıxış edən Taro Savada, ilk növbədə, Azərbaycan xalqını müharibənin Qələbə ilə sona çatması münasibətilə təbrik edib. Həlak olanların ailələrinə dərin hüznlə başsağlığı verərək, yaralıların tezliklə sağalmasını arzuladığını bildirib. Qeyd edib ki, xüsusən Gəncə şəhərinin atəşə tutulması nəticəsində həlak olmuş Azərbaycan vətəndaşlarının ailələrinə yardım etmək məqsədilə tədbirdə iştirak edən iş adamları və ölkəmizə rəğbət bəsləyən yapon dostları ilə bərabər maliyyə vəsaiti toplayıb.

Noyabrın 24-də Azərbaycana səfər etdiyini bildirən T.Savada Gəncə şəhərinin atəşə tutulması nəticəsində zərər çəkmiş ailələrə 6 min ABŞ dolları məbləğində zəruri gündəlik mallar alaraq çatdırıb. Bundan əlavə, 600 min yapon yeni (5700 ABŞ dolları) məbləğində vəsaitin də çatdırılması ilə bağlı səfirlik tərəfindən ona istiqamət göstərilməsini xahiş edib. Həmin vəsait haqqında sertifikat səfir G.İsmayılzadəyə təqdim olunub.

Artıq bir neçə müddətdir ki, Azərbaycanda tütün biznesi ilə məşğul olduğunu xatırladan T.Savada Oğuz və Tovuz rayonlarında yaratdığı müəssisələrdə 300 nəfər Azərbaycan vətəndaşının işlə təmin edildiyini bildirib. Nəzərə çatdırıb ki, hazırda tədbirdə iştirak edən iş adamlarının əksər hissəsi Azərbaycana səfər edərək, ölkəmizdə orta və kiçik biznes sahəsində iş qururlar. Qeyd edib ki, tədbirdə, həmçinin Azərbaycana maraq göstərən və gələcəkdə bu və ya digər sahədə ölkəmizlə əməkdaşlıq yaratmaq niyyətində olan iş adamları da iştirak edirlər.

T.Savada müharibə zamanı Tovuz rayonu, həmçinin Azərbaycanın cəbhə xəttindən uzaqda yerləşən digər şəhər və rayonlarının ermənilər tərəfindən raket atəşinə tutulması nəticəsində çoxsaylı dinc əhalinin həlak olduğunu və yaralandığını da xatırladıb. Bildirib ki, şəhidlərin ailələrinə və yaralanmış insanlara yardım etmək məqsədİlə vəsait toplanması böyük şərəfdir. T.Savada nitqini “Qarabağ Azərbaycandır!” sözləri ilə yekunlaşdırıb.

Səfir səmimi ürək sözlərinə, həmçinin təklif olunan yardım üçün yapon iş adamlarına təşəkkürünü bildirib. Döyüşlərdə yaralanmış əsgərlərə və şəhid ailələrinə yardımla bağlı vəsaitin, T.Savadanın Azərbaycana növbəti səfəri zamanı Azərbaycan Respublikası Müdafiə Nazirliyinin Silahlı Qüvvələr Fonduna köçürülməsini təklif edərək, bank rekvizitlərini ona təqdim edib.

Dekabrın 16-da Azərbaycana növbəti səfərə hazırlaşdığını qeyd edən T.Savada toplanmış vəsaitin həmin hesaba köçürələcəyini bildirib.

Tədbirdə iştirak edən məşhur kalliqrafiya ustası xanım Çoso Yabe Azərbaycan xalqını Qələbə münasibətilə təbrik edib. Azərbaycanın ədalətli qələbəsinin şərəfinə qədim Yaponiya adət-ənənələrinə uyğun olaraq, xüsusi perqament kağızı üzərində iki hiroqlifdən ibarət “Shoori” - “Qələbə” sözünü çəkib və onu səfirliyə hədiyyə edib.

Onu da qeyd edək ki, qonaqların böyük əksəriyyəti tədbirə Yapon milli kimonosunda qatılıblar. Qədim adət-ənənələrə əsasən, bu cür geyim yalnız milli bayramlar və ya təntənəli tədbirlər zamanı istifadə edilir.

 

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.