Zaqatala, 8 avqust, Mustafa Dadaşov, AZƏRTAC

2019-cu ilin birinci yarısında Zaqatala rayonunda iqtisadiyyatın əsas sahələri üzrə məhsul buraxılışının həcmi ötən ilin eyni dövrü ilə müqayisədə 24,2 faiz və ya 28 milyon 685 min manat artaraq 149 milyon 326 min manat olub. Altı ayda rayonda 65 milyon 814,3 min manatlıq sənaye, 41 milyon 90 min manatlıq kənd təsərrüfatı məhsulları istehsal edilib, 11 milyon 852 min manatlıq tikinti işləri görülüb. Sənayedə məhsul istehsalı ötən ilin müvafiq dövrü ilə müqayisədə 70,6 faiz, kənd təsərrüfatında 1 faiz, tikintidə isə 6,3 faiz artıb. Cari ilin birinci yarısında rayonda 506-sı daimi olmaqla, 546 yeni iş yeri açılıb.

AZƏRTAC-ın bölgə müxbiri xəbər verir ki, bu barədə 2019-cu ilin altı ayının yekunları ilə bağlı avqustun 8-də Zaqatala Rayon İcra Hakimiyyətində keçirilən müşavirədə məlumat verilib.

Rayon icra hakimiyyətinin başçısı Mübariz Əhmədzadənin hesabat məruzəsində bildirilib ki, Prezident İlham Əliyevin ixracyönümlü istehsal, emal və infrastruktur müəssisələrinin yaradılması və inkişaf etdirilməsi istiqamətində verdiyi tapşırıqların icrasını təmin etmək məqsədi ilə Zaqatala rayonunda zəruri tədbirlər davam etdirilir. Builki mövsümdə zaqatalalı fermerlər 615,2 hektar sahədə tütün yetişdiriblər. Tütün əkini, bitkinin becərilməsi və məhsul yığımı işlərinə, ümumilikdə, 1842 nəfər mövsümi işçi cəlb edilib. Hazırda sahələrdə yaşıl tütünün dərimi davam edir. Yaz mövsümündə 255 hektar sahədə yeni fındıq bağları salınaraq, mövcud fındıq bağlarının sahəsi 19 min 760 hektara çatdırılıb. Builki mövsümdə rayonda 52 ton 945 kiloqram yaş barama istehsal edilib. Məhsul istehsalı ötən illə müqayisədə 4 ton 841 kiloqram artıb.

Diqqətə çatdırılıb ki, Zaqatala rayonu üçün ənənəvi və ixrac potensialı yüksək olan sahələrdən biri də gülçülükdür. Cari ilin yaz mövsümündə “AzRose” MMC-nin ərazisində 20 hektarda yeni qızılgül plantasiyası salınaraq, cəmiyyətə məxsus plantasiyaların ümumi sahəsi 181 hektara çatdırılıb. Plantasiyaların 144,8 hektarında “Dəməşq qızılgülü”, 36,2 hektarda isə “Lavanda” gülü əkilib. Ötən müddətdə bar verən sahələrdən 280 ton qızılgül, 26 ton lavanda ləçəyi tədarük edilib, müəssisə tərəfindən 70,5 litr qızılgül və 1034 litr lavanda yağı istehsal edilib.

Hesabat dövründə rayonda ekoloji məsələlər diqqət mərkəzində saxlanılıb, 20,5 hektar sahədə mədəni meşə əkini aparılıb. Bundan əlavə, 14 hektar sahədə fındıq, qoz və şabalıd ağaclarından ibarət aqrobağ salınıb.

Diqqətə çatdırılıb ki, cari ilin birinci yarısında rayonda bütün maliyyə mənbələri hesabına 11 milyon 852 min manat həcmində tikinti, abadlıq və quruculuq işləri görülüb.

Prezidentin müvafiq Sərəncamının icrası olaraq, əkin sahələrinin suvarma suyu ilə təminatının yaxşılaşdırılması və əhalinin içməli suya olan tələbatının ödənilməsi məqsədi ilə Əliabad qəsəbəsində, Lahıc və Yengiyan kəndlərində subartezian quyuları qazılıb, Aşağı Tala kəndində isə subartezian quyusunun qazılmasına başlanılıb.

Müşavirədə, həmçinin bu ilin altı ayında əhalinin elektrik enerjisi, təbii qaz, içməli su və digər xidmətlərlə təminatının yaxşılaşdırılması, vətəndaşların ərizə və şikayətlərinə baxılması sahəsində görülən işlər də ətraflı təhlil olunub.