DÜNYA
Yaponiyanın hakim koalisiyası parlamentin aşağı palatasına keçirilən seçkilərdə üstünlüyü təmin edib
Tokio, 22 oktyabr, AZƏRTAC
Yaponiyanın Liberal Demokratik və Komey partiyalarından ibarət hakim koalisiya oktyabrın 22-də parlamentin aşağı palatasına keçirilən seçkilərdə deputat mandatlarının üçdə ikisini əldə edərək tam üstünlüyü təmin edib.
AZƏRTAC xəbər verir ki, bülletenlərin sayılmasının Yaponiyanın bütün telekanalları ilə nümayiş etdirildiyi seçkilərdə hakim koalisiya Konstitusiyada dəyişikliklər apara bilmək üçün lazım olan tam üstünlüyü qazanıb.
Yerli vaxtla oktyabrın 23-də gecə saat 1:20 dəqiqədə “Asahi TV”nin verdiyi məlumata görə, Liberal Demokratik Partiya 465 yerdən 281-ni, onun koalisiya tərəfdaşı Komey Partiyası isə 29-nu əldə edib.
Cari il sentyabrın sonlarında yaradılan və Tokionun qubernatoru xanım Yuriko Koikenin rəhbərlik etdiyi “Ümid” Partiyası 49 yer, Konstitusiyalı Demokratlar Partiyası isə 51 yer qazanıb.
Yerli vaxtla səhər saat 7-də açılan 47 min 740 seçki məntəqəsinin çoxunda səsvermə axşam saat 20:00-da başa çatıb.
Ölkənin cənubunda və bir sıra mərkəzi rayonlarında “Lan” qasırğasının yaxınlaşması ilə əlaqədar seçki məntəqələri saat 16:00-da bağlanıb.
Xatırladaq ki, Yaponiya parlamentinin aşağı palatasındakı 465 yer uğrunda 1180 namizəd mübarizə aparıb. Rəsmi mənbələrin bildirdiyinə görə, axşam saat 19:30-a kimi seçicilərin 31,82 faizi səsvermədə iştirak edib. Bu, parlamentin aşağı palatasına 2014-cü ildə keçirilən son seçkilərdə olduğundan 5,9 faiz azdır. Seçicilərin təqribən 20 faizi vaxtından əvvəl səsverməyə qatılıblar ki, bu da ən yüksək göstərici hesab edilir.
Son seçkilərin daha bir fərqli cəhəti 18 yaşında gənc vətəndaşlara ilk dəfə səsvermə hüququnun verilməsidir. Buna qədər yalnız 20 yaşı tamam olan gənclər səsvermə hüququna malik idilər.
Liberal Demokratik Partiyanın baş katibi Toşihiro Nikay deyib ki, seçkilərin nəticəsi onları tam qane edir. Çünki səsvermənin nəticələri hazırkı Nazirlər Kabinetinin cəmiyyətin inamını əldə etdiyini təsdiq edir.
T.Nikay vurğulayıb ki, LDP heç bir təkəbbür nümayiş etdirmədən öz fəaliyyətini stabil şəkildə davam etdirəcək.
Konstitusiyalı Demokratlar Partiyasının baş katibi Tetsuro Fukuyama isə deyib ki, bu partiya seçki kampaniyası zamanı hər gün keçirilən görüşlərdə cəmiyyətin dəstəyini əldə edə bilib.
Hazırda Parisdə beynəlxalq konfransda iştirak edən “Ümid” Partiyasının sədri, Tokio qubernatoru Yuriko Koike partiyasının məğlubiyyəti ilə razılaşdığını bildirib. Y.Koike deyib ki, seçkilərin nəticəsi mürəkkəbdir və müəyyən təhlil tələb edir. Xanım Y.Koike onu dəstəkləyənlərin etimadını doğrulda bilmədiklərinə görə təəssüfləndiyini də deyib.
Vüqar Ağayev
AZƏRTAC-ın xüsusi müxbiri
Tokio