Tokio, 28 aprel (AZƏRTAC). Aprelin 27-də Yaponiyanın “Rainbow Town FM 79.2 Tokyo” radiosunda Azərbaycan haqqında xüsusi veriliş səsləndirilmiş, onun video görüntüləri http://www.ustream.tv/user/Rainbowtown FM veb-səhifəsində canlı yayımla nümayiş etdirilmişdir.

Verilişdə Azərbaycanın Yaponiyadakı səfirliyinin konsulu, üçüncü katib Fuad Bağırov iştirak etmiş, aparıcının və dinləyicilərin suallarını cavablandırmışdır. Veriliş boyunca tanınmış caz ifaçısı Sevda Ələkbərzadənin ifasında Azərbaycan mahnıları səsləndirilmişdir.

Bir saat davam edən verilişin əvvəlində aparıcı Soiçi İki 23 il bundan əvvəl müstəqilliyini bərpa etmiş Azərbaycan Respublikası, onun coğrafi mövqeyi, güclü iqtisadi potensialı barədə məlumat vermişdir.

Verilişdə çıxış edən F.Bağırov Azərbaycan Respublikasının müstəqilliyini bərpa etməsində xalqımızın ümummilli lideri Heydər Əliyevin xüsusi rolunu vurğulamışdır. O, ulu öndər Heydər Əliyevin müəyyən etdiyi strateji inkişaf xəttinin Prezident İlham Əliyev tərəfindən uğurla davam etdirildiyini bildirmiş, ölkəmizdə bütün sahələrdə aparılan uğurlu islahatlar barədə məlumat vermişdir.

Veriliş zamanı Azərbaycan-Yaponiya diplomatik əlaqələrinin hərtərəfli inkişaf etdiyi, iki ölkə arasında sıx dostluq münasibətlərinin qardaşlaşmış şəhərlər səviyyəsinə qalxdığı vurğulanmışdır.

Yaponiya və Azərbaycan arasında ikitərəfli əlaqələrin yüksək səviyyədə olduğu qeyd edilmiş, beynəlxalq təşkilatlar çərçivəsində əməkdaşlıq barədə də məlumat verilmişdir. Yaponiyanın aparıcı şirkətlərindən biri olan “İtoçu”nun “Əsrin müqaviləsi”nə qoşulması, bunun nəticəsində Azərbaycan ilə Yaponiya arasında neft hasilatı sahəsində əməkdaşlığa başlanıldığı qeyd edilmişdir. Yaponiyanın digər şirkətlərinin də Azərbaycanda müxtəlif sahələrdə uğurla fəaliyyət göstərdikləri bildirilmişdir.

Verilişdə son illər yapon turistlərinin Azərbaycana axınının artmasının müşahidə edildiyi vurğulanmış, ölkəmizin görməli yerləri, ləziz milli mətbəx nümunələri barədə məlumat verilmişdir.

Hər iki ölkənin təhsil, mədəniyyət və turizm sahələrində əməkdaşlıq əlaqələrinin genişləndirilməsinin Azərbaycanın Yaponiyadakı səfirliyinin həyata keçirdiyi fəaliyyətin prioritet istiqamətlərindən olduğu qeyd edilmişdir.

Vüqar Ağayev

AZƏRTAC-ın xüsusi müxbiri

Tokio