Bakı, 10 iyul, AZƏRTAC 

Tanınmış yaponiyalı alim, Nansen Qaçqın Mükafatı laureatı doktor Akio Kanainin başçılığı ilə Azərbaycanda səfərdə olan “Fuji” humanitar missiyasının altı optometrist mütəxəssisindən ibarət heyəti Bakı şəhəri, Binəqədi rayonu 246 nömrəli məktəb-liseydə məcburi köçkünlərin, aztəminatlı ailələrinin və şəhid ailələri üzvlərinin görmə qabiliyyətini pulsuz müayinə edib və onlara optik eynəklər paylayıb.

AZƏRTAC xəbər verir ki, tibbi müayinə BMT-nin qaçqınlar üzrə ali komissarının (BMT QAK) Azərbaycana yeni təyin olunmuş nümayəndəsi Quido Ambrosonun dəstəyi ilə həyata keçirilib.

Bu, “Fuji” humanitar missiyasının Azərbaycana humanitar məqsədli 14-cü səfəridir. BMT QAK-ın Azərbaycandakı nümayəndəliyi hər il qaçqınlar, məcburi köçkünlər və digər həssas qruplardan olan əhali üçün ödənişsiz göz müayinəsi və eynək paylanışının həyata keçirilməsi üçün aidiyyəti dövlət orqanlarının dəstəyi ilə bu cür missiyalar təşkil edir. Qeyd olunan humanitar fəaliyyət çərçivəsində iyulun 9-da Bakıda təşkil edilən aksiyada 524 nəfər müayinədən keçib. Müayinə olunanlardan 398 nəfərə optik eynəklər paylanılıb. Daha 38 nəfər üçün isə Yaponiyadan xüsusi optik eynəklər hazırlanıb gətiriləcək.

Ümumilikdə, 6 günlük missiya zamanı 2815 nəfər müayinədən keçib. Onlardan 2244 nəfərə optik eynəklər paylanılıb. 198 nəfər üçün isə Yaponiyadan xüsusi optik eynəklər üç ay müddətində hazırlanıb göndəriləcək.

Yaponiyanın “Fuji” humanitar missiyası Azərbaycandakı humanitar fəaliyyətinin yerinə yetirilməsi üçün 2005-ci ildən indiyədək 2,6 milyon ABŞ dollarınadək vəsait xərcləyib. 54 minədək yüksəkkeyfiyyətli optik eynək və digər əşyalar BMT QAK-ın Azərbaycandakı fəaliyyətinə ianə kimi ölkəyə gətirilib. Ümumilikdə, 28 mindən artıq qaçqın, məcburi köçkün və digər həssas qruplardan olan insanlar BMT QAK-ın Azərbaycandakı nümayəndəliyinin aidiyyəti hakimiyyət orqanları ilə birgə şərait yaratdığı ödənişsiz göz müayinəsi xidmətlərindən faydalanıb.

“Fuji” humanitar missiyası bu il 6 gün ərzində görmə qabiliyyətinin müayinəsi və eynəklərin paylanması zamanı istifadə üçün BMT QAK-a 4 min eynək, eyni zamanda, görmə və eşitmə ilə əlaqədar digər əşyalar ianə edib və 2500-dək məcburi köçkün, qaçqın və digər həssas qruplardan olan insanları müayinə etməyi hədəfə alıb.

Tailandda Hind-Çin qaçqınları üçün humanitar fəaliyyətə başladığı 1983-cü ildən indiyədək “Fuji” humanitar missiyası Asiyanın, Avropanın və Afrikanın altı ölkəsinə qaçqınlar, məcburi köçkünlər və digər həssas qruplardan olan insanlar üçün 160 min eynək ianə edib, Azərbaycan da daxil olmaqla bu ölkələrdən dördündə BMT QAK-ın xətti ilə görmə qabiliyyətinin müayinəsi missiyalarını həyata keçirib.

Yaponiyanın “Fuji” humanitar missiyasının görmə qabiliyyətinin müayinəsi üzrə yardım missiyası çərçivəsində humanitar təşəbbüsləri BMT QAK və Azərbaycan Hökuməti tərəfindən, həmçinin benefisiarlar tərəfindən daim yüksək qiymətləndirilib. Vurğulanıb ki, bu səylər Azərbaycanın üzləşdiyi didərginlik probleminə və BMT QAK-ın işinə anlayış və rəğbət nümayiş etdirir. Azərbaycan Hökumətinin də dəstəyi ilə doktor Akio Kanai 2006-cı ildə Nansen Qaçqın Mükafatına layiq görülüb və o, həmin mükafatdan əldə etdiyi vəsaiti Beyləqan rayonunda məcburi köçkünlər üçün su təchizatı layihəsinin maliyyələşdirilməsinə sərf edib.