SİYASƏT
Yaponiyanın “Rainbow Town FM 79.2 Tokyo” radiosunda Azərbaycan mətbuatı haqqında veriliş səsləndirilmiş, onun videogörüntüləri radionun veb-səhifəsində canlı yayımla nümayiş etdirilmişdir VİDEO
Bakı, 27 yanvar (AZƏRTAC). Yanvarın 26-da Yaponiyanın “Rainbow Town FM 79.2 Tokyo” radiosunda Azərbaycan mətbuatı haqqında xüsusi veriliş səsləndirilmiş, onun videogörüntüləri http://www.ustream.tv/user/Rainbowtown FM veb-səhifəsində canlı yayımla nümayiş etdirilmişdir.
Verilişdə AZƏRTAC-ın Yaponiyadakı xüsusi müxbiri Vüqar Ağayev iştirak etmiş, aparıcıların və dinləyicilərin suallarını cavablandırmışdır.
AZƏRTAC xəbər verir ki, bir saat davam edən verilişin əvvəlində aparıcılar Soişi İki, Saki Noda və Karena 1991-ci ildə müstəqilliyini bərpa etmiş Azərbaycan Respublikası, onun coğrafi mövqeyi, güclü iqtisadi potensialı barədə məlumat vermişlər.
Azərbaycanın bir sıra böyük, beynəlxalq səviyyəli layihələrə imza atdığı və hazırda dünyanın ən hündür televiziya qülləsini inşa etmək iddiasında olduğu bildirilmişdir. Azərbaycan hökumətinin ölkədə mətbuata və söz azadlığına xüsusi diqqət yetirdiyi qeyd edilmiş, hazırda 600-dən artıq KİV-in dövlət qeydiyyatına alındığı, altı respublika və bir çox regional səviyyəli televiziya kanallarının fəaliyyət göstərdiyi diqqətə çatdırılmışdır.
Bildirilmişdir ki, 1920-ci ildən fəaliyyət göstərən AZƏRTAC artıq beynəlxalq səviyyəli informasiya agentliyinə çevrilmişdir və dünyanın 27 ölkəsinin müvafiq qurumları, o cümlədən Yaponiyanın Kyodo News agentliyi ilə sıx əməkdaşlıq əlaqələrinə malikdir.
AZƏRTAC Asiya və Sakit Okean Ölkələri İnformasiya Agentlikləri Təşkilatının (OANA) və Avropa Xəbər Agentlikləri Alyansının (EANA) üzvüdür. Bundan əlavə, AZƏRTAC "AsiaPulse" - Asiya xəbər agentlikləri konsorsiumunun da fəal üzvlərindən biridir.
AZƏRTAC-ın ABŞ, İngiltərə, Fransa, Almaniya, Avstriya, Latviya, Macarıstan, Rusiya, Ukrayna, Misir, Türkiyə, Gürcüstan, İran, Qazaxıstan, Orta Asiya, Çin, Yaponiya, İtaliya, İspaniya, İsveç, Rumıniyada, respublikanın bölgələrində müxbir məntəqələri fəaliyyət göstərir.
Ötən ilin sentyabrında Asiya və Sakit Okean Ölkələri Xəbər Agentlikləri Təşkilatının (OANA) Moskvada keçirilən XV Baş Assambleyasında AZƏRTAC-ın baş direktoru qurumun vitse-prezidenti seçilmiş, OANA-nın növbəti Baş Assambleyasının 2016-cı ildə Bakıda keçirilməsi, 2016-2019-cu illərdə bu təşkilata AZƏRTAC-ın sədrliyi barədə qərar qəbul olunmuşdur.
Noyabrda isə Ər-Riyadda keçirilən Xəbər Agentliklərinin IV Dünya Konqresində (XADK) V Dünya Konqresinə 2016-cı ildə Azərbaycanın ev sahibliyi etməsi barədə qərar qəbul edilmişdir. Həmin qərara əsasən, 2016-2019-cu illərdə XADK-a AZƏRTAC sədrlik edəcəkdir.
Agentliyin 2011-ci ildə Tokioda xüsusi müxbir məntəqəsinin yaradıldığı bildirilmişdir. Qeyd edilmişdir ki, ötən dövrdə Yaponiya-Azərbaycan əlaqələri, siyasi, iqtisadi və mədəni sahələrdə əməkdaşlıq, yapon xalqının qədim tarixi və mədəniyyəti haqqında çoxlu sayda məqalə Azərbaycan mətbuatında dərc edilmiş və videomateriallar nümayiş etdirilmişdir.
