Tokio, 24 oktyabr, AZƏRTAC

Yaponiyanın “Cross Border Club 3.0” yutub kanalında Azərbaycanın Avropanın enerji təminatında rolu və Ermənistanın bu layihələrə mane olmaq məqsədilə fəallaşması barədə xüsusi veriliş yayımlanıb.

AZƏRTAC xəbər verir ki, verilişin aparıcısı Yaponiyada kifayət qədər tanınmış yutub blogeri Kazuyasu İşida Azərbaycanın Avropanın enerji təchizatında oynadığı rol barədə yapon izləyicilərə ətraflı məlumat verib. “Azərbaycan yönünü Qarabağa çevirir” adlı verilişdə beynəlxalq aləmdə baş verən son proseslər fonunda bütün dünyada enerji mənbələrinə tələbatın kəskin artdığı qeyd edilib. Bu kanalın verilişlərində həmin mövzuya son vaxtlar çox toxunulduğunu xatırladan aparıcı məqsədin regionda baş verən proseslər barədə yapon ictimaiyyətini obyektiv məlumatlandırmaqdan ibarət olduğunu bildirib. Qeyd edib ki, hazırda Ukraynada baş verən hadisələr ötən əsrin 90-cı illərində ilk olaraq Qarabağda həyata keçirilib.

Verilişdə Azərbaycanın Yaponiya üçün dost bir ölkə olduğu, yaponların heç bir viza ödənişi etmədən bu ölkəyə səfər etməsinin mümkünlüyü diqqətə çatdırılır. Vurğulayır ki, Azərbaycana dəfələrlə etdiyi səfərlər, Yaponiyada yaşayan azərbaycanlılarla dostluq münasibətləri onu bu ölkə ilə sıx bağlayıb və o, yaponların regionda baş verən proseslər barədə obyektiv məlumatlar almasına çalışır. Cari ilin fevralında Azərbaycana, xüsusən də Qarabağ bölgəsinə səfəri barədə məlumat verən K.İşida həmin səfərdə iştirak edən jurnalistlərlə birlikdə buradakı həqiqətləri öz gözləri ilə gördüklərini bildirir. Qeyd edir ki, ermənilər tərəfindən Azərbaycanın Xocalı şəhərində dinc əhalinin qətliamının 30-cu ildönümü ilə bağlı təşkil edilən səfər zamanı həmin hadisələrdə Rusiya qüvvələrinin iştirakı barədə də məlumatlar əldə edib. Vurğulayır ki, bu gün Ukraynada dinc əhaliyə qarşı həyata keçirilən qırğınlar 1992-ci ilin fevralında Xocalıda baş verənlərin təkrarıdır.

Verilişdə 2020-ci il Vətən müharibəsi və Azərbaycanın 30 ilə yaxın bir dövrdə Ermənistan tərəfindən işğal edilmiş torpaqlarının azad edilməsi barədə də məlumat verilir. Qeyd edilir ki, həmin vaxt və sonralar imzalanan üçtərəfli bəyanatlara və digər sənədlərə baxmayaraq, Ermənistan atəşkəs rejimini pozmaqda davam edir. Vurğulanır ki, regionun dinc inkişafı, əhalinin firavan yaşayışı üçün Ermənistan müharibənin bitdiyini anlamalıdır. Qarşıdurmanın davam etməsi Avropa üçün də ciddi problemlər yarada bilər. Qarabağda sülh Avropanın enerji təhlükəsizliyi üçün zəruridir.

Enerji təhlükəsizliyini təmin etmək üçün Avropanın həm Azərbaycan, həm də Ermənistan rəhbərliyi ilə intensiv əlaqələr saxladığı, iki ölkə liderlərinin son vaxtlar Avropada görüşlərinin təşkilinin intensiv xarakter aldığı qeyd edilir.

Bildirilir ki, Bakı-Tbilisi-Ceyhan əsas ixrac neft kəməri və Cənub Qaz Dəhlizi ilə enerji mənbələrini dünya bazarına ötürən və zəngin enerji ehtiyatlarına malik olan Azərbaycan artıq Avropada etibarlı tərəfdaş kimi çox yaxşı tanınıb. Digər ölkələrdən fərqli olaraq, Azərbaycanın üzərinə götürdüyü öhdəliklərə əməl etməsi, həm də ölkəmizin böyük nüfuz qazanmasına səbəb olub. Eyni zamanda, uğurlu xarici siyasət yeridən Prezident İlham Əliyevin səyləri nəticəsində Mərkəzi Asiyada yerləşən Qazaxıstan və Türkmənistan kimi zəngin enerji ehtiyatlarına malik olan ölkələr də öz enerji ehtiyatlarını Azərbaycan üzərindən Avropaya nəql etmək barədə qərar qəbul ediblər.

Məhz bunun nəticəsində Azərbaycanın Avropa ölkələrinin enerji təminatında rolunun kəskin artdığı vurğulanıb. Qeyd edilib ki, Azərbaycan “Şahdəniz” yatağından çıxarılan qazın hasilatını artırmağı da nəzərdə tutur və bu, Avropa ölkələrinin enerji təminatında xüsusi rol oynayacaq.

Verilişdə bu siyasətin bir sıra ölkələr, xüsusən də Azərbaycan torpaqlarını 30 ilə yaxın bir müddətdə işğal altında saxlamış Ermənistan tərəfindən böyük qısqanclıqla qarşılandığı xüsusi vurğulanır. Qeyd edilir ki, belə mühüm beynəlxalq layihələrin qarşısını almağa çalışan Ermənistan Azərbaycanla sərhəddə təxribatlar törədərək qarşıdurma yaratmağa və üçüncü ölkələri münaqişəyə cəlb etməyə çalışır. Vurğulanır ki, Avropa ölkələri mühüm kəmərlərin keçdiyi əraziləri qorumaq üçün Qarabağ məsələsini birdəfəlik həll etməyə köməklik göstərməlidirlər. Bunun üçün erməni silahlılarının regionda fəaliyyətinə son qoyulmalı, Azərbaycanın ərazi bütövlüyü tam təmin olunmalıdır.

Qeyd edək ki, Yaponiyada populyarlığı ilə seçilən “Cross Border Club 3.0” yutub kanalının hazırda 122 mindən çox abunəçisi, 500 mindən artıq izləyicisi var.

Vüqar Ağayev

AZƏRTAC-ın xüsusi müxbiri

Tokio