REGİONLAR
Yaşı bir əsrdən çox olan nadir kitablar VİDEO
Salyan Mərkəzləşdirilmiş Kitabxana Sistemində bu il ilk dəfə kitab-abidələrin sərgisi açılacaq
Salyan, 10 mart, İsmayıl Cəfərli, AZƏRTAC
Bilik mənbəyi olan kitabları təkcə oxumaq yox, həm də qorumaq lazımdır. Salyan Rayon Mərkəzləşdirilmiş Kitabxana Sistemində yaşı bir əsrdən çox olan nadir kitablar 81 ildir qorunur. Mərkəzləşdirilmiş Kitabxana Sistemində bu il ilk dəfə olaraq kitab-abidələrin sərgisinin açılmağı nəzərdə tutulub.
AZƏRTAC xəbər verir ki, Salyandakı bu kitabxana 1903-cü ildən fəaliyyət göstərir. 1985-ci ildən Nizami Gəncəvinin adını daşıyan kitabxana 5 şöbədən ibarət olmaqla, özündə 43 filialı birləşdirir. Salyan Rayon Mərkəzləşdirilmiş Kitabxana Sisteminin kitab fondunda 66786 ədəd kitab mövcuddur ki, bunlardan 669 ədədi fonda yeni daxil olub. Kitabxananın hazırda 600 min 965 nəfər oxucu kütləsi var. Onların 4287 nəfəri kitabxanaya ötən il yazılıb. Kitabxanaçılar internet əsri olmasına baxmayaraq, bu gün də kitabxananı tək qoymayan oxucuların olduğunu qeyd edirlər.
Oxucu Rahil Kazımovun sözlərinə görə, kitabxananın indiki vəziyyəti bir oxucu kimi onu qane edir: “Otaqlar həmişə təmizdir, bütün kitablar var. İstər Azərbaycan, istərsə də rus ədəbiyyatı əldə etmək mümkündür. Həmçinin tərcümələr də var. İstənilən vaxt gəlib oxuyuruq, vaxtımı da səmərəli keçirirəm”.
Salyan Rayon Mərkəzləşdirilmiş Kitabxana Sistemini başqa kitabxanalardan fərqləndirən burada yaşı bir əsrdən çox olan nadir, qədim kitab abidələrinin qorunmasıdır. Buradakı ən qədim nəşr 1890-cı ilə aiddir. Kitab Sankt-Peterburqda nəşr olunub. Bundan başqa 1894-cü, 1898-ci, 1903-cü və 1906-cı illərdə nəşr olunan kitablar da fondun qədim kitab abidələri guşəsində mühafizə olunur. Bu kitablar müxtəlif illərdə Salyan sakinləri tərəfindən kitabxanaya bağışlanılıb.
Kitabxananın şöbə müdiri Sevinc Qaçayeva deyib: “Bu qədim kitablar kitabxanamıza 1940–1948-ci illərdə təqdim edilib. O vaxtdan bəri bir əsrdən çox yaşı olan kitabları xüsusi guşədə qoruyub saxlayırıq. Qədim kitabların 69-u lüğət tərkiblidir, 15–i isə ensiklopediyalı lüğətlərdir, söz birləşmələrindən bəhs edir. Onların içərisində tarixi Bizans dövründən, eləcə də müxtəlif elmlərdən bəhs edən kitablarımız da var”.
Qədim kitabların 114 ədədi dövlət reyestri xidmətinin qeydiyyatından keçirilərək, “kitab abidələri” siyahısına daxil edilib. Bunlardan 103 ədədi kitabxanada, 11-i isə şəxsi evlərdə qorunan “Qurani Kərim” nümunələrdir.