Hazırda Azərbaycanda mətbuatın durumu haqqında sualı cavablandıran V.Ağayev demişdir ki, 1998-ci ildə mətbuat üzərində senzura ümummilli lider Heydər Əliyev tərəfindən ləğv edilmişdir. Bundan əlavə, 1999-cu ildə "Kütləvi informasiya vasitələri haqqında" yeni Qanunun qəbulu bu sahədə hüquqi bazanın zənginləşdirilməsi işinə əhəmiyyətli töhfə olmuşdur. Ümummilli lider Heydər Əliyevin Sərəncamı ilə "2000-2001-ci illərdə kütləvi informasiya vasitələrinin maddi-texniki şəraitinin yaxşılaşdırılması üzrə tədbirlər Proqamı" təsdiq olunmuş, idarəçilik sisteminin islahatı çərçivəsində Mətbuat və İnformasiya Nazirliyi ləğv edilmiş, KİV-lərin yaranması və fəaliyyətinin hüquqi əsaslarının möhkəmləndirilməsi məqsədilə Milli Mətbuat, Teleradio və İnternet Şurası yaradılmışdır. 2003-cü ilin martında isə Azərbaycan jurnalistlərinin I qurultayında media-ictimaiyyət, media-hakimiyyət münasibətlərini tənzimləyən qurum - Azərbaycan Mətbuat Şurası təsis edilmişdir.
2003-cü ildə İlham Əliyev Azərbaycan Prezidenti seçildikdən sonra bu sahəyə göstərilən diqqət və qayğı daha da artırılmışdır.
Prezident İlham Əliyevin 2008-ci il 31 iyul tarixli "Azərbaycan Respublikasında kütləvi informasiya vasitələrinə birdəfəlik maliyyə yardımı göstərilməsi haqqında" Sərəncamı ilə KİV-lərin "Azərbaycan" nəşriyyatına olan borcları tamamilə ləğv edilmişdir. Buna paralel olaraq, jurnalistlərin peşə nüfuzunun artırılması üçün jurnalist-məmur, jurnalist-vətəndaş, jurnalist-biznesmen çəkişmələrinə hüquqi müstəvidə son qoyulması istiqamətində müxtəlif tədbirlər görülmüşdür.
2008-ci ildə Kütləvi İnformasiya Vasitələrinə Dövlət Dəstəyi Konsepsiyasının qəbul olunması ilə bağlı qərar qəbul edilmiş, məhz bu sənəddə mətbuatın inkişafını təmin edəcək əsaslar öz əksini tapmışdır. Konsepsiyanın qəbulu və Prezident İlham Əliyevin 3 aprel 2009-cu il tarixli Sərəncamı ilə Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) yaradılması müstəqil Azərbaycan mətbuatının inkişaf tarixində növbəti dönüş mərhələsi olmuşdur.
Azərbaycan Mətbuat Şurasına xüsusi ofisin tikilməsi, onun açılışında Prezident İlham Əliyevin şəxsən iştirak etməsi, Mətbuat Şurası İdarə Heyətinin üzvlərini qəbul edərək jurnalistlərin problemlərini dinləməsi, onların həlli ilə bağlı real addımların atılması müstəqil Azərbaycan mətbuatının tarixində növbəti fundamental mahiyyət daşıyan əlamətdar hadisə kimi qiymətləndirilmişdir.
Mətbuata Azərbaycan dövlətinin xüsusi qayğısını vurğulayan V.Ağayev bildirmişdir ki, 2010-cu ildə Prezident İlham Əliyev mətbuat işçilərinin mənzil probleminin həll edilməsi ilə bağlı Sərəncam vermişdir. Həmin Sərəncamın icrası məqsədilə cari il iyulun 22-də - Milli Mətbuat Günündə 156 jurnalist ailəsinə yeni inşa edilmiş binada mənzillərin açarı təqdim edilmişdir. Qeyd edilmişdir ki, dünyada bənzəri olmayan bu hadisə həqiqətən də Azərbaycanda azad sözə, mətbuatın inkişafına yetirilən böyük diqqət kimi yüksək qiymətləndirilməlidir.
Vurğulanmışdır ki, ölkədə KİV-lərin inkişafına göstərilən bu yüksək qayğı və diqqətə görə Prezident İlham Əliyev 2010-cu və 2013-cü illərdə "Jurnalistlərin dostu" seçilmişdir.
Verilişdə Azərbaycan ilə Yaponiya arasında mətbuat sahəsində əməkdaşlığın inkişaf perspektivləri barədə də fikir mübadiləsi aparılmış, bu sahədə əlaqələrin daha da möhkəmləndirilməsinin vacibliyi vurğulanmışdır.