İQTİSADİYYAT


“Yaşıl iqtisadiyyat”ın təşviqi ilə bağlı verbinarlar keçirilir

Bakı, 22 yanvar, AZƏRTAC

İqtisadiyyat Nazirliyi və Birləşmiş Millətlər Təşkilatının İnkişaf Proqramının (BMTİP) təşkilatçılığı ilə “Dayanıqlı investisiyalar: Azərbaycan iqtisadiyyatı üçün imkanlar və trendlər” mövzusunda vebinar keçirilib. Tədbirdə 50-dən çox investisiya eksperti, müvafiq dövlət orqanlarının, akademik dairələrin nümayəndələri iştirak edib.

Nazirliyin mətbuat xidmətindən AZƏRTAC-a bildirilib ki, məqsəd BMT-nin 2030-cu il gündəliyinə uyğun olaraq, dayanıqlı inkişaf məqsədlərinə (DİM) nail olunması üçün resursların optimallaşdırılmasında Azərbaycan hökumətinə dəstək göstərilməsidir.

Tədbirdə İqtisadiyyat Nazirliyinin Dayanıqlı inkişaf və sosial siyasət şöbəsinin müdiri, Dayanıqlı İnkişaf üzrə Milli Əlaqələndirmə Şurasının katibi Hüseyn Hüseynov və BMTİP-in rezident nümayəndəsinin müavini Çaru Bist Azərbaycanda dayanıqlı inkişaf məqsədlərinin maliyyələşdirilməsində dövlət orqanlarının, özəl sektorun, yerli və beynəlxalq inkişaf agentliklərinin əməkdaşlığının vacibliyini vurğulayıblar. Bildirilib ki, DİM-lərin həyata keçirilməsində iqtisadi, sosial və ekoloji amillərin vahid formada inteqrasiyası, “yaşıl iqtisadiyyat”ın təşviqi xüsusi əhəmiyyətə malikdir. Bu istiqamətdə dövlət və özəl sektorun birgə fəaliyyəti, maarifləndirmə dayanıqlı və yaşıl investisiyaların uğurla reallaşmasına şərait yaradacaq. Bununla yanaşı, DİM-lər və yaşıl investisiyalar az karbonlu istehsalın olduğu, resursların səmərəli istifadə edildiyi və inklüzivliyin təmin edildiyi iqtisadiyyata keçidə töhfə verəcək.

Müzakirələrdə BMTİP-də DİM İnvestisiyaları üzrə baş məsləhətçi Kurt Morriesen, Sosial Fəaliyyət üzrə İşçi Qrupun icraçı direktoru Yurgen Hammer, “Herbert Smith Freehills”də aktivlərin idarə olunması üzrə mütəxəssis Stefan Nyubay, “PNC Financial Services Group”da təsirin artırılması strategiyası üzrə rəhbər Nik Aşbörn və “J.P.Morgan”ın inkişafın təsirləri üzrə rəhbəri Arsalan Mahtafar çıxış edərək “yaşıl iqtisadiyyat”ın inkişafı istiqamətində fikirlərini bölüşüblər.

Qeyd edək ki, dayanıqlı investisiyaların təşviqi, yaşıl və sosial təsirləri olan sahələrə investisiyaların cəlb olunması, “yaşıl maliyyələşdirmə” təşəbbüsləri barədə məlumatlılığın artırılması məqsədilə seminarların təşkili davam etdiriləcək.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